Kovakambure ovakwetu ovasuverwa:

Okuza kokambo okatenga nga The Watchtower keyuva 1 ku Rozonḓu 2008 kOtjiingirisa, mwa uta okukara otupa tu tu nepu ndi “Horereye kongamburiro yawo.” Nu okuza koruveze ndwo, omueze auhe outjatatu mokambo akehe okape mwa ri notupa twi.

Ovalese ovengi va raisa ongaro iṋe tji va za nokulesa otupa twi? Omulese umwe tja za nokulesa ehungi ohunga na Marta wa tja: “Ami mba meṱameṱa tji mba lesa ehungi ndo orondu mbi ri tjimuna Marta. Aruhe mbi vanga okusekirisa ovayenda nu mbi kara noviungura ovingi, posi yokutja povikando tjiva mbi zemba ounanḓengu wokuhaama pu novakwetu okuserekarera.” Omutanda umwe tja za nokulesa ehungi raEster wa tja: “Otjomitanda oweṱe ovandu mbu tu yandja ombango tjinene komizaro vyakandino. Tu sokurihwikika nawa, posi yokutja katu sokuyandja ombango tjinene komizaro.” Eye wina wa weza kutja: “Jehova u yandja ombango tjinene kongaro yomitima vyetu.” Ehungi ohunga na Petrus ra hinga omukazendu umwe Omukriste okutja: “Tjee lese ehungi ndi ee rimunu tjimuna mbi ri mehungi ndo. Ami mba kondjisa okukonḓonona kutja ehungi ndi ma ri ndji hongo tjike.”

Ovalese mba na varwe ovengi mba raisa ondangi komahungi nga, ve yarukira po omambo womuapostele Paulus wokutja: “Omambo aehe nga tjangwa mOmatjangwa ya tjangerwa okutuhonga.” (Rom. 15:4) Jehova wa twa omahungi wovandu mba mOmbeibela kutja me tu honge oviṋa ovinanḓengu. Atuhe matu yenene okurihongera kovihorera vyovandu mba kai na tja kutja twa kara orure ndu ṱa pi mouatjiri.

Arikana kondjeye okulesa embo ndi tjimanga. Ri unguriseye mOmerikotameneno wEṱunḓu reṋu, orondu oro embo ndi ma ri nana ombango yovanatje tjinene! Ombongo tji mai utu okuungurisa embo ndi mOmakonḓononeno wOmbeibela wOmbongo, kondja okukara pombongarero otjivike atjihe! Tji mo lese embo ndi, o riramba kako. Tjita kutja omahungi aehe ye rire omanamuinyo mouripura woye nu rivara aayo u ri mbo. Ritwa mozongaro zovandu mbo kutja u mune oviṋa owo mbyaave munu. Sasaneka otjikaro tji va raisa mozongaro pekepeke ku notjikaro ove tjo tjo raisa andakuzu wa ri mongaro tjingeyo.

Tu nonyuṋe tjinene okumupa embo ndi. Nu matu zeri kutja ma ri mu vatere tjinene nomaṱunḓu yeṋu. Minikweye norusuvero nu mu kare nawa,

Orutu Orunane rwOvahongonone vaJehova