1, 2. (a) Otjiwaṋa tjaIsrael tja ri nouzeu waye? (b) Elia wa kuramenenwe i omapirukiro yeṋe pOndundu Karmel?

ELIA aa tarere otjiwaṋa tjaatji kondjo ouzeu okuronda kOndundu Karmel. Otjo aatji munika kutja tjiri tja ri nouhepe ounene. Ourumbu mbwa kambura ozombura ndatu nohinga, we ve ṱuna tjinene.

2 Ovaprofete 450 vaBaal aave kayenda momuano omuritongamise nu va tondere omuprofete waJehova, Elia. Ombara oserekaze Isebel ya zepa ovakarere vaJehova ovengi, posi yokutja omurumendu ngwi kaa tira okurwira ongamburiro youatjiri. Nu hapo ma rwire ongamburiro youatjiri nga ruṋe? Ovapristeri mbo ngahino aave ripura kutja, omurumendu erike ngo kamaa yenene okuverwisa. (1 Ozomb. 18:4, 19, 20) Ombara Ahab wina ye ya metemba rayo rouhona. Noyo wina ya tondere Elia tjinene.

3, 4. (a) Ongwaye Elia tja ri nemuma meyuva enanḓengu ndo? (b) Omapuriro yeṋe ngu matu kakonḓonona?

3 Omuprofete ngwi wa kuramenenwe i ovitjitwa ovizeu eye mbye hina wa rora okukara navyo. Otja Elia tjaa tarere ovandu tji mave rondo Ondundu Karmel, eye aa tjiwa kutja moruveze rwatjimanga owo mave munu kutja ouṋe ngu ri omunamasa, oMukuru poo otjiwaṋa otjirunde ho. Elia wa raisa ongaro iṋe? Eye “wa ri omundu otja eṱe,” okutja matu sokuundjira ko kutja wa ri nemuma. (Lesa Jakobus 5:17.) Mena rokutja wa kovererwe i ovandu mbe ha ri nongamburiro, nombara ndja poka ku Mukuru, novapristeri ovazepe mbo, Elia mape ya ee rimunu ourike.​—1 Ozomb. 18:22.

4 Nu hapo otjikeṋa tji tja tjita kutja Ovaisrael ve kare mouzeu mbwi? Nu ehungi ndi ri na tjike na ove? Ripurira kotjihorera tjaElia tjongamburiro nu u tare kutja matu yenene okutjiungurisa vi ndino.

Ozongondjero nḓa kambura orure, nambano ze ya kokuyenenisiwa

5, 6. (a) Ovaisrael va ri nozongondjero za ye? (b) Ombara Ahab ya tura ondjo ya ye komurungu waJehova?

5 Oure wozombura ozengi, Elia wa muna omerikotameneno watjiri amaye nakaurwa nokupirukirwa nu kaa yenene okueta omarundurukiro kotjiṋa ho. Oure wozombura ozengi, Ovaisrael aave rikotamene  koomukuru voposyo voviwaṋa ongondoroka nawo moruveze rwokurikotamena ku Jehova Mukuru. Nu moruveze rwaElia, omerikotameneno kovisenginina ya takavarere.

6 Ombara Ahab ya turire ondjo tjinene komurungu waJehova. Oyo ya kupa Isebel, omusuko wombara yaSidon. Isebel we rimanene okuhandjaura omerikotameneno waBaal mehi raIsrael nokuyandisa omerikotameneno wouatjiri. Nu tjimanga Ahab wa uta okutjita oviṋa avihe Isebel mbi ma vanga. Eye wa tunga ondembeli notjipunguhiro ku Baal na hongorere po ovandu okurikotamena ku mukuru wotjisenginina ngwi.​—1 Ozomb. 16:30-33.

7. (a) Otjikeṋa tji tja tjita kutja omerikotameneno waBaal ye rire omayaukise tjinene nao? (b) Ohunga noure wourumbu woruveze rwaElia, ongwaye tji matu yenene okukara nongamburiro kutja Ombeibela kai riyata momambo? (Wina tara  kokaongo.)

7 Otjikeṋa tji tja tjita kutja omerikotameneno waBaal ye rire omayaukise tjinene nao? Oyo ya pukisa Ovaisrael nu ya tjita kutja ovengi ve poke ku Jehova. Nu wina ya ri ongamburiro ondjaukise nonḓepe. Orondu omerikotameneno wayo aaye kamburire mo omerirandisiro wovarumendu novakazendu moruvakiro, nomikandi vyovitjitwa vyehambaneno, nomapunguhiro wavanatje. Jehova wa raisa onyengo ye mokuhinda Elia ku Ahab okukemuraera kutja maku ya ourumbu mbu mau kara ko nga omuprofete waMukuru tja tjivisa omaandero wawo. (1 Ozomb. 17:1) Kombunda yozombura ozengi Elia wa ya ku Ahab ne kemu raera kutja nga woronganisire otjiwaṋa novaprofete vaBaal kOndundu Karmel. *

Oviṋa ovingi mbyaavi ungurisiwa momerikotameneno waBaal, ndino vi kayendisiwa komurungu

8. Ehungi ohunga nomerikotameneno waBaal ndi, ri natjike na eṱe ndino?

8 Nu hapo ovitjitwa mbi vi natjike na eṱe ndino? Ovandu tjiva mape ya ave munu kutja omerikotameneno waBaal kaye notjiṋa na eṱe, orondu katu munu ozondembeli poo ovipunguhiro vyaBaal. Nungwari ehungi ndi katu sokurivara otjekuruhungi uriri. (Rom. 15:4) Embo ndi “Baal” ri heya “omuini wotjiṋa” poo “omuhona.” Nu Jehova wa raera otjiwaṋa tje kutja nga tji mu toorore ‘otjomuhona’ poo otjomuini watjo. (Jes. 54:5) Mo itavere kutja ovandu ovengi ndino ve karera ovahona ovengi pekepeke mbe he ri Mukuru Omunamasaaehe? Ovengi ve ritoororera oomuhona vawo, indu tji mave rambere ovimariva, omihunga vyehupo, omahore, okukovisa ozonḓuma zawo zonyama, poo okukarera oomukuru ovengi ku ku rikotamenwa ndino moruveze rwokurikotamena ku Jehova. (Mat. 6:24; lesa Ovaroma 6:16.) Pu mape hee kutja, oviṋa ovingi mbyaavi ungurisiwa momerikotameneno waBaal,  ndino vi kayendisiwa komurungu. Tji twe ripurire kombatasaneno ndja ri pokati kaJehova na Baal, matji tu vatere okutoora ondando osemba ohunga nomerikotameneno wetu.

“Owo aave ripura pevari”

9. (a) Ongwaye Ondundu Karmel tji ya ri oruveze oruwa okutjiukisa kutja ongamburiro yaBaal omungandjo? (Wina tara komambo wokehi.) (b) Elia wa tja vi kotjiwaṋa?

9 KOndundu Karmel, otjiwaṋa aatji yenene okumuna Israel, okuza motjana tjaKison kuṱa kehi yOkuvare Okunene popezu nozondundu zaLibanon keyuva kokunene. * Nungwari otja eyuva tjaari piti meyuva rovitjitwa ovizeu ndo, aape munika kutja ehi ra ri mongaro ongendise. Ehi ndaari hapa nawa ndi, Jehova nda yandjere kOvaisrael nai aari munika navi. Oro nambano ra rira okuti ku kwa kukuta uriri,  mena rouyova wotjiwaṋa tjaMukuru! Otjiwaṋa tji tja woronganena pamwe, Elia wa hungira kuna tjo na tja: “Mamu ripura pevari nai nga ruṋe? Muhona tje ri Ndjambi rikotameneye ku Ye; nungwari Baal tje ri Ndjambi rikotameneye ku ye!”​—1 Ozomb. 18:21.

10. Ongwaye Elia tja raera Ovaisrael kutja ngave ise okuripura pevari, nouatjiri uṋe ounanḓengu mbu va zembire?

10 Ongwaye Elia tja raera Ovaisrael kutja ngave ise okuripura pevari? Omena rokutja owo kaave munu ounahepero wokutoorora pokati komerikotameneno waJehova na inga owaBaal. Owo aave munu kutja mave yenene okurikotamena momiano aviyevari, okukarera Baal novitjitwa vyawo oviyaukise nokuningira ombatero ku Jehova Mukuru. Owo ngahino aave ripura kutja Baal ma hapisa ovikunino vyawo nu “Ndjambi wovimbumba vyaIsrael vyovita” e ve yama movita. (1 Sam. 17:45) Owo va zemba ouatjiri ounanḓengu ovandu ovengi ndino mbu ve he u zuu nawa. Jehova ka haṋa omerikotameneno we ku nomundu. Eye u undjira ku eṱe okurikotamena ku ye erike, nu eye erike ongwa pwa okurikotamenwa. Indu tji matu mu karere okuzambo atu kara norupa momerikotameneno warwe, eye kamaa yakura omerikotameneno wetu, nu ma rire otjiṋa otjiyaukise ku ye!​—Lesa Eksodus 20:5.

11. Ehungi raElia pOndundu Karmel ma ri tu vatere vi okurikonḓonona oveni kutja ovikeṋa mbi ri ovinanḓengu tjinene mehupo retu na momerikotameneno wetu?

11 Ovaisrael kaave rikotamene ku Mukuru watjiri erike, nungwari wina aave rikotamene koomukuru wovisenginina. Ovandu ovengi ndino wina ve toora omukambo omuvi mbo, nu ve yandjera “oomuhona” varwe okuhita mehupo rawo nave nakaura omerikotameneno ku Mukuru. Tji twa yandja ombango komeriyarikaṋeno waElia wokuisa okuripura pevari maye tu vatere okurikonḓonona oveni kutja ovikeṋa mbi ri ovinanḓengu tjinene mehupo na momerikotameneno wetu.

Ombatasaneno yokutja owaṋi ngu ri Mukuru watjiri

12, 13. (a) Elia wa ningira otjiwaṋa okukara nombatasaneno yaye? (b) Matu raisa vi kutja eṱe wina tu nongamburiro mu Mukuru otja Elia?

12 Okuzambo Elia wa ningira otjiwaṋa kutja tji kare nombatasaneno ombupu uriri okuraisa kutja ouṋe ngu ri nawa. Ovapristeri vaBaal aave sokurongerisa otjipunguhiro nave twa ko otjinamuinyo tji mave punguha, okuzambo aave sokukumba ku mukuru wawo wotjisenginina kutja ma yakise omuriro wokutjita ombunguhiro. Elia wina aa sokukumba ku Mukuru we. Eye wa tja: “Ingwi ngu ma itavere nomuriro, eye ongu ri Ndjambi!” Elia aa tjiwa nawa kutja ouṋe ngu ri Mukuru watjiri. Eye wa ri nongamburiro yomasa nga tja yandjera ovapristeri vaBaal kutja ve tenge po. Owo va toorora ondwezu yongombe ndji mave punguha nave utu okukumba ku Baal. *​—1 Ozomb. 18:24, 25.

 13 Ndino katu munu ovihimise rukwao. Posi yokutja Jehova keya runduruka. Matu yenene okukara nongamburiro mu ye tjimuna Elia. Okutara kotjihorera, indu ovandu tji ve hi nokuyakura imbi Ombeibela mbi i honga, tu sokuveyandjera okuyandja oumune wawo rutenga. Otja Elia tja tjita, eṱe wina matu sokuṱaṱera ku Mukuru watjiri okuzengurura ouzeu wovandu. Ihi matu yenene okutjita indu tji tu hi nokuṱaṱera kondjiviro yetu oveni, nungwari tji matu ṱaṱere kEmbo raMukuru, oro nda tjangerwa ‘okuvyura ozondataiziro.’​—2 Tim. 3:16.

Elia wa muna kutja omerikotameneno waBaal ombandjarero uriri, nu aa vanga kutja otjiwaṋa tjaMukuru tji rimunine otjini

14. Elia wa toka vi ovaprofete vaBaal, nu omena ratjike?

14 Ovaprofete vaBaal va kayenda komurungu okurongerisa otjipunguhiro tjawo nave utu okukumba ku mukuru wawo. Owo va ravaera povikando ovingi amave tja: “Tu zuvira, Baal!” Va kara pokuravaera okuza komuhuka nga komutenya. Ombeibela okuzambo mai tja: “Nungwari kapa ri eziriro.” Oruveze rwometaha Elia wa uta okuvetoka kutja, Baal ngahino u noviungura ovingi, poo ngahino wa twaererwa, poo ngahino wa rara nowo mave hepa okukemupendura. Elia wa raera ovaprofete ovanavizeze mbo na tja: “Kumbeye neraka enene!” Ihi otjiraisiro tjokutja eye wa muna kutja omerikotameneno waBaal ombandjarero uriri, nu aa vanga kutja otjiwaṋa tjaMukuru tji rimunine otjini.​—1 Ozomb. 18:26, 27.

15. Ehungi rovapristeri vaBaal ma ri raisa vi kutja okutoorora omuhona warwe pendje na Jehova ombandjarero?

15 Ovaprofete vaBaal va uta okurokoha nokuura nu va “ravaerera ko nomasa nave ritwere notuvyo nomangaruvyo otja komuhingo wawo nga ombinḓu tji ya ziza.” Nungwari avihe mbi vya ri omungandjo. ‘Kapa ri eziriro, nu kape zuvakere ombosiro.’ (1 Ozomb. 18:28, 29) Baal keko kaparukaze. Eye otjiṋa Satan tje ungurisa okupora natjo ovandu ku Jehova. Ouatjiri owombwi wokutja tji twe ripahere omuhona warwe pendje na Jehova, ku twara kombandjarero nu ku eta ohoṋi wina.​—Lesa Epsalme 25:3; 115:4-8.

Mukuru watjiri wa zuvira ongumbiro yaElia

16. (a) Elia tja tungurura otjipunguhiro ku Jehova pOndundu Karmel, mape ya tja zemburukisa otjiwaṋa ohunga natjike? (b) Elia wa raisa vi komurungu kutja wa ri nongamburiro mu Mukuru we?

16 Omapeta tji ye ya, ya ri oruveze ku Elia okutjita ombunguhiro ye. Eye wa tungurura otjipunguhiro ku Jehova, tji tja haṋaurirwe i ovanavita vaMukuru. Wa ungurisa omawe 12, ngahino ngaaye zemburukisa ovandu ovengi vomihoko omurongo vyaIsrael kutja owo ngunda  aave sokukara nonḓuviro kOmatwako waMoses nga yandjerwe kotjiwaṋa tjaIsrael atjihe. Okuzambo Elia wa twa otjinamuinyo tjombunguhiro ye kotjipunguhiro nu a raere otjiwaṋa kutja nga tji tirire omeva kombunguhiro na kozonguṋe. Omeva ngo ngahino va kaisa mOkuvare Okunene ku kwa ri popezu na wo. Eye nandarire wa sa okarutjiva okukondoroka otjipunguhiro ne ke urisa nomeva. Eye wa tjita oviṋa avihe mbi, mena rongamburiro ndja ri na yo kutja Jehova ma zuvire ongumbiro ye, nungwari karaerere ovaprofete vaBaal okutjita nao, orondu aa vanga kutja ma rire oupupu ku wo okutjita ombunguhiro yawo.​—1 Ozomb. 18:30-35.

Mongumbiro ye, Elia wa raisa kutja ee rikendere kotjiwaṋa tjaIsrael, orondu aa zeri kutja Jehova ‘me ve tanaurire ku Ye omuini’

17. Ongumbiro yaElia ya raisa vi kutja ovikeṋa mbi ri ovinanḓengu tjinene ku ye, nu eṱe matu yenene vi okuhorera ku ye tji matu kumbu?

17 Tja mana okuṱuna oviṋa avihe, Elia wa kumba ku Mukuru. Ongumbiro ye ya eta ovihape oviwa, orondu mu yo eye wa tjiukisa ouatjiri ounanḓengu. Rutengatenga Elia wa vanga kutja otjiwaṋa tji tjiwe kutja Jehova ongu ri “Ndjambi waIsrael,” nungwari kaBaal. Otjitjavari, aa vanga okutjiukisa kutja eye wa ri omukarere waJehova uriri, nokutja ondangu aihe mai sokuyenda ku Mukuru. Otjisenina, Elia wa raisa kutja ee rikendere kotjiwaṋa tjaIsrael, orondu aa zeri kutja Jehova ‘me ve tanaurire ku Ye omuini.’ (1 Ozomb. 18:36, 37) Nakombanda youzeu mbwa kongorera ko mena rokuhinongamburiro kwawo, Elia ngunda we ve suverere. Tji matu kumbu ku Mukuru, matu yenene okuraisa omerisusuparisiro tjingewo nga Elia nga raisa, nongendo kena raMukuru, norusuvero ku varwe mbu mave hepa ombatero yetu.

18, 19. (a) Jehova wa zira vi ongumbiro yaElia? (b) Elia wa rakiza otjiwaṋa kutja tji tjite vi, nu ongwaye ovapristeri vaBaal tjaave ha hepa okuṱirwa otjari?

18 Komurungu wongumbiro yaElia, otjiwaṋa mape ya aatji ripura kutja Jehova ma tjiti otja mukuru wawo wovizeze Baal pa tjiti. Nungwari kombunda yongumbiro ye, kaave hepa okuripura rukwao kutja mape kara vi. Orondu Ombeibela mai tja: “Muhona wa raura omuriro, nowo wa seseta ombunguhiro ndji nozonguṋe nomawe, nau ningiririsa ehi nau pwirisa omeva morurora.” (1 Ozomb. 18:38) Indo tjiri ra ri eziriro ehimise! Okuzambo, otjiwaṋa tja tjita vi?

“Muhona wa raura omuriro”

19 Otjiwaṋa atjihe tja ravaera kutja: “Muhona Eye Ndjambi; Muhona erike ongu ri Ndjambi!” (1 Ozomb. 18:39) Owo nambano va muna kutja owaṋi ngu ri Mukuru watjiri. Nungwari kave raisire ongamburiro. Okuitavera uriri kutja Jehova ongu ri Mukuru watjiri kombunda yokumuna omuriro okuza keyuru otjeziriro kongumbiro, kaku ya yenena okuraisa kutja otjiwaṋa tja ri nongamburiro tjiri. Okutja Elia we ve ningira kutja ve raise ongamburiro yawo momuano warwe. Eye  we ve ningira okutjita otjiṋa tjaave sokutjita ozombura ozengi nḓa kapita, okukara nonḓuviro kOmatwako waJehova. MOmatwako waMukuru mwa ri netwako ndi tja ovaprofete avehe voposyo novanavisenginina ve sokuzepewa. (Deut. 13:5-9) Ovapristeri vaBaal mba, va ri ovanavita naJehova Mukuru nu aave pirukire ondando ye owina. Owo mave hepa okuṱirwa otjari nao? Owo ve na pu va ṱotjari novanatje avehe ovehinandjo mba nyosiwa nomuinyo otjombunguhiro ku Baal? (Lesa Omiano 21:13; Jer. 19:5) Imbo ovarumendu mbe ha sokuṱirwa otjari oparukaze! Okutja Elia wa rakiza kutja ve zepewe, nu va zepewa.​—1 Ozomb. 18:40.

20. Ongwaye onyengo ovapirure vozongamburiro ndji ve raisa ohunga nomayandekero wovapristeri vaBaal tji i hi nomazikameno?

20 Ovapirure ovengi ndino mape ya ave raisa onyengo ohunga nombatasaneno ndja tjitwa pOndundu Karmel. Ovandu tjiva ve tira kutja ovandu vozongamburiro mape ya ave ungurisa otjitjitwa ho otjombitirapo yokuungurisa outwe kovandu vozongamburiro zarwe. Nu ouhumandu, ovitjitwa vyoutwe ndino vyatakavara tjinene mozongamburiro. Posi yokutja Elia kaa ungurisa outwe kovandu vozongamburiro zarwe. Eye wa perwe ousemba i Jehova okuyandeka ovandu ovarunde mbo. Nu kombanda yanao, Ovakriste vatjiri ve tjiwa kutja kamaave sokutoorera ovanavita nawo engaruvyo. Nungwari ve kongorera omirari mbya yandjwa kovahongewa vaJesus avehe, otja komambo waKristus ku Petrus indu tja tja: “Yarura mo engaruvyo roye motjihweka tjaro. Avehe mbu mave toora engaruvyo mave ṱengaruvyo.” (Mat. 26:52) Jehova ma ungurisa Omuna we okuyenenisa ombango ye moruyaveze.

21. Otjihorera tjaElia matji vatere vi Ovakriste vatjiri ndino?

21 Ovakriste avehe vatjiri ve nomerizirira wokuraisa ongamburiro yawo mongaro yawo yehupo. (Joh. 3:16) Omuano umwe mu mave yenene okutjita nao, omokuhorera ovarumendu mbe nongamburiro otja Elia. Eye ee rikotamene ku Jehova erike nu aa tunduuza varwe okutjita nao. Eye wina aa vatere ovandu okumuna kutja Satan u ungurisa ozongamburiro zoposyo okupukisa ovandu nokuvepora ku Jehova. Wa ri nongamburiro kutja Jehova ma yenene okuṱuna ozongaro nḓa ri po, nu kaa ṱaṱere kondjiviro ye omuini. Elia wa rwira ongamburiro youatjiri. Eṱe wina ngatu horere kongamburiro ye!

^ par. 9 Ondundu Karmel i hapa nawa tji i kara, orondu ombepo i vinga omueme okuza kokuvare nowo au yekutjatja ondundu ndji. Mena rokutja Baal aa tangerwa kokutja ongu rokisa ombura, ondundu ndji ya ri oruveze oruwa kombatasaneno ndji. Ondundu Karmel nai ndja kukutire, ya ri oruveze oruwa okuraisa kutja ongamburiro yaBaal omungandjo.

^ par. 12 Elia we ve raera kutja, “ave yakisa omuriro” kotjipunguhiro. Ovahongwandu tjiva ve tja ovanavisenginina otja imbo povikando tjiva ve ungurisa ovipunguhiro mbi nondovi kehi kutja pe munike aayo omuriro wa yakisiwa momuano omuhimise.