Ang Matun-an Naton kay Jesus

Parte sa Matuod nga Relihion

Ginabaton bala sang Dios ang tanan nga relihion?

▪ Naluoy gid si Jesus sa mga tawo nga ginpatalang sang butig nga relihion. Ginpaandaman niya sila parte sa butig nga mga propeta nga “nagapalapit . . . nga daw sa mabuot nga mga karnero, pero ang matuod pareho sila sa mabangis nga mga ido.” (Mateo 7:15, APD) Natalupangdan mo bala nga ginagamit sang iban ang relihion para sa kalainan?

Nangamuyo si Jesus sa Dios: “Ang imo pulong kamatuoran.” (Juan 17:17) Ginapakita sini nga wala ginabaton sang Dios ang pagsimba nga wala nagahisanto sa kamatuoran sang Biblia. Gani, ginsulit ni Jesus ang ginsiling sang Dios sang ginpatuhuyan niya ang pila ka tawo nga nagapakunokuno nga relihioso: “Wala sing pulos ang ila padayon nga pagsimba sa akon, bangod ginatudlo nila subong mga doktrina ang mga sugo sang mga tawo.”—Mateo 15:9.

May matuod gid bala nga relihion?

▪ Sang maistorya ni Jesus ang babayi nga taga-Samaria nga ginpatalang sang butig nga relihion, nagsiling sia: “Nagasimba kamo sa wala ninyo makilala . . . Ang matuod nga mga sumilimba magasimba sa Amay sa espiritu kag kamatuoran, kay sa pagkamatuod amo sini ang ginapangita sang Amay nga magsimba sa iya.” (Juan 4:22, 23) Ginapakita sini nga teksto nga may ara gid matuod nga relihion.

Si Jesus nagsiling: “Wala ako nagahimo sang bisan ano sa akon lamang kaugalingon; kundi ginahambal ko ini nga mga butang suno gid sa gintudlo sa akon sang Amay.” Nahibaluan gid ni si Jesus nga ang relihion nga iya ginatudlo amo lang ang matuod. (Juan 8:28) Gani, nagsiling sia: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Bangod ang matuod nga mga sumilimba nahiusa sa isa lamang ka paagi sa pagpalapit sa Amay, buot silingon, nahiusa sila sa isa lamang ka matuod nga relihion.

 Paano mo makilal-an ang matuod nga mga sumilimba?

▪ Ang isa ka Cristiano nagasunod kay Jesucristo. Binagbinaga ang apat ka halimbawa ni Jesus nga kon sundon naton, makilala-an kita nga iya mga sumulunod.

1. Nangamuyo si Jesucristo kay Jehova: “Ginpakilala ko ang imo ngalan.” (Juan 17:26) Amo man sini ang ginahimo sang matuod nga mga Cristiano.

2. Nagwali si Jesus parte sa Ginharian ni Jehova sa mga pamalay kag ginsugo niya ang iya mga disipulo nga amo man sini ang himuon. Nagsiling sia: “Bisan diin nga siudad ukon minuro kamo magsulod, pangitaa ninyo kon sin-o didto ang takus.” Sang ulihi, ginsilingan man niya ang iya mga sumulunod: “Busa lakat kamo kag maghimo sang mga disipulo sa mga tawo sang tanan nga pungsod.” (Mateo 10:7, 11; 28:19) Makilala mo ang matuod nga mga Cristiano subong kay amo man sini ang ila ginahimo.

3. Si Jesus neutral sa pulitika. Gani, nagsiling sia nga ang iya mga sumulunod ‘indi bahin sang kalibutan, subong nga sia indi bahin sang kalibutan.’ (Juan 17:14) Dapat ang matuod nga mga sumilimba kilala man nga neutral sa pulitika.

4. Bangod sa iya gugma, nagsakripisyo si Jesus para sa iban. Sia nagsiling: “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:35) Ang matuod nga mga Cristiano nagahigugmaanay man kag wala nagaentra sa inaway.

Paano makabulig sa imo ang matuod nga pagsimba?

▪ Para mahibaluan mo ang matuod nga relihion, dapat mo anay kilalahon si Jehova sing maayo. Kon makilala mo si Jehova, higugmaon mo gid sia. Makabulig ini sa imo nga matigayon ang pinakamaayo nga sahi sang kabuhi. Ginpromisahan niya sing kabuhi nga walay katapusan ang mga nagahigugma sa iya. Gani, nagsiling si Jesus: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios.”—Juan 17:3.

Para sa dugang nga impormasyon, tan-awa ang kapitulo 15 sini nga libro, Ano Gid ang Ginatudlo sang Biblia? nga ginbalhag sang mga Saksi ni Jehova.

[Retrato sa pahina 16]

“Mag-andam kamo sa indi matuod nga mga propeta. Nagapalapit sila sa inyo nga daw sa mabuot nga mga karnero, pero ang matuod pareho sila sa mabangis nga mga ido.”—Mateo 7:15, APD