Magdiretso sa kaundan

Magdiretso sa listahan sang kaundan

Mapalangit Bala ang Tanan nga Maayo nga Tawo?

Mapalangit Bala ang Tanan nga Maayo nga Tawo?

 Mapalangit Bala ang Tanan nga Maayo nga Tawo?

SA GAB-I antes patyon si Jesus, sa tapos sang ila panihapon, ginpromisahan niya ang iya mga apostoles nga hatagan niya sila sing lugar sa langit. Nagsiling sia: “Sa balay sang akon Amay may madamo nga puluy-an. Kon wala, ginsilingan ko kuntani kamo, bangod magalakat ako agod maghanda sang duog para sa inyo.” (Juan 14:2) Ngaa hatagan sila ni Jesus sing lugar sa langit? Ano ang himuon nila didto?

May ginatigana si Jesus nga pinasahi nga asaynment para sa iya mga disipulo. Sa sina man nga gab-i, sia nagsiling: “Kamo ang nagpabilin nga kaupod ko sa mga pagtilaw sa akon; kag nagapakigkatipan ako sa inyo para sa isa ka ginharian subong nga ang akon Amay nagpakigkatipan sa akon.” (Lucas 22:28, 29) Nagpromisa ang Dios nga himuon niya si Jesus nga Hari nga amo ang magahatag sa mga tawo sang ila gid ginakinahanglan—ang maayo nga paggobierno. Dulaon ni Jesus ang ila mga kabudlayan kag laglagon niya ang mga nagapaantos sa ila. Bisan pa ang mga ginsakpan ni Jesus magalab-ot “tubtub sa kaukbungan sang duta,” ang iya trono ara sa langit.—Salmo 72:4, 8; Daniel 7:13, 14.

Pero, may mga kaupod si Jesus nga magagahom. Ginpromisahan niya ang iya mga apostoles sing lugar sa langit. Sila ang una nga ginpili nga ‘magagahom sa duta subong mga hari.’—Bugna 5:10.

Daw ano kadamo ang mapalangit? Pareho sang bisan ano nga gobierno, ang magagahom sa Ginharian sang Dios sa langit diutay lang kon ikumparar sa iya mga sakop. Ginsilingan ni Jesus ang iya kaupod nga mga manuggahom: “Indi magkahadlok, diutay nga panong, bangod nahamut-an sang inyo Amay nga ihatag sa inyo ang ginharian.” (Lucas 12:32) Ining “diutay nga panong” may kadamuon nga 144,000. (Bugna 14:1) Diutay lang sila kon ikumparar sa minilyon ka mainunungon nga sakop sang Ginharian nga magakabuhi sing walay katapusan sa duta.—Bugna 21:4.

Gani, indi tanan nga maayo nga tawo mapalangit. Halimbawa, si Hari David isa ka maayo nga tawo pero si apostol Pedro nagsiling: “Si David wala magkayab sa langit.” (Binuhatan 2:34) Si Juan Bautista isa man ka maayo nga tawo pero ginpakita ni Jesus nga indi sia magahari sa langit. “Sa mga nabun-ag sa mga babayi,” siling ni Jesus, “wala sing ginpadala nga daku pa kay Juan Bautista; apang ang tawo nga kubos sa ginharian sang langit daku pa sa iya.”—Mateo 11:11.

Mabaton Mo Man Bala ang Padya Para sa Maayo nga mga Tawo?

Ano ang himuon sang isa para mabaton niya ang padya nga mabuhi sing walay katapusan sa duta? Si Jesus nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Talupangda nga bangod sa gugma sang Dios sa aton, ginhatagan niya kita sing paglaum nga mabuhi sing walay katapusan. Pero, ang mga “nagatuo” lamang amo ang makabaton sini nga padya.

Ang aton pagtuo dapat nabase sa sibu nga ihibalo. (Juan 17:3) Mapakita mo nga maayo ka nga tawo kon tun-an mo ang katuyuan ni Jehova sa katawhan. Kon magpakita ka sing pagtuo sa imo natun-an kag sundon ini, makasigurado ka nga matigayon mo ang kabuhi nga walay katapusan.

 [Kahon sa pahina 7]

Ano ang Ginasiling sang Biblia?

Pamangkot:

Ano ang nagakatabo sa maayo nga mga tawo kon mapatay sila?

Sabat:

“Ang patay wala makahibalo sang bisan ano.”MANUGWALI 9:5.

Pamangkot:

Ano ang paglaum sang maayo nga mga tawo?

Sabat:

“Magaabot ang tion nga ang tanan nga yara sa handumanan nga mga lulubngan makabati sang iya [ni Jesus] tingog kag magagua.”JUAN 5:28, 29.

Pamangkot:

Diin maistar ang kalabanan sa maayo nga mga tawo?

Sabat:

“Ang mga matarung magapanubli sang duta, kag magapuyo dira sa gihapon.”SALMO 37:29.