MADAMO nga babayi ang may ngalan nga Rebeca. May kilala ka bala nga amo sini ang ngalan?— * Si Rebeca importante gid nga babayi sa Biblia, ang pinakakilala nga libro sa bilog nga kalibutan. Ano ang nahibaluan mo parte sa iya?— Dapat tun-an naton ang iya maayo nga halimbawa kay makabulig ini sa aton nga maalagad sing matutom ang matuod nga Dios, si Jehova.

Si Rebeca ikaduha nga babayi nga ginsambit sa Biblia nga nangin matuod nga sumilimba ni Jehova. Kabalo ka bala kon sin-o ang una?— Si Sara, ang asawa ni Abraham. Tigulang na sia sang nagbata kay Isaac, gani wala na ini masundan. Tan-awon naton kon paano ginpakita ni Rebeca nga gusto gid niya pahalipayon si Jehova kag kon paano sila nagkitaay ni Isaac.

Sobra na 60 ka tuig ang nagligad sugod sang ginpalakat sang Dios si Abraham kag si Sara halin sa Haran pakadto sa duta sang Canaan. Sang tigulang na gid si Abraham kag si Sara, nagpromisa ang Dios nga makabata pa sila kag ngalanan nila sia nga Isaac. Palangga gid ni Abraham kag ni Sara si Isaac. Sang napatay si Sara sa edad nga 127, nasubuan gid si Isaac. Daku na sia kag indi gusto ni Abraham nga mangasawa sia sang mga taga-Canaan kay wala sila nagasimba kay Jehova. Gani ang alagad ni Abraham, nga mahimo Eliezer ang ngalan, ginpapangita niya sing asawa para kay Isaac sa mga paryente niya sa Haran. Mga sobra 800 kilometros ang kalayuon sini!—Genesis 12:4, 5; 15:2; 17:17, 19; 23:1.

 Sang ulihi, nakaabot si Eliezer kag ang iya mga upod sa Haran. Dala nila ang ila mga kagamitan kag ang mga regalo para sa palangasaw-on ni Isaac nga ginkarga sa 10 ka kamelyo. Nagpahuwayhuway sila sa bubon kay kabalo si Eliezer nga kada hapon, nagasag-ub diri ang mga tawo sing tubig para sa ila mga sapat kag pamilya. Nangamuyo sia nga ang babayi nga magpainom sa iya kag ‘magsugot nga paimnon pati ang iya mga kamelyo’ amo ang pilion niya nga pangasaw-on ni Isaac.

Amo gid sini ang natabo! Nag-abot sa bubon ang guapa-guapa nga si Rebeca. Sang nangayo si Eliezer sing tubig para imnon, nagsiling sia: ‘Magasag-ub man ako para sa imo mga kamelyo.’ Nagdayaw gid si Eliezer samtang nagabalikbalik si Rebeca sa bubon sa pagsag-ub. Pamensara bala, kinahanglan sia magsag-ub sing 1,000 ka litro nga tubig para paimnon ang 10 ka uhaw nga kamelyo!

Ginhatagan ni Eliezer si Rebeca sing manami nga mga regalo. Nabal-an man niya nga si Rebeca, anak ni Betuel nga paryente ni Abraham. Ginhagad ni Rebeca si Eliezer kag ang iya mga upod nga didto ‘matulog’ sa ila balay. Dayon, nag-una sia para isugid sa iya pamilya nga may mga bisita sila nga ginpadala ni Abraham halin pa sa Canaan.

Sang makita sang utod ni Rebeca nga si Laban ang malahalon nga mga regalo kag sang nakilala niya si Eliezer, ginpasulod niya sila. Pero, si Eliezer nagsiling: “Indi ako magkaon kon indi ko anay masugid ang akon katuyuan sa pagkadto diri.” Gin-istorya niya dayon kon ngaa ginpadala sia ni Abraham. Si Laban, si Betuel kag ang iya asawa, nalipay kag nagpasugot nga ipakasal si Rebeca kay Isaac.

Sa tapos sang panyapon, si Eliezer kag ang iya mga upod didto nagtulog. Pagkaaga, si Eliezer nagsiling: “Mapauli na ako sa akon agalon.” Pero, gusto sang nanay ni Rebeca kag sang iya utod nga magtener sila “bisan napulo lang ka adlaw.” Sang ginpamangkot si Rebeca kon maupod sia, nagsabat sia, “Huo, maupod ako.” Gani, nag-upod sia dayon kay Eliezer. Pag-abot niya didto, nag-asawahay sila ni Isaac.—Genesis 24:1-58, 67, APD.

Sa banta mo, mahapos bala para kay Rebeca nga bayaan ang iya pamilya kag mga amiga dayon magkadto sa malayo nga lugar, kag posible indi na sila magkitaay liwat?— Indi. Pero, gusto gid ni Rebeca nga pahalipayon si Jehova. Gani, ginpakamaayo gid sia. Nangin katigulangan sia sang aton Manluluwas nga si Jesucristo. Kon pahalipayon naton si Jehova, pareho ni Rebeca, pakamaayuhon man niya kita.—Roma 9:7-10.