“Dungan kami nga nadulaan sing trabaho sang akon asawa,” hinumdom ni Seth. * “Sa sulod sang duha ka tuig, nabuhi kami paagi lang sa hinatagan kag temporaryo nga mga trabaho. Bangod sini, na-depres ang akon asawa nga si Priscilla, kag pamatyag ko wala ako sing pulos.

“Ano ang amon ginhimo? Pirme ginadumdom ni Priscilla ang ginsiling ni Jesus sa Mateo 6:34. Nagsiling si Jesus nga indi namon pagkabalak-an ang buas, kay ang buas may kaugalingon nga mga kabalaka. Kag ang tinagipusuon nga pangamuyo ni Priscilla nagpabakod sa iya nga magpadayon. Ang Salmo 55:22 amo naman ang naglugpay sa akon. Pareho sa salmista, gintugyan ko ang akon lulan kay Jehova, kag nabatyagan ko gid ang iya bulig. Bisan pa may obra na kami subong, ginapasimple gihapon namon ang amon kabuhi bilang pagsunod sa laygay ni Jesus sa Mateo 6:20-22. Labaw sa tanan, nangin mas suod kami sa Dios kag nangin mas suod man kami sa isa kag isa.”

“Nabalaka gid ako sa amon palaabuton sang naputo ang negosyo sang amon pamilya,” siling ni Jonathan. “Bangod sang krisis sa ekonomiya, nadula ang 20 ka tuig ko nga pinangabudlayan. Ginabaisan na namon nga mag-asawa ang kuarta. Wala na gani kami nagagamit sing credit card kon magbakal, kay basi indi ini pagbatunon.

“Pero ginbuligan kami sang Pulong sang Dios kag sang iya espiritu nga makahimo sing maayo nga mga desisyon. Natun-an ko nga batunon ang bisan ano nga obra, kag wala na kami nagagasto kon indi man lang kinahanglan. Bilang mga Saksi ni Jehova, ginbuligan man kami sang pareho namon nga mga Saksi. Ginpabakod nila kami kag ginsakdag sa mabudlay nga tion.”

“Sang gulpi lang ako ginbayaan sang akon bana, nasakitan gid ako kag naakig,” hinumdom ni Raquel. “Kag grabe gid ang akon kasubo. Pero nagpalapit ako sa Dios, kag ginlugpayan niya ako. Nagahaganhagan ang akon pamatyag bangod sang paghidait sang Dios kon mangamuyo ako sa iya kada adlaw. Daw ginabulong niya ang kasakit sang akon tagipusuon.

“Kag nagapasalamat ako sa iya Pulong, ang Biblia, kay nabatuan ko ang kaakig kag kalain sing buot. Ginsunod ko gid ang ginsiling ni apostol Pablo sa Roma 12:21: ‘Indi ka magpadaug sa malaut, kundi padayon nga dauga ang malaut paagi sa maayo.’

“Ang isa ka maayo nga abyan nagbulig sa akon nga makita nga kinahanglan malampuwasan ko ini. Ginpakita niya sa akon ang Manugwali 3:6 kag mainayuhon ako nga ginsilingan nga may tion nga kinahanglan ‘batunon naton nga wala na ini.’ Mabudlay, pero kinahanglan ko himuon. May bag-o na ako nga mga tulumuron subong.”

“Kon nabungkag ang inyo pag-asawahay, kinahanglan mo ang bulig,” siling ni Elizabeth. “May suod ako nga amiga nga nagabulig sa akon adlaw-adlaw. Nagahibi sia kon nagahibi ako, ginalugpayan niya ako, kag ginapabatyag niya nga may nagapalangga sa akon. Kumbinsido gid ako nga gingamit sia ni Jehova para bulngon ang kasakit nga akon ginabatyag.”

Si Luis, nga ginsambit kaina sa umpisa sini nga serye sang artikulo, may malubha nga balatian sa tagipusuon, kag kaduha ka beses na nga diutayan lang mapatay. Kinahanglan niya subong i-oxygen sing 16 ka oras kada adlaw. “Padayon gid ako nga nagapangamuyo kay Jehova,” siling niya. “Kag pagkatapos ako makapangamuyo sa Dios, nabatyagan ko nga ang iya espiritu nagapabakod sa akon. Nabuligan ako sang pangamuyo nga magpadayon kay nagatuo ako sa iya kag nakahibalo ako nga nagaulikid sia sa akon.”

“Madamo pa ako sang gusto himuon, pero indi ko na masarangan,” paathag ni Petra nga mga otsentahon na. “Kabudlay gid batunon nga nagluya na ako. Ginakapoy na ako kag bulong na lang ang nagabuhi sa akon. Pirme ko ginadumdom kon paano ginpangabay ni Jesus ang iya Amay nga kuhaon ang iya kabudlayan, kon posible. Pero ginhatagan ni Jehova si Jesus sing kusog, kag  ginhatagan man niya ako sing kusog. Ang pangamuyo nakabulig gid sa akon kada adlaw. Maayo ang akon pamatyag kon makaistorya ako sa Dios.”—Mateo 26:39.

Amo man sini ang ginbatyag ni Julian, nga nagapakigbato sa multiple sclerosis sing halos 30 na ka tuig. “Ginbayaan ko ang akon mataas nga posisyon bangod naka-wheelchair na lang ako,” siling niya. “Pero nangin mapuslanon ang akon kabuhi kay ginagamit ko ini sa pagbulig sa iban. Ang paghatag makapahaganhagan sang imo ginabatyag, kag ginatuman gid ni Jehova ang iya promisa nga pabakuron niya kita sa mabudlay nga kahimtangan. Pareho ni apostol Pablo, makasiling gid ako: ‘Sa tanan nga butang may kusog ako paagi sa isa nga nagapabakod sa akon.’”—Filipos 4:13.

“Sang nabungguan si Tatay sang salakyan kag napatay, daw indi ako magpati sang primero,” siling ni Antonio. “Daw indi gid makatarunganon—nagtabok man lang sia. Pero wala na ako sing mahimo. Na-coma sia sing lima ka adlaw antes napatay. Wala ako nagahibi sa atubangan sang akon iloy, pero nagahibi ako kon ako lang isa. ‘Ngaa? Ngaa?’ Pirme ko ginapamangkot sa akon kaugalingon.

“Sadtong mabudlay nga mga tion, pirme gid ako nagapangayo sing bulig kay Jehova para makontrol ko ang akon emosyon kag hatagan niya ako sing kalinong. Kag amat-amat ako nga nangin kalmado. Nadumduman ko nga ginapaathag sang Biblia nga ang ‘wala ginapaabot nga hitabo’ nagakatabo sa kada isa sa aton. Bangod indi makabutig ang Dios, kumbinsido ako nga makita ko liwat si Tatay sa tion sang pagkabanhaw.”—Manugwali 9:11; Juan 11:25; Tito 1:2.

Amo man sini ang ginahunahuna ni Robert, nga ginsambit sa una nga artikulo. Sia nagsiling: “Naeksperiensiahan namon nga mag-asawa ang paghidait nga ginsambit sa Filipos 4:6, 7. Nabatyagan namon ini paagi sa pagpangamuyo kay Jehova. Nakabulig ini sa amon nga isugid sa mga reporter ang amon paglaum nga pagkabanhaw. Bisan pa napatay ang amon bata sa aksidente sa eroplano, madamo kami sing malipayon nga tion upod sa iya. Kag amo ini ang pirme namon ginapamensar.

“Sang ginsilingan kami sang pareho namon nga mga Saksi nga nakita nila kami sa TV nga kalmado nga nagapaathag sang amon pagtuo, ginsilingan namon sila nga bangod gid yadto sa ila mga pangamuyo para sa amon. Nagapati gid ako nga ginabuligan kami ni Jehova paagi sa ila madamo nga mensahe para lugpayan kami.”

Subong sang ginapakita sang mga halimbawa, ang Dios makalugpay sa mga tawo nga may sarisari nga problema kag kabudlayan. Mahimo man bala niya ini sa imo? Ano man nga kabudlayan ang imo maatubang, may lugpay nga makabulig sa imo nga malampuwasan ini. * Gani mangayo sing bulig kay Jehova. Sia ang “Dios nga nagahatag sang tanan nga sahi sang lugpay.”—2 Corinto 1:3.