Dmytro Prodan amefungwa gerezani nchini Ukrainia tangu Machi 2026

Mashahidi wa Yehova Waliofungwa Gerezani kwa Sababu ya Imani Yao—Kulingana na Eneo

CHEZA

Kufikia Septemba 2026, zaidi ya Mashahidi wa Yehova 282 wamefungwa gerezani ulimwenguni pote kwa sababu ya imani yao.

Kulingana na Kifungu cha 18 cha Mkataba wa Kimataifa wa Haki za Kiraia na Kisiasa, haki ya kuwa na uhuru wa mawazo, uhuru wa dhamiri, na uhuru wa kidini ni haki ya msingi ya kibinadamu. Hata hivyo, katika baadhi ya nchi, Mashahidi wa Yehova wananyimwa haki hiyo ya msingi na kufungwa gerezani isivyo haki na hata kutendewa kikatili. Wengi wao wamefungwa gerezani kwa sababu tu ya imani yao. Na wengine wamefungwa kwa kukataa kujiunga na jeshi kwa sababu ya dhamiri.

Singapore

Sheria ya Singapore inasema kwamba wanaume wote nchini humo wanapaswa kutumikia jeshini. Serikali ya nchi hiyo haikubali sababu za kidini au za kimaadili za kukataa kutumikia jeshini. Wale wanaokataa kutumikia jeshini wanaweza kuhukumiwa kifungo cha gereza cha hadi miezi 30. Kwa miaka mingi, shirika la Umoja wa Mataifa limekuwa likiiomba Singapore iwaruhusu watu kukataa utumishi wa kijeshi kwa sababu za kidini au za kiadili. Hata hivyo, bado nchi hiyo haijakubali kufuata viwango vya kimataifa vya haki za kibinadamu. Kwa sasa, kuna vijana 11 ambao ni Mashahidi wa Yehova waliofungwa gerezani kwa kukataa kujiunga na jeshi kwa sababu ya dhamiri, na 4 kati yao wanatumikia kifungo cha pili.

Bofya hapa ili kupakua orodha ya Mashahidi wa Yehova waliofungwa gerezani kwa sababu ya imani yao nchini Singapore.

Ukrainia

Kwa miaka 30 hivi, Mashahidi wa Yehova nchini Ukrainia wamenufaika na sheria inayowaruhusu watu wanaokataa kujiunga na jeshi kwa sababu ya dhamiri kufanya utumishi wa badala wa kiraia. Hata hivyo, vita vilipoanza nchini Ukrainia Februari 24, 2022, ilithibitika wazi kwamba hakukuwa na utaratibu wa kisheria wa kuandaa utumishi wa badala wa kiraia kwa watu waliokataa kujiunga na jeshi kwa sababu ya dhamiri. Kwa hiyo, wengi waliokataa kujiunga na jeshi walifikishwa mahakamani na baadaye wakafungwa gerezani. Kwa sasa, kuna Mashahidi 19 ambao wamefungwa gerezani na wengine 17 wamewekwa kizuizini wakisubiri hukumu. Makatibu watatu Maalumu wa Umoja wa Mataifa walisema kwamba wana wasiwasi kuhusu kuzingatiwa kwa haki za kibinadamu kwa sababu hakuna mipango yoyote iliyofanywa kwa ajili ya utumishi wa badala wa kiraia.

Bofya hapa ili kupakua orodha ya Mashahidi wa Yehova waliofungwa gerezani kwa sababu ya imani yao nchini Ukrainia.

“Wakumbukeni wale walio gerezani, kana kwamba mmefungwa pamoja nao.”—Waebrania 13:3.

Ona Pia

MASWALI YANAYOULIZWA MARA NYINGI