Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Kwa Nini Mashahidi wa Yehova Hawajihusishi na Siasa?

Kwa Nini Mashahidi wa Yehova Hawajihusishi na Siasa?

Mashahidi wa Yehova hawaungi mkono upande wowote wa kisiasa kwa sababu za kidini. Sababu zao zinategemea kile ambacho Biblia hufundisha. Hatuwashawishi viongozi wa kisiasa wafanye mambo tunayotaka, hatupigii kura vyama au wagombea wa viti vya kisiasa, hatugombei vyeo katika serikali wala kushiriki katika harakati zozote za kutaka serikali ibadili mambo fulani au kubadili serikali. Tunaamini kwamba Biblia inatoa sababu nzuri za kutofanya mambo hayo.

  • Tunamwiga Yesu, ambaye alikataa cheo cha kisiasa. (Yohana 6:15) Aliwafundisha wanafunzi wake ‘wasiwe sehemu ya ulimwengu’ na akawaambia waziwazi kwamba hawapaswi kuunga mkono upande wowote wa kisiasa.Yohana 17:14, 16; 18:36; Marko 12:13-17.

  • Sisi ni washikamanifu kwa Ufalme wa Mungu, ambao Yesu alisema hivi kuuhusu: “Hii habari njema ya ufalme itahubiriwa katika dunia yote inayokaliwa.” (Mathayo 24:14) Tukiwa wawakilishi wa Ufalme wa Mungu tulioagizwa kutangaza kuja kwa Ufalme huo, hatujihusishi hata kidogo na siasa za nchi yoyote ile, kutia ndani nchi tunayoishi.2 Wakorintho 5:20; Waefeso 6:20.

  • Kwa sababu hatujihusishi na siasa, tunaweza kuzungumza kwa uhuru kuhusu habari njema ya Ufalme wa Mungu kwa watu wanaounga mkono mifumo mbalimbali ya kisiasa. Tunajitahidi kuonyesha kupitia maneno na matendo yetu kwamba Ufalme wa Mungu ndio utakaosuluhisha matatizo ya ulimwengu.Zaburi 56:11.

  • Kwa kuwa tunaepuka migawanyiko ya kisiasa, tumeunganishwa tukiwa undugu wa kimataifa. (Wakolosai 3:14; 1 Petro 2:17) Kinyume cha hilo, dini zinazoingilia mambo ya kisiasa huleta migawanyiko katikati ya washiriki wao.1 Wakorintho 1:10.

Kuheshimu serikali. Ingawa hatushiriki katika mambo ya kisiasa, tunaheshimu mamlaka za serikali zinazotutawala. Jambo hilo linapatana na amri ya Biblia inayosema: “Kila nafsi na ijitiishe kwa mamlaka zilizo kubwa.” (Waroma 13:1) Tunatii sheria, tunalipa kodi, na kuunga mkono jitihada za serikali za kuandaa hali bora kwa ajili ya raia. Badala ya kushiriki katika jitihada za kubadili serikali, tunafuata shauri la Biblia la kusali kwa ajili ya “wafalme na wale wote walio katika cheo cha juu,” hasa wakati ambapo wanafanya maamuzi yanayoweza kuathiri uhuru wa ibada.1 Timotheo 2:1, 2.

Tunaheshimu pia haki za wengine za kufanya maamuzi yanayohusu mambo ya kisiasa. Kwa mfano, hatuvurugi shughuli za upigaji-kura au kuwavuruga wale wanaoamua kupiga kura.

Je, msimamo wetu wa kutojihusisha na siasa ni jambo jipya? La. Mitume na Wakristo wengine wa karne ya kwanza walikuwa na msimamo huohuo kuelekea mamlaka za serikali. Kitabu Beyond Good Intentions kinasema hivi: “Ingawa waliamini kwamba walikuwa na wajibu wa kuheshimu mamlaka za kiserikali, Wakristo wa mapema hawakuamini kwamba walipaswa kushiriki katika mambo ya kisiasa.” Vivyo hivyo, kitabu On the Road to Civilization kinasema kwamba Wakristo wa karne ya kwanza “hawakukubali vyeo vya kisiasa.”

Je, msimamo wetu wa kutojihusisha na siasa unahatarisha usalama wa nchi? La. Sisi ni raia wanaopenda amani na kwa sababu hiyo mamlaka za serikali hazina sababu ya kutuogopa. Fikiria ripoti ya mwaka wa 2001 iliyotolewa na Shirika la Kitaifa la Sayansi la Ukrainia. Ikizungumzia msimamo wetu wa kutounga mkono upande wowote, ripoti hiyo ilisema hivi: “Leo huenda watu wengine wasipendezwe na msimamo huo wa Mashahidi wa Yehova; hiyo ndiyo iliyokuwa sababu ya msingi ya wao kushtakiwa na utawala wa Wanazi na Wakomunisti.” Na si hilo tu, hata walipokuwa wakikandamizwa na Muungano wa Sovieti, Mashahidi “waliendelea kuwa raia wanaofuata sheria. Walifanya kazi kwa unyoofu na kwa hiari kwenye mashamba na katika viwanda na hawakuwa tisho kwa utawala wa Kikomunisti.” Ripoti hiyo ilimalizia kwa kusema kwamba leo, imani na matendo ya Mashahidi wa Yehova “haihatarishi usalama na umoja wa nchi yoyote ile.”

Pata Kujua Mengi Zaidi

Kwa Nini Mashahidi wa Yehova Hawaendi Vitani?

Ulimwenguni pote, inajulikana kwamba Mashahidi wa Yehova hawaendi vitani. Soma uone ni kwa nini sisi huchukua msimamo huo.

Upendo Unatuchochea Kusaidia Majanga Yanapotokea

Katika nchi nyingi, Mashahidi wa Yehova wanatoa misaada wakati wa shida.