Marcosba budata 9:1-50
-
Jesús kirara awuaratotosi (1-13)
-
Kura abaudeba ãĩ buebu demoniota (14-29)
-
“Daizeze ũrũ injambuburu nekare joma oseabu” (23)
-
-
Jesúsba akuza jarabu iyi bei ũrũ (30-32)
-
Iyi kaidubemaranta anyirai bedeakapanu kaita audre yi zroma ũrũ (33-37)
-
“Embera abauta dayirã nejura ẽ buru, maunra dayirã arebu” (38-41)
-
Awurura kayirua obikirambuta (42-48)
-
“Tã kirankapanaindua akuza aduʼapanaindua manyirai” (49, 50)
9 Adewara jarasi: “Warinu kawuapanaindua unkuru maranebemambara bei naweda undudaita Daizezeba zokanumunta”.
2 Ewari 6 berabarida tea Jesúsbara edesi iyi kaidu Pedrota, Santiagota akuza Juanta katumaena, mamara anyi awapanasi, Jesús kirara anyi na awuaratotosi.
3 Iyi wuara mejancha unatotosi akuza totorroatotosi embera wua sugubariba wua biʼia sugubari audre.
4 Maune undutoposida Elíasta, Moisésta Jesúsbawara nemburabarabuta.
5 Aramaunta Pedroba Jesúsʼa jarasi: “Rabí, idi dai bu kaidu zeira yibiabasi, eajudadru carpa deta umbea, buita, Moisésʼita akuza Elíasʼita”.
6 Warinubaira jomaunta perabarabasi baera, Pedrobara kawua ẽ basi yi karensida oita.
7 Maunta jãrãrãta mejancha zesi anyi ũrũ, maune maun jãrãrãnemba bedeasi: “Naun mu Warra mua kangabura, urindua iyi bedeara”.
8 Audre ẽãne anya dakitaburudera mio neẽãnumasi Jesústru abapai edaunumasi.
9 Anyi katumanemba jenda urubaside Jesúsba anyaa jarasi mioa jarada ẽ bamarea anya undutabedara Embera Warra beidata jenda piradruyeda.
10 Anyara Jesúsba jarada kiranka osida mamina anyirai krinchasida karenta jarakirambasita Jesúsba jaraside beidata jenda piradruita.
11 Aramaunta anya Jesúsʼa widisida: “¿Karea Ley ũrũ jaradiapanurambara jarapanu Elíastru naara zeibasita?”.
12 Iya panusi: “Warinu maunra, Elíasta zeibara naara mawua joma jenda ara oita. Mamina, ¿karea Daizeze Bedeadera jarabu Embera Warrara mejancha zuburiaibarata akuza kangada ẽ baita?
13 Mamina mua maraa jaraya Elíasʼra warinu zesita akuza anya kangade zuburiabisida Daizeze Bedeade jarada kiranka”.
14 Anyi Jesús kaidubemarachuidu jũẽburude undusida maunra audubuta emberara mejancha akuza unkuru Ley ũrũ jaradiabariranta Jesús kaidupanurambawara bedeakabarabuta.
15 Emberaramba Jesús undusidade anyirai bia aku akudrutotosida mombe iyima wembasida saludaita.
16 Jesúsba anyaa widisi: “¿Kare ũrũ bedeakabarabu marara anyibawara?”.
17 Kabananumune embera abauba jarasi: “Noko, mua mu warrata nainu wesi demonioba bedeabibe ẽ bu baera.
18 Maumba wawabiburudera iyira egorode tabatotobu akuza i kopepeatotobu adewara kida katotobu maun awuara zarea neẽtotobu, mua bu kaidupanurainu wesi anya ãĩ buedamarea maun demoniota mamina ãĩ bueauda ẽ basi”.
19 Maune Jesúsba jarasi: “Idibema emberarambara injana ẽ, ¿kai sombebayeda marambawara bai mura? ¿Kai sombebayeda kãwũãnumai naunra? Muinu weidua wũãwũãra”.
20 Maunta iyidu wesida maun wũãwũãra, demonioba Jesús unduside wawabisi maun wũãwũãra mombe egorode taba wambisi akuza ikopepea burabaribisi.
21 Jesúsba yi zezea widisi: “¿Sombedauba kãwũãbu iyira?”. Yi zezeba jarasi: “Wiña yiruiduba
22 iyira demonioba tubude eitotobichu mawua ẽ buru doitotobichu beaita, mamina bua karebaseabuburu so borekea akura daira akuza karebara”.
23 Jesúsba iyaa jarasi: “¿Karea jaraku bua mua ‘bua karebaseabuburu’? Warinubaira Daizeze ũrũ injambuburu nekare joma oseabu”.
24 Aramaunta maun wũãwũã zezeba Jesúsʼa jarasi: “Muara injambu Daizeze ũrũ mamina karebara audre injainta”.
25 Jesúsba unduside emberara kabana anyima wemba uruta, demonio maun wũãwũã bedeabibe ẽ bua akuza urimbibe ẽ bua jarasi: “Ãĩ wara kaun wũãwũãnembara akuza wua iyide eda warara”.
26 Maun wũãwũãra mejancha jurada tea, demonioba mejancha wawabisi mombe maunra iyideba ãĩtotosi, maun wũãwũãra beida kiranka tabawasi maune emberara mejanchauba jarapanasi: “Beidogo kaun wũãwũãra”.
27 Mamina Jesúsba iyi juwama jida karampe piradrubisi aramaunta maun wũãwũãra piradrutotosi.
28 Tea Jesúsʼra iyi kaidubemarambawara embera deda jũẽsida, mama anyi awabude iyi kaidubemaramba widisida: “¿Karea ãĩ buebe ẽ basi daiba kaun demoniora?”.
29 Jesúsba anyaa jarasi: “Kãwũãchu demoniora, yiwidiburudeburu ãĩ wanchu”.
30 Tea anyira wansida mamaumba mombe Galilea are berabarisida mamina Jesúsbara miomba kawua ẽ mareabasi maunta,
31 iyi kaidubemara jaradianumasi baera iya jaranumasi: “Embera Warrara emberara jida diadayi akuza beadayi mamina maunta ewari umbea baburude jenda piradruyi”.
32 Maumba karenta jarakirankuta bia urina ẽ basimina perapanasi maun wididaita.
33 Maunta anyira Capernaúmʼinu jũẽsida. Dedaduanune Jesúsba anyaa widisi: “¿Marara kare ũrũ bedeakabarabasi odera?”.
34 Anyara kare jarada ẽ basi, odera anyirai bedeakabarabasi baera anyidebema kaita audre yi zroma ũrũ.
35 Aramaunta Jesúsʼra jewedasi mombe iyi 12 apóstoleranta trun karampe jarasi: “Maranebema abauta wuabemara na bakirambuburu jomaunra tea baibara akuza wuabemaramba jaraburudebaibara”.
36 Aramaunta Jesúsba wũãwũã zaketa truendasi mombe iyi kaidubemara enzadra kusi, mawue Jesúsba wũãwũã zake okiwa ũrũ kusi iyi juwata mombe jarasi:
37 “Embera naun wũãwũã zake kirankabuta mubari wara akuza maunta bia edadara munta bia edaburu kirankabu mamina bari maun awa ẽ, yi mu bia edaburubara mu zokadasida bia edabu”.
38 Juanba Jesúsʼa jarasi: “Noko, daiba undusi embera abauba bu trunemba demoniora ãĩ buebuta mamina iyira daidebema ẽ basi baera daiba jarasida oẽ marea”.
39 Mamina Jesúsba jarasi: “Iduaribidua embera abauba mu trunemba milagro obuburu maun emberara mu ũrũ imitia bedea ẽ bayi.
40 Embera abauta dayirã nejura ẽ buru, maunra dayirã arebu.
41 Mua warinu jaraya maraa, embera abauba maraa baniata diara Cristo kaidubemara baera maun emberambara nembiata unduya.
42 Embera naun wũãwũã kirankabuba iya injambuta iduaribira embera abauba aña obu karea, maun embera nekayirua obuitara audre bigabayi mongara zromata iyi ochidauma tajuna karampe pusa enzadra doi balbuedamarea.
43 ”Bu juwaba nekayiruata obikirambuburu tutara. Audre yibiabayi juwa aba neẽã zokai endruita, juwa joma erbude Gehenane* eibalbuedaibadabara.
44 --
45 Bu jirumba bua nekayiruata obikirambuburu tutara mombe jingara balbuera, audre yibiabayi jiru aba neẽã zokai endruita, jiru joma erbude Gehenane eibalbuedaibadabara.
46 --
47 Adewara bu dabuba nekayiruata obikirambuburu enda karampe jingara balbuera, audre bigabayi Daizezeba zokabude eda baita junsaba dabu neẽã bumina, dabu ume erbude Gehenane eibalbuedaibadabara,
48 mamara kira bei ẽ akuza tubura ewari jomaune purepurebari.
49 ”Daizezeba tubuta weyi emberara mawua panura ũrũ, embera abauba yiko ũrũ tã pobari kiranka.
50 Tãra yibia mamina yi kuyata neẽã dogoburu, ¿karemba jenda kuyabiseabu? Tã kirankapanaindua akuza aduʼapanaindua manyirai”.
Bed’ea biobʉbari
^ Nawedara Gehenane eibalbuepanasi basurara, mamina Jesúsba maun yizata zokasi jara urimbita embera jipa beita.
