Marcosba budata 6:1-56
6 Maun tea iyi chuadamaemba wansi iyi druaeda iyi kaidupanurambawara.
2 Sábado ewari zeside iyara judíora amba yi jurebarimae jaradia jundrusi, mawue emberara anyirai yiya aku akudrutotosida, mombe jarasida: “¿Sawua nekare mejancha kawuachu naun yumakerambara? akuza ¿kaiba diasi naun zareara kãwũã milagrora oita?
3 Carpintero warra naunra, María wũãwũã iyira, yi memberara Santiago, José, Judas akuza Simón, ¿maramambi? Dayirambawara namapanu iyi nawekaurãrã”. Anya maunta krinchasi baera maumba iduaribi ẽ basi Jesús ũrũ injainta.
4 Mamina Jesúsba jarasi: “Profetara jomaunmae bia edapanu mamina iyi druadera bia edada ẽ, mia iyi memberamba mia iyi deda”.
5 Mawue iyara milagrora oẽ basi mamara awuaraburu unkuru emberara kayabadaranta bebikuasi bari juwaba tombari buruba.
6 Iyara inja ẽ basi sawua anya Daizeze ũrũ injambuta undubida ẽ basita. Maun tea puwuruza jaradia wansi.
7 Jesúsba iyi 12 apóstoleranta amba juredasi akuza ume umeka zokasi mombe anyaa diasi zareata demoniora apanunta ãĩ buedamarea.
8 Adewara jarasi karenta ededa ẽ marea, awuaraburu bakuru taibabarita ededamarea, ede ẽ baibarabasi panta, bolsa nekare wuagabarita mia anyi kurru jumbaride ededa ẽ baibarasi platata.
9 Adewara jarasi sandaliatru ju wanamarea, maunemba wuara ededa ẽ marea akuza anya wua jumbutru ju wanamarea.
10 Adewara jarasi: “Mara embera deda jũẽburudera, maun deda baidua mara maun druadeba ãĩ wañiena.
11 Mamina de abaude maranta deibaribida ẽ buru mia urina ẽ buru jiru nĩãwẽ karampe waindua mamaumbara”.
12 Aramaunta anyira wansida akuza jaraka wansida emberara anya nekayirua obuta idubudamarea.
13 Ãĩ buepanasi demonioranta akuza kayabera mejanchauta aceiteba chiratupanasi akuza bebikuapanasi.
14 Maune noko Herodesba urinsi maun ũrũ, emberara mejanchauta Jesús ũrũ bedeapanasi baera akuza anya jarapanasi: “Juan buru koebari kaunra, beidata jenda piradrusi maumba milagrota onumu iya”.
15 Mamina unkuruba jarasida. “Elías kaunra”. Akuza unkuruba jarasida: “Profetara na bada kiranka profeta kaunra”.
16 Herodesba Jesús ũrũ bedea barabuta urinside jarasi: “¿Juanta, mua otutamarea zokadata? ¿Jenda piradrusika?”.
17 Herodesba Juanʼra cárcelde eda ibalbuesi yi membea Filipo kima Herodíasba mawua widisi baera, Herodesʼra Herodíasme juwa jidasibasi.
18 Maunera Juanba Herodesʼa badua jaranumasi: “Bu membea kimaumera juwa jidabe ẽ bura”
19 Maumba Herodiasʼra mejancha kĩrũbasi iyiume akuza beakirambasimina beabe ẽ basi.
20 Herodesba Juanʼra wawiabasi baera, Herodesbara kawuabasi Juanʼra kerempabuta akuza kare kayirua neẽã buta adewara akubasi neida berabari ẽ marea. Iya Juanba jarabuta urimburudera kare oisida kawua ẽ totobasi, mawuasidu urinkirambasi.
21 Mamina Herodíasba Juan beai ewarira zesi, Herodesba iyi cumpleañoita yikota osi, mama trunsi nokora gobiernoita trajaburanta, gorogorora nokoranta akuza emberara Galileade audre undukaudeta.
22 Maune zesi Herodías kauta mombe bairasi, Herodesta akuza iyi kawapananara mejancha sobiasida maun karea. Maumba nokoba jarasi maun wueraa: “Widira bua kangata, bua widiburuta diayi mua”.
23 Daizeze na jarasi: “Bua widiburudebema baduta diayi mua, mua zokabudebemasida enzadra”.
24 Mamaumba ãĩ wa karampe widisi yi papaa: “¿Karenta widi muara?”. Aramaunta yi papaba jarasi: “Juan buru koebari buruta”.
25 Maunta audre ẽãne maun embera wuera noko chuidu wembatoto karampe jarasi: “Muara atia kangabu muaa diadamarea platode Juan buru koebari buruta”.
26 Herodesʼra maumba mejancha sopuasi mamina iya oibarabasi baera iya warinu oya adata akuza jomauramba akubarabasi baera kare jara ẽã osi.
27 Aramaunta nokobara meserabai jarasi iyi gorogorora abaudebema Juan buruta wemarea. Aramaunta gorogorobara cárcelde otutasida,
28 akuza Juan burura platode we karampe maun wuera diasi, maune maun wueramba yi papa diasi.
29 Juan kaidupanuramba maun kawuasidade, eda jũẽsida iyi kakuara mombe wuagasida.
30 Apóstolerãrã Jesús kawa zeda karampe joma nemburasida anya kare odata akuza jaradiadata.
31 Jesúsba jarasi anyaa: “Zeidua mu kaidu, wandru mio neẽ numumae mawua wika enaunamarea”. Maunera emberarãrã wampe zenumasi akuza anyira ewari neẽ basi nekoisida.
32 Maun karea anyira jambade barida karampe wansida mio neẽ numumae anyi awaduanainta.
33 Mamina emberara mejanchauba undubuesida anyi wanta akuza mejanchauba urinsida maunta, maun karea emberara puwuru biodebemanta meserabai wansida jirune akuza anyi na jũẽsida.
34 Jambadeba drua wana tea, undusi emberara kabananumunta mombe anyi karea so borekeasi akubasi baera ovejara kaiba akui neẽã panura kiranka. Maune nekare mejancha jaradia jundrusi.
35 Ewarira kiubusi baera, Jesús kaidupanurãrã iyidu jũẽna karampe jarasida: “Jingaduanu dayirãrã akuza kiubusi ewarira.
36 Anyaa jarada emberarainu wanamarea akuza puwurura arakaitabuidu, mawua anyi ne eda kodamarea”.
37 Maune Jesúsba jarasi anyaa: “Maramba yiko diaidua anyaa”. Aramaunta anya panusi: “¿Buara kangabuka daibara naun kabanainta panta eda wamarea? Mauintara platara mejancha nesidayi, 200 moneda”.*
38 Jesúsba widisi: “¿Sombe pan erpanu marambara? Aku waindua maunta”. Anya maun akuda tea jarasida: “5 pan erpanu, maun awuara bedata ume”.
39 Jesúsba emberara jomaua jarasi amba ambaka jewedadamarea chirua ũrũ.
40 Mawue jewedasida 100 100ka akuza 50 50ka.
41 Maunʼare pan 5 buta jiraeda karampe akuza bedara umebuta jiraeda karampe, unta aku karampe yiwidisi. Mombeburu panʼra buekua karampe iyi kaidupanura diasi, anya emberara dedekamarea akuza bedasida iyaba buekua karampe jomaunra dedekasi.
42 Mawuera jomaunta nekosida akuza jomaunta jãwuasida.
43 Tea, ẽ zake 12 jurepesida panta akuza bedata.
44 Jomaune 5 mil yumakerara nekosida.
45 Aramaunta Jesúsba iyi kaidupanurãrã jambade baribigasi, mawua kirara Betsaidaeda wanamarea iya emberara wamarea jarabueda.
46 Iya emberara deda zokakuada tea katumainu wansi yiwidita.
47 Ewari kiuda tea jambara pusa enzadra basi mamina Jesúsʼra drua chuasi iyi doba.
48 Aramaunta iya undusi iyi kaidupanurainta jipa zarebasita dowiguita puandruta mejanchanumasi baera. Diapeda waidi paringuanumune Jesúsʼra pusa ũrũ taiba wasi anyima, mamina iyara krinchabasi anyi na wainta.
49 Iyi kaidupanuramba undusidade do ũrũ busita jarasida: “¿Karenta kãwũãchu kaunra?”. Mombe jurasida
50 jomaumba undusida baera akuza perasida, aramaunta iyara meserabai jarasi: “Muane, peraraindua”.
51 Jesúsʼra anyibawara barisi jambade akuza puandrura pikitotosi. Maun unduburude, inja ẽã akubarabasi anyara.
52 Bia urina ẽ basi baera Jesúsba pan dedekadadeba karenta jarakirambasita, maumba zarebasi joma bia urinta.
53 Anya pusa kirambarida tea, jũẽsida Genesaret druaidu akuza maun kawa amaesida jambara.
54 Mamina anyi jambadeba drua wana tea emberarambara undukawuaedasida Jesúsʼra.
55 Anyira wembasida emberara maun puwurudebema jarakaita akuza emberara kayaberanta camillade edepanasi. Jesús samachu kawuai mainu wampanasi.
56 Iyi puwuru zakeidu jũẽburudera mawua ẽ buru puwuru zromainu jũẽburudera mawua ẽ buru awuru druaidu jũẽburudera emberarambara kayaberãrã plazaidu edepanasi mombe zuburia widipanasi iyi wuata wikabida tombaribimarea, iyi wua tombaribururãrã betotopanasi.
Bed’ea biobʉbari
^ Lit. “200 denarios”.
