Marcosba budata 13:1-37
13 Jesús templodeba ãĩ wanta taide, iyi kaidupanuranebema abauba jarasi: “Noko, kareamba biʼia oedaunumu naun templora, mongara biʼiachuramba oedaunumu”.
2 Mamina Jesúsba iyaa jarasi: “Kaun templo bua akukura joma ãrĩ wañi, joma teguezoa wañi nekare namanumura”.
3 Iyi Olivo katumainu jũẽside temploma aku jewedabasi, maune Pedroba, Santiagoba, Juanba akuza Andrésba, anya awauba orra karampe widisida:
4 “Daia jarada, ¿sombede berabari bua jaradara? akuza ¿karenta berabari naun druade nekare berabarinumu joma jomburudera?”.
5 Jesúsba jarasi: “Jurakawua panaindua yãrã yi sewabi ẽ baita.
6 Emberara mejanchauta zeyi mu trun zokapanunta, anya jarayi: ‘Cristo mura’, mombe embera mejanchauta sewakuadayi.
7 Maramba urimbudade drua awuara awuaraka yõbarabuta peraraindua, za mua jaratabera warinu berabariyi, mamina nekare berabarinumu joma joira wabida araba ẽ.
8 ”Emberara anyirai yõbarabayi, nokorasi anyirai yõbarabayi, drua ureta badumaebayi akuza bayi jarrabata. Naunra bedea zromara bari mamapai ẽ bayi awuaraburu audre zeyi zuburiara.
9 ”Jurakawuapanaindua marara, marara juez na ededayi akuza judíora amba yi jurebarimae* podayi. Marara mu karea gobernadorera na ajuerzade ededayi akuza nokora na, maunemba Daizeze ũrũ jaradiaseabayi marambara anyaa.
10 Adewara na bedea bia Daizezeba zokai ũrũ jaradiadayi naun drua jomaune.
11 Mamina juez na edebudadera krincha oraindua kare jarai karea, maun ewaridera Daizeze jaure zareaba mara kirambebiburuta jaraidua, maranta bedea ẽ bai baera awuaraburu Daizeze jaure zareaba karebayi bedeaita.
12 Adewara yi membeabara ariwia beayi yi membeara, yi zezebida yi warrata, adewara yi wũãwũãrambara yibarirãrã juradai baera beabidayi.
13 Emberarambara marara juradayi mu karea, mamina maun joma joñena awuantaburura endruyi.
14 ”Kombeburu marambara unduyi iyi baibara ẽ mae piradru edaunumunta nekare daya igarachuta akuza nemarikuachuta (yi naun leburubara biʼia krinchaibara karenta jarakirankuta). Maun berabarinumu undubudade, yi Judeade panurãrã waindua katumaena.
15 Embera abauta untrebuburu,* uda zerara nekare edeita dedauba,
16 embera abauta meabuburu, biga bayi iyi wua jurepeda wa ẽ baita deda.
17 Kareamba zuburiai maun ewadera biogo panurãrã akuza wũãwũã judebema erpanurãrã.
18 Badua yiwididua, mara miru wai ewaride, kue ewaride wana ẽ baita.
19 Maun ewaridera mejancha zuburiadayi. Daizezeba naun drua parãnanemba unta, zuburiara unduzeburu mamina maun ewaride zuburiada kirankara wuara zuburiada ẽ bayi akuza maunra wua unduda ẽ bayi.
20 Mia abau emberanta endru ẽ bayi Jeowaba maun ewarita mesera jobi ẽ buru, mamina Daizezebara maun ewarira mesera jombiyi iya jidakuada karea.
21 ”Mawue emberaramba maraa jaradara: ‘Zachu Cristora’ mawua ẽ buru jaradara: ‘Jariduchu Cristora’, injaraindua maunra.
22 Zei baera emberara Cristo apanunta akuza profetara apanunta, maunrambara milagrora mejancha oyi akuza nekare zromata emberara sewakuaita akuza sewakiranañi Daizezeba jidakuadaransida.
23 Jurakawuapanaindua, kãwũã weda jaraku mua maraa.
24 ”Maun ewaride, emberara mejancha zuburianumana tea, aramaunta bisiara paringua totoyi, jedekora una ẽ bayi,
25 chindaurãrã jurzuayi bajãnemba, nekare joma untunumura ure urenumubariyi.
26 Mawue jãrãrã ũrũ undudayi Embera Warrara mejancha zareabara uruta akuza Noko kiranka.
27 Iyara ángelerãrã zokakuayi akuza iya jurukuadara naun drua jomaunebuta amba juredayi.
28 ”Naun yizata jarayi mua, naunemba kawuadamarea. Higuera bakuru pononumunera akuza yi kidua pawaranumunera, marambara kawuapanu poagara arakaitabata.
29 Abarika marambida maun joma berabarinumunta undui, kawuapanaindua Embera Warrara kaitabasita.
30 Mua joma za jaraku bedeara aripe berabariyi idibema emberara bei ẽ weda.
31 Mu bedeara ewari jomaune bayi, bajãta druaume neẽã waimina.
32 ”Maun ewari sombede zeira mia kaiba kawuada ẽ, mia ángeleramba, mia mu yi Warraba kawua ẽ, awuaraburu mu Zezeburu kawuabu.
33 Dau kawuapanaindua akuza uruma panaindua, marambara kawua ẽ baera sombede berabaribita Daizezebara maunra.
34 Abarika yumakera drua jampe wana kiranka, iyi deta akumarea amaesi iyi nezokara. Adewara anyi aba abakaua nekarenta omarea amaesi akuza jarasi yi puertadebua ewari jomaune dau kawuabamarea.
35 Maun karea urumapanaindua, marambara kawua ẽ baera de yibarira sombede zeita, kewara, diamasi ewari enzadra, unandrubuside mawua ẽ buru diapeda,
36 mawua atiaude iyi zeburude mara kãĩgenumunta undu ze ẽ marea.
37 Mua maraa jarakura wuabemarambida jaraku: urumapanaindua ewari jomaune”.
