Marcosba budata 10:1-52
-
Juwa jidadata akuza idubuita (1-12)
-
Jesústa wũãwũãrambari yiwidisi (13-16)
-
Embera mejancha nembia erbuba Jesúsʼa bedeata widisi (17-25)
-
Mejancha zarea oibara Daizezeba zokabude eda baira (26-31)
-
Jesúsba akuza jarabu iyi bei ũrũ (32-34)
-
Santiagoba akuza Juanʼumemba widisida Jesús kawa jewedaita iya zokaburude (35-45)
-
Jesúsba mejanchauta endrubisi iyi bebudeba (45)
-
-
Yumakera dauberreabuta bebibu Jesúsba maun trunra Bartimeo (46-52)
10 Tea mamaumba wansi mombe Jordán kirambari karampe jũẽsi Judea kawa, maune akuza emberara iyi kawa mejancha zesi. Aramaunta Jesúsbara iya obada kiranka jaradia jundrusi.
2 Maune fariseoranta zesida Jesúsʼidu, anya kiriña bedeata widisida Jesúsba aña panumarea, maune widisida yumakerambara carta yi idubusi abarita diaseabu kawuaita yi kimaa.
3 Iya jarasi: “¿Karenta omarea jarasi Moisésbara?”.
4 Anya jarasi: “Moisésba jarasi yumakerambara carta yi idubusi abarita diaseabuta yi kimaa, mombe wamarea jaraseabasita”.
5 Jesúsba anyaa jarasi: “Moisésbara, maunta iduaribisi kãwũã maramba urinkirande ẽ baera.
6 Mamina Daizezeba emberara parãsidera naara ‘parãsi yumakeranta yuwueraume’
7 ‘maun karea yumakerara wañi yibarira maembara,
8 akuza anyira abapaibu kirankabayi’, mawua umepana ẽ bayi awuaraburu abapaibu kirankabayi.
9 Maun karea Daizezeba ambababisiburu, mia abau emberamba yi idububi ẽ baibara”.
10 Anyi embera deda duanaside, iyi kaidupanuramba widisida maun bedea ũrũ.
11 Jesúsba jarasi: “Yumakeramba yi kimaa carta yi idubusi abarita diara akuza awurume juwa jidara, maun emberara yi kima naambemanemba ãĩbabu.
12 Akuza yuwueramba yi kimanta idubura akuza awurume juwa jidara, maun yuwuerasida ãĩbadogo yi kimanemba”.
13 Maune emberaramba anyi wũãwũãranta wesida Jesúsʼidu, iyi juwaba tombarimarea, mamina Jesús kaidupanurambara keansida anyira.
14 Jesúsba mawua odaira kanga ẽ basi, mombe jarasi: “Iduaribidua wũãwũãrãrã, idu zebidua anyira muinu, wũãwũãra kiranka panurantru panai baera Daizezeba zokaburudera.
15 Wũãwũãrane kiranka injaindua Daizezeba zokai ũrũ, mawua odara Daizezeba zokaburude edabayi”.
16 Wũãwũãrãrã iya buraeda karampe yiwidisi anyi bia wamarea.
17 Ode wane, yumakera aba Jesúsʼidu wemba degue karampe sankokode kuba wansi, mombe jarasi: “Muita bura noko bia, ¿kare nembiata oibara mu ewari jomaune baira?”.
18 Jesúsba jarasi: “¿Karea embera bia abu bua mura? Neẽ kai embera biara, Daizezetru abapai embera bia.
19 Buara kawuabu Leyba kare jarabura: “Mia bearara, ãĩbarara, nezrugarara, yãrã ũrũ sewanemburuta jararara, yãrãta sewarara nekare erbai karea, wawiara bu zezera, wawiara bu papara”.
20 Aramaunta yumakeramba jarasi: “Noko, warrara wedauba mua joma ozeburu maunra”.
21 Jesúsba so borekea aku karampe soiduba jarasi: “Nekare aba oita waembu bura, nendora bua erbuta akuza diara platara pobrera, mawuantru nembiata erbayi bua untura, tea ze karampe mu kaidubara”.
22 Maun yumakeramba maun uri, bia ẽã toto karampe wansi, iya mejancha erbasi baera nembiata.
23 Jesúsba iyi kawapanuranta aku karampe, iyi kaidupanura jarasi: “Embera plata mejancha erburaintara, mejancha zarebayi Daizezeba zokabude eda baira”.
24 Mamina iyi kaidupanurãrã maun bedeaba krincha oamaesi, aramaune Jesúsba jarasi: “Warrara, kareamba zare Daizezeba zokaburude eda baira.
25 Iyi camellosida berabariseabukira aguja zobeade, embera mejancha platabarabuta Daizezeba zokabude eda wainʼra”.
26 Maun bedea urinsidade yiya aku akudrutotosida, mombe jarasida: “¿Kaita ewari jomaune bai mawuara?”.
27 Jesúsba iyi kaidupanurãrã kirankita aku karampe jarasi: “Yi beibariraintara zare maunra, mamina Daizeitara neẽ kare zareabura. Daizezebara joma oseabu baera”.
28 Mawue Pedroba panusi: “Daibara ne joma idubusida bu kaidubaita”.
29 Jesúsba jarasi: “Embera abauba iyi deta idubura, yi memberanta, yibariranta, wũãwũãranta mawua ẽ buru druata mu karea akuza bedea bia karea,
30 idi ewade iyira pewanaimina 100 vece audre unduyi deta, memberanta, yibariranta, wũãwũãranta akuza ura zeide ewari jomaunebayi.
31 Mamina idi yi zroma kiranka panurãrã tea juneainu beyi akuza yi kare ẽ kiranka panurãrã naara panañi”.
32 Anyi joma Jerusalén puwurueda wanze wane, Jesúsra iyi kaidupanura na wanze wambasi, iyi kaidupanuramba krincha wambasi Jesúsba kare oita, mamina wuabemarãrã perasida neida berabari karea. Maune iyi 12 apóstoleranta amba jure eda karampe jenda kirambebisi karenta berabarita aradara ẽãne.
33 Naunta jarasi: “Dayirãrã Jerusalénʼena wanze wa, mama Embera Warrara diadayi sacerdotera nokoa akuza Ley ũrũ jaradiabarira. Mama jaradayi beadamarea akuza emberara awuru puwurudebema jida diadayi.
34 Ipidadayi anyira iyi karea, dau idudayi, ubeadayi akuza beadayi mamina ewari umbea baburude jenda piradruyi”.
35 Zebedeo warrara Santiagoba akuza Juanba, Jesústa orrada karampe jarasida: “Noko, daibara kangabu bua daiba widiburuta omarea”.
36 Mawue iya widisi: “¿Karenta omarea kangabu marambara mara karea?”.
37 Anya panusida: “Daita bua zokaburude bu kawa jewedabira, aba juwa arare, aba juwa ankare”.
38 Jesúsba panusi: “¿Kawuakupanuka marambara karenta widikura? ¿Marambara doseapanuka mua kopa donumura akuza zuburiaseapanuka mu zuburiabu kiranka?”.*
39 Anya jarasida: “Oseapanu”, aramaunta Jesúsba jarasi: “Marambara doyi mua kopa donumura akuza zuburiadayi mu zuburianumu kiranka.
40 Mamina mu ẽ yi jaraira kaita mu juwa arare jewedaita mawua ẽ buru mu juwa ankare. Yi mama jewedairãrã mu Zezeburu jurusi mama jewedamarea”.
41 Yi wuabemara Jesús kaidu 10 panuramba maun bedea uri kawuasidade mejancha kĩrũsida Santiago ũrũ akuza Juan ũrũ.
42 Mamina Jesúsba anyi joma amba jureda karampe anyaa jarasi: “Maramba kawuapanu nokora naun druadebemarambara emberarãrã anya kangade obuta akuza embera wuabemara zokaseabubara anya kangade zokaseabuta emberara.
43 Mamina manyiraira mawua duana ẽ baibara, awuaraburu maranta yi zroma bakirambuburu odaibara wuabemaramba jarabuta
44 akuza maranebemanta naara bakirambuburu jomaura nezoka baibara.
45 Mia embera Warrara ze ẽ basi iyita akudamarea awuaraburu wuabemara akueda zesi mawua emberara mejanchauta endrubita iyi bebudeba”.
46 Anyira Jericóeda jũẽsi. Jesústa akuza iyi kaidupanuranta Jericódeba ãĩ wansidade emberara mejanchabubawara, embera aba jewedabasi ode dauberreabuta, maunra Bartimeobasi (Timeo wũãwũãbasi), iyira ode plata widibasi akuza nekarenta.
47 Bartimeoba urinside Jesús Nazaretdebema iyi kawa berabari wanta, jura jundrusi: “David Warra, Jesús, so borekea akura mura”.
48 Maun karea emberaramba keansida iyira, mombe jarasida chupeamarea mamina iyi chupeaikaude audre jurasi: “David Warra, so borekea akura mura”.
49 Maun karea Jesúsra piki edaumumatotosi mombe anyaa jarasi: “Jaraidua zemarea”. Anya dauberreabua jarasi: “Krincha orara, iya trunku bura”.
50 Iya wua ũrũ jumbadata weinta karampe, mesera piradrutotosi mombe wansi Jesúsʼidu.
51 Aramaunta Jesúsba widisi: “¿Karenta omarea kangabu buara bu karea?”. Dauberreabuba panusi: “Rabbóni,* karebara mua jenda unduita”.
52 Akuza Jesúsba jarasi: “Bua warinu Daizeze ũrũ injambuta undubisi baera bedogo bura, wara”. Aramaunta maun yumakerambara jenda undutotosi akuza Jesús kaidu wansi emberarabubawara.
