Marcosba budata 7:1-37
7 Maune fariseoranta akuza unkuru Ley ũrũ jaradiabariranta zesida Jerusalénemba, mombe Jesústa orrasida.
2 Undusida unkuru iyi kaidupanurãrã nekobarabuta, mamina anyimara juwa sugu ẽã nekobarabasi.
3 (Fariseorãrã akuza judíorãrã juwa sugupanasi juwa ambidarraidu maunta mawua opanasi nawedabemaramba opanana kiranka opanasi baera.
4 Akuza anyi mercadodebadata jenda zeburudera juwa sugu ẽãra nekoda ẽ basi, anyara naweda pananaramba obada daucha opanasi nekare mejancha, maun karea copara, jarrara akuza kuguru cobre omara zokai naara baniane joaedapanasi).
5 Maun karea fariseoramba akuza Ley ũrũ jaradiabariramba widisida: “¿Karea bu kaidupanurambara oda ẽ naweda pananaramba obada kiranka? Daimara anyira juwa sugu ẽ basi nekoi nawedara”.
6 Jesúsba anyaa jarasi: “Sewata nebia opanu kirankapanu marara, maun karea Isaíasba naunta jarabarisi: ‘Naun puwurubara mura iawauba ibia jarapanu mamina warinubaira anyara mura soiduba kangada ẽ.
7 Maumba maramba embera krinchata jaradiapanumburu, mawuara zeri ẽ marara mua yiwidibara baira’.
8 Marambara Daizezeba omarea zokabuta oi kaude, emberara naweda pananaramba obada kiranka opanu”.
9 Akuza jarasi: “Jipa krincha jurukau marara, mara naa badaramba opanana idubuda ẽ baita, mawua Daizezeba zokabu oda ẽ baya.
10 Bari jaraita, Moisésba jarasi: ‘Wawiara bu zezera wawiara bu papara’ akuza ‘Embera abauba yi zeze ũrũ mawua ẽ buru yi papa ũrũ imitia bedeara beadaibara maun emberara’.
11 Mamina maramba jarapanu: ‘Baduba yi zezea mawua ẽ buru yi papa naunta jaraseabu: “Mua nekare bu karebaita erbadara Daizezea diaita erbu”’.
12 Maunta oi maramba iduaribipanu maun emberamba warinu nekare oẽ marea iyi yibarirambari.
13 Marambara nawedabadaramba obadata jaradiapanu wuabemara mawua Daizeze Bedeaba jarabuta oda ẽ baita adewara nekare mejancha opanu maun kirankabuta”.
14 Aramaunta Jesúsba emberara kabananumua jarasi iyi kawa zedamarea mombe jarasi: “Mara jomaumba urindua mua jaradianumumba karenta jarakirambuta.
15 Daizeze dabu naara emberara iya kare kochuba mitiachu ẽ, awuaraburu Daizezemara emberara mitiachu nekayirua iyi sodeba zebuba”.
16 --
17 Jesús embera kabananumumaemba wana teara, embera abau deda jũẽsi mama iyi kaidubemaramba widisida, iya yiza jaradiada ũrũ.
18 Iya anyaa panusi: “¿Marambida uriauda ẽka maunra? ¿Marambara kawuada ẽka Daizeze naara emberamba kobura mitiachu ẽãta?
19 Maunra embera soidu ze ẽ awuaraburu iyi biteda zebu mombe mamaumba ãĩ wambu”. Maunemba Jesúsba undubisi badu yikota neneẽã buta.
20 Adewara jarasi: “Emberara mitiachu nekayirua iyi sodeba zebuba.
21 Embera sodeba zebu krincha mitiara: Daizezeba kanga ẽãne mia erkainta,* nezrugaita, mia beaita,
22 ãĩbaita, erbude audre erbakirambaita, nekayirua oita, sewaita, wawia neẽã nekayirua oita, envidiata, awuru ũrũ ikayirua bedeaita, wuabemara kare ẽ kiranka akuita akuza bia krincha ẽ baita.
23 Joma maunra nekayiruara iyi sodeba zebu, maumba iyira mitiachu Daizeze naara”.
24 Mamaumba ãĩ wana tea wansi Tiroeda akuza Sidón druaeda. Iyi mamachuta kawuada ẽ marea embera deda wansi mamina bariarabasi.
25 Jesús mainu jũẽburude embera wuera yi kau demonioba wawabuba urinsi iyi ũrũ, aramaunta ze karampe iyi na sankokode kuba wansi.
26 Maun embera wuerara Feniciadebemabasi, maun druara Siriadebasi, yi memberara griegorambasi, iya Jesúsʼa widida ũrũ widisi yi kauba demonio abura ãĩ buemarea.
27 Mamina Jesúsba jarasi: “Iduaribibara naara wũãwũãranta jãwuanamarea biga ẽ baera wũãwũãra pan diaibadara usa zakera diaita”.
28 Aramaunta naun wueramba jarasi: “Warinu maunra noko, mamina usa zakerambida mesa edrera kopanu wũãwũãramba jurzoabidata”.
29 Aramaunta Jesúsba jarasi: “Krincha orara, wara. Bua mawua jaraburudeba bu kauba demonio abadara ãĩdogo”.
30 Aramaunta iyira deda wansi, deidu jũẽburude undusi iyi kau zakera camane baikiruta akuza iya demonio abadara neẽ basita.
31 Tea Jesúsʼra Tirodeba Sidón are wansi jenda pusa Galileaeda wainta akuza Decápolisʼeda.
32 Maune wesida yumakera kuwuruba uri ẽãbuta adewara bia bedea be ẽãbuta mombe zuburia widisida Jesúsʼa maun emberanta tombarimarea.
33 Jesúsbara maun emberara kabananumunemba jinga edesi mombe iyi juwaba tombarisi maun embera kuwuruta akuza iduda tea tombarisi maun kiramenta.
34 Unta aku karampe uñabatasi mombe jarasi “Éffatha” naumbara jarakirambasi “Ewara”.
35 Aramaunta iyara biʼia urintotosi akuza iyi bia bedeabe ẽ badara biʼia bedeatotosi.
36 Maune Jesúsba emberara jarasi maunta mia kaia jarakada ẽ marea mamina emberarambara wuaburu jarakasida, iya jarada ũrũ jarasimina maunta oda ẽ marea.
37 Mawue emberara anyirai yiya aku akudrutotosida akuza jarasida: “Iyara joma bia obu, uri ẽã burãrã urimbibu, bedeabe ẽã burãrã bedeabibu”.
Bed’ea biobʉbari
^ Griegode pornéia. Akura glosariota.
