Marcosba budata 14:1-72
-
Sacerdoteramba beakirampanu Jesústa (1, 2)
-
Yuwuera abauba aceite tuampuabuta Jesús buru ũrũ weabu (3-9)
-
Judasba sewasi Jesúsʼra (10, 11)
-
Última Pascua odata (12-21)
-
Jesúsba diamasi yiko ozokadata (22-26)
-
Jesúsba jarasi Pedroba jaraita iyira undukata (27-31)
-
Getsemaníne yiwidibu (32-42)
-
Jesúsʼra jidasida (43-52)
-
Sanedríne kawua osida (53-65)
-
Pedroba jarasi Jesúsʼra undukata (66-72)
14 Kombeburu ewari umbea waenumasi Pascua odaita akuza Pan Yi Waribibari Neẽãbu Fiesta odaita, maunta sacerdoteranta akuza Ley ũrũ jaradiabariranta bedea abarika zesida Jesús sawua sewadai ũrũ.
2 Anya jarasida: “Fiesta ewaridera obe ẽ dayirambara, emberara mejanchauta bugadrudai baera”.
3 Jesús Betaniane baside, Simón lepraba kayabu deda nekonumasi, maune embera wueranta zesi aceite tuampuabu abuta, iyara maunʼra kuguru zake omane abasi, maun aceitera mejancha valebasi akuza iyiawakirasi, iya maura ewa karampe Jesús buru ũrũ weasi.
4 Unkuru Jesús kaidubemaramba maun undui anyirai mawuasida: “¿Karea kãwũã ewarade ãrĩburu iyara kaun aceitera?
5 Naun aceite tuampuabura 300 denario monedabari nendokasida mombeburu yi platara diakasida pobrera”. Mawue anyira mejancha kĩrũsida maun embera wuera ũrũ.
6 Mamina Jesúsba anyaa jarasi: “Iduaribidua iyira, ¿karea maunta jarabarabu marambara? Naun yuwuerambara mubari nekare biata osiburu.
7 Marambara pobrerãrã ewari jomaune mara kawa erbayi akuza badu ewaride karebaseapanu, mamina mura ewari jomaune marambawara ba ẽ bayi.
8 Naun wuerambara oburu iya oseabuta, mu ũrũ aceite tuampuabuta weasi mu bei ewari karea.
9 Naun drua jomaumae jaradiadayi bedea biara, maunebida jaradayi naun wueramba oda ũrũ, mawua kirambedayi iyi ũrũ”.
10 Judas Iscarioteba 12 apóstoleranebemamba aku wansi sacerdotera nokoranta mawua Jesús anyaa jida diaita.
11 Judasba anyaa mawuai anyira mejancha sobiasida mombe jarasida plata diadaita maunemba unta iya krincha jundrusi sombede jida diaita Jesúsʼra anyaa.
12 Pan Yi Waribibari Neẽãbu Fiesta ojundruside akuza sacrificio opanaside Pascua ewaride, Jesús kaidupanuramba widisida iyaa: “¿Buara Pascuara sama omarea kangabu?”.
13 Mawue Jesúsba iyi kaidupanuranebema umenta zokasi, anyaa jarasi: “Waindua puwurueda, maramba unduyi emberamba kugurude bania abuta waindua maun kaidu marara.
14 Iyi dei jũẽburumae eda waindua mombe de yibaria jaraidua: ‘Nokoba jarasi: “¿Samachu cuartora, mawua munta akuza mu kaidupanurambawara Pascua ewari zeburude mama nekoita?”’.
15 Iya maun deda untre undubiyi cuarto zromata dayiramba zokadamarea. Mama oidua dayirainta yiko Pascuade kobadata”.
16 Iyi kaidupanurara wansi puwurueda akuza Jesúsba jarada kiranka aripe undusida, mombe nekare joma osida Pascua ewarita.
17 Ewari kiuda tea iyira iyi 12 apóstolerabawara jũẽsi.
18 Anyi jeweda nekobarabueda, Jesúsba jarasi: “Maranebema abauba mura mu nejurara jida diayi, maunʼra mume nama nekobu”.
19 Anyira mejancha sopuasida mombe aba abakauba jarasida: “Noko, mu ẽ bumambi”.
20 Jesúsba jarasi: “12 panuranebema abauta iyi, naun plato jogoade mume juwa buebuta.
21 Embera Warrara beiyi Daizeze Bedeade maunta jarabu baera, mamina kareamba zuburiai Embera Warra iyi nejurara jida diadara, maun emberara bigabakasi toda ẽ basiburu”.
22 Anyi nekobarabude Jesúsba panta jiraedasi mombe yiwidisi, maun tea pan buekua karampe anyaa dedekasi, mombe jarasi: “Koidua, naumba mu kakuata jarakirambu”.
23 Maun tea vino copadebuta jiraeda karampe yiwidisi adewara anyaa dedekasi, jomaumba dosi maura,
24 akuza jarasi: “Naumba mu wata jarakirambu, ‘naun waba bedea abarika zebisi’ Daizezeta iya jurukuadarambawara akuza emberara mejanchauta karebayi, maunemba yi kayirua odapeadarãrã perdonanañi.
25 Mua warinu jarayi, mua naun vino idi dodara wua do ẽ bayi, vino yiwidi doyeda mu Zezeba zokaburu ewaride”.
26 Maun tea Daizezea transida, mombe wansida Olivo katumainu.
27 Maune Jesúsba jarasi: “Marambara nei aña odayi, Daizezeba iyi Bedeade jarabu baera: ‘Poyi muara yi oveja akubarira akuza yi ovejarãrã jaranzoadayi’.
28 Mamina mu jenda piradruda tea mara na wañi Galileaeda”.
29 Pedroba jarasi: “Wuabemaramba aña odaimina, mura bume kerempabayi”.
30 Aramaunta Jesúsba jarasi: “Nane diamasi eterre 2 veces berui na, 3 veces jarayi bua mura undukata”.
31 Mamina iya Jesúsʼa badua jaranumasi: “Mu bume beibaramina, muara jara ẽ bayi bura undukata”. Wuabemara Jesús kaidupanurambida iyaba jarasida.
32 Tea Jesúsʼra iyi kaidupanubawara jũẽsi Getsemanínu, mama iyi kaidupanura jarasi: “Mura yiwidi wañi, nama jeweda jũãĩdua”.
33 Akuza edesi iyi kaidu Pedrota, Santiagota akuza Juanta. Maune Jesúsʼra mejancha sopua sentitotosi adewara mejancha krincha zroma ototosi.
34 Iya jarasi: “Mura mejancha krincha zroma oku, maumba bei kiranka sentiku. Nama piki jũãĩdua akuza uruma panaindua”.
35 Tea anyideba jingatotosi mombe sankokode barrukuba wa karampe Daizezea widisi iya oseabuburu maune berabaribi ẽ marea.
36 Jarasi: “Zeze* buara joma oseabu, munemba ãĩbuera naun copata mamina bua kangabutru berabaribira mua kangabuta berabaribi kaude”.
37 Tea iyi anyidu jũẽside undu jũẽsi anyira kãĩguebarabuta, maune Pedroa widisi: “¿Simón bura kãĩsika? ¿Hora ababayedabida urumababe ẽ basika?
38 Urumapanaindua akuza badua yiwidipanaindua nekayirua yi edebi ẽ baita. Warinu, mara krinchadera okirambu mamina mara kakuara zarea neẽãbu maun oira”.
39 Akuza jenda wa karampe iyabau ũrũ yiwidisi.
40 Iyi jenda zeburude undusi anyira dapeabarabu baera kãĩtotobarabasita. Mamina anyara yi kare jaraisida kawuada ẽ basi.
41 Iyira yi 3 vecesta ze karampe anyaa jarasi: “¿Marara aduʼa kãĩguepanuka kare berabari ẽ kiranka? Kãĩraindua wua, urinkuanaindua, Embera Warra embera kayiruara jida diadaira arakaitaba.
42 Piradruidua, wandru, mu jidadiai emberara arakaitaba”.
43 Maune iyi waidi bedeanumuena zesi Judasta 12 apóstoleranebemanta, iyi kaidu zesida emberaranta mejancha, maunrambara kuchota akuza garroteta apanasi, anyira sacerdote nokoramba, Ley ũrũ jaradiabariramba akuza zoraramba zokasi.
44 Judasba anyaa jarasi iya karenta oita, mawua kawuadamarea saunta: “Mua ningaburuta maunta jidaidua mombe endru ẽ baide edeidua”.
45 Aramaunta Jesúsʼidu wa karampe naunta jarasi: “Rabí” maune ningatasi.
46 Aramaunta jidasida iyira.
47 Maune Jesús kaidubema abauba kuchota jiraeda karampe sumo sacerdote nezoka kuwuruta urapetatasi.
48 Maune Jesúsba kabananumua jarasi: “Marara muinu zesida kuchoeda akuza garroteda dayima nezrugamiata jidadai kiranka.
49 Mua templode ewariza jeweda jaradiabasidera marambara, ¿karea jidada ẽ basi? Mamina naun joma kãwũã berabariburu Daizeze Bedeaba jarabuta aripe berabarimarea”.
50 Maune iyi kaidubemarãrã miru wemba wansida mombe iyita doba amaesida.
51 Mamina kũra abauba kaitauba pewa wansi iyira, iya wua bia lino omata jumbasi, maune iyira bera jidasida.
52 Mamina iyi wua bia lino omara weinta karampe wua edre jumbuawauba wemba wansi.
53 Maunta Jesúsʼra edesida sumo sacerdoteidu akuza amba yi juresida joma sacerdotera nokoranta, zoraranta akuza Ley ũrũ jaradiabariranta.
54 Pedrobara jingauba pewa wansi Jesúsʼra, sumo sacerdote de ewaraidu mombe mama tubu jʉ̃wʉ̃rʉ̃a kã jewedasi nezokara mama panurambawara.
55 Sacerdotera nokoramba akuza Sanedríne* buramba jurupanasi sawua sewidata jaraita Jesús ũrũ, mawua beadamarea. Mamina unduda ẽ basi anyara.
56 Maune embera mejanchauba sewidata jarasidamina anya jaradara iyabau ẽ basi.
57 Adewara unkuruta piradrusida sewidata jaradaita iyi ũrũ, anya naun bedeata jarasida:
58 “Naun yumakeramba jarasi: ‘Muara Daizeze de emberamba parãnara tegabueyi mombe ewari umbeade jenda parãñi, maunʼra emberamba parãna ẽ bayi’”.
59 Mamina naunebida anya jaradara iyabau ẽ basi.
60 Maune sumo sacerdoteba piradrutoto karampe widisi Jesúsʼa: “¿Kare panu ẽka buara? ¿Karenta krinchabida naunra emberaramba bu ũrũ jaranumu kareara?”.
61 Mamina Jesúsbara kare jara ẽ basi. Mawue sumo sacerdoteba akuza jarasi: “¿Bura Cristoka? ¿Daizeze neneẽãbu Warraka?”.
62 Jesúsba iyaa panusi: “Munta iyi, marambara nanemba unta undudayi Embera Warrara Daizeze zareabarabu juwa arare jewedabuta akuza jãrãrã ũrũ uruta”.
63 Maun unʼri sumo sacerdoteba iyi wua koenta karampe jarasi: “Wua kare jaraira neẽ,
64 mara jomaumba urintabeda iya kare kayirua jaratabera, ¿karenta odai marambara?”. Jomaumba jarasida beaibarata.
65 Mawue unkuruba iyira kirama dau idusida akuza iyi kirara anana karampe chinsida mombe jarasida: “Buta profetaburu jarada kaiba deguebisita”. Iyira poda karampe tribunal gorogororamba edesida.
66 Maune Pedro de ewarade jewedabueda deguesi yuweranta aba maunʼra sumo sacerdote nezokabasi.
67 Iya Pedro tubu juwurua kã kubuta undui kirankita aku karampe jarasi: “Busida jari Jesús Nazareno kaidu wambasi”.
68 Mamina iya merasi, mombe jarasi: “Unduka mua maunʼra, kawua ẽ mua kare ũrũ bediakusida bura”. Mombe puertaidutotosi.
69 Mamina iya aku karampe akuza wuabemara jarakasi: “Naun emberara anyibawarabasi”.
70 Mamina Pedrobara wabida merasi, maun dara ẽãne mamapanuramba Pedroa akuza jarasida: “Warinu, bura anyibawara wambasi, dajadabu bura Galileadebemanta”.
71 Mamina iya jarasi iya warinuta jaraku ẽ buru Daizezeba zuburiabibarata iyira, mombe jarasi: “Unduka mua maun embera maramba jarakuanura”.
72 Maun dara ẽãne eterrera berusi yi 2 vecesta. Maune Pedroba kirambesi Jesúsba iyaa na jaradata: “Eterre 2 veces berui na, 3 veces jarayi bua mura undukata”. Mawue iyira bia ẽ senti karampe mejancha jengasi.
Bed’ea biobʉbari
^ Lit. “Abba”. Hebreodera mawua ẽ buru arameonera naumbara jarakirambu “Zeze”. Naun bedeara wũãwũãzakeramba zokapanasi anyi zeze truita.
^ Akura glosariota.
