Marcosba budata 4:1-41
-
YIZARA DAIZEZEBA SAWUA ZOKAI ŨRŨ (1-34)
-
Ne ubari (1-9)
-
Karea Jesúsbara yizabara jaradiabasi (10-12)
-
Jara urimbisi ne ubari yizata (13-20)
-
Imbira koabudadera nekaremba anainta koada ẽ (21-23)
-
“Maramba wuabemara sawua edabudeba, wuabemarambida maranta iyaba edadayi” (24, 25)
-
Yumakera ne ubarira kãĩbu (26-29)
-
Mostaza semillata (30-32)
-
Yizaranta zokasi (33, 34)
-
-
Jesúsba nangu zromanta tautotobisi (35-41)
4 Jesúsba akuza jaradia jundrusi pusa orilla, mamara emberara iyi kawa mejancha amba yi juresida baera, jambade bari karampe jewedasi mombe doyauba ara dokisi oumbatotosi mamina emberara kabananumura do orillapanesi.
2 Mawue iya nekare mejancha jaradia jundrusi yizaranemba, iya kãwũã jaradiabasi:
3 “Urindua naunta, emberanta wansi ne ueda.
4 Iyi ne unumune unkuru semillara ewarade baesi, akuza ibanaramba makosida.
5 Unkuru semillata mongara mejanchanumumae baesi, maun ne ura mesera pawaransi, egorora bari ũrũbasi baera.
6 Mamina maun ne ura karrata bia jida ẽ basi baera bisia juwuruaba bagutotosi.
7 Maune unkuru semillaranta chirua kayiruade eda baesi akuza maun chirua kayirua pawaramburuba, waribi ẽ basi semillara.
8 Unkuru semillata egoro biade baesi baera bia pawaransi, maun karea 30 veces audre diasi neta biata akuza 60 akuza 100”.
9 Adewara jarasi: “Yi kuwuru abubara kirankita urindua”.
10 Kombeburu iyi abapaichuaside, emberara iyi kawapananaramba adewara iyi apóstolera 12 panuramba widi jundrusida iya yiza jarada ũrũ.
11 Iya anyaa jarasi: “Daizezeba iya sawua zokai ũrũ wuabemara jara ẽã bura, marara kawuabiseabu mamina wuabemarãrã joma jaradiabu yizaranemba
12 mawua anya akudaimina mua karenta obuta, kawuada ẽ marea karea obuta akuza urinaimina mua jarabuta, kawuada ẽ marea karenta jarakirankuta, maumba anyira jenda Daizezemara ze ẽ bayi akuza anyi nemitiara perdona ẽ bayi Daizezebara”.
13 Adewara anyaa jarasi: “Maramba naun yizata urina ẽ buru, ¿sawua urinai wuabemara yizara?
14 ”Ne ubariba semilla udabara jarakirambu Daizeze Bedeata.
15 Unkuru emberara semilla ewarade baeda kirankabu, anya Daizeze Bedea urinsidamina Satanásba ãĩ buesi anya maun bedea urinara.
16 Adewara bu emberara jari semilla mongara mejanchabu ũrũ baeda kirankabuta, Daizeze Bedea urinsidade sobiade injansida.
17 Mamina maunta bia karra jida ẽ basi. Maun kirankabu jari emberara Daizeze Bedea urinata, anya kawuadara audre ẽãne idubupanu bedea zroma undubu karea, mawua ẽ buru pewambuda karea.
18 Adewara panu jari chirua kayiruade baeda kirankapanunta, maunʼrambara Daizeze Bedeara urimpanu.
19 Mamina krincha opanu baera naun druade kare berabaribu karea akuza nembia erbaita krincha opanu baera adewara nekare anya kangabuta erbakirampanu baera, Daizeze Bedeara chirua kayiruaba anaburu kirankabu akuza idu waribi ẽ.
20 Adewara semilla egoro biade udapeadabara, jarakirambu emberara Daizeze Bedea urinanta akuza kawuadata maumba karenta jarakirambuta. Maunʼrambara 30 veces audre, 60, akuza 100 audre neta biata diada kirankabu”.
21 Akuza anyaa jarasi: “Imbira koabudadera nekaremba anaita koada ẽ, mia cama edre bueita koada ẽ, ¿maramambi? Awuaraburu imbirara koapanu iyi buebadamae bueita.
22 Maumba nekarenta meranumumburu undudayi maunʼra, adewara nekarenta biʼia meranumumburu maunʼra jomaumba undudayi.
23 Yi kuwuru abubara kirankita urindua”.
24 Jesúsba tea anyaa jarasi: “Maramba urimpanura kirankita urindua. Warinubaira maramba wuabemara sawua edabudeba, wuabemarambida maranta iyaba edadayi akuza maune wuenta unduyi marambara.
25 Embera abauba nekare kawuabuburu iyaara audre kawuabidayi mamina yi nekare kawua ẽã buara, iya wiña nekare kawuabusida jariñi Daizezebara”.
26 Adewara jarasi: “Daizezeba sawua zokaira naun kirankabu, yumakera abauba semillaranta ubu.
27 Diamasira maun yumakerara kãĩbu akuza ewaridera piradrubu, mauenara iya semillara udara pawara wa akuza maun ne ura yi zroma ba wa, iya maun ne u sawua waribu biʼia kawua ẽ mina.
28 Egoraba karebabu wiña wiñane semilla biʼia wari karampe neta diamarea: Naara pawarambu, tea zaubu maun tea kuarabu.
29 Maun kuaranuminanera, iyara buade wambu, arabasi baera ne u jurepei ewarita”.
30 Akuza jarasi: “¿Kare kirankachu Daizezeba zokaira? ¿Kare yizata zokaseapanu maun jara urimbita?
31 Abarikachu mostaza semilla kiranka, egorode uburudera naun mostaza semillara wikakiru wuabemara semillaraira.
32 Mamina uda teara bakuru zroma ba zebare wuabemara ne uira akuza yi tae jedezoa wari wa, maumba ibanarãrã maun sombra jurude zepanu”.
33 Iya yizara naun kirankabuta zokabasi emberara jaradiaburudera, iyara anya urinseabutru jaradiabasi.
34 Jesúsba emberara jaradiaburudera, yiza neẽãra jaradiakabasi mamina iyi kaidupanurãrã anyi awapanune joma jaradiabasi.
35 Kiubodoare Jesúsba iyi kaidupanura jarasi: “Wandru kirara”.
36 Mawue iya emberara wamarea jara karampe iyira edesida jambade akuza mamabasi awuru jambaranta.
37 Mamina atiaude nangu zromata deguesi, do imatu imatunuma kawaba jambara bira busawasi baniamba.
38 Mamina Jesúsʼra jamba ambudeare buru kau kãĩnumasi, maune iyi kaidupanuramba uruma karampe jarasida: “Noko, ¿bumara kare ẽka dayirã kãwũã beitanumura?”.
39 Aramaunta iyira piradru toto karampe pikinuma totobisi puandrura akuza pusa jarasi: “Pikiara”. Puandrura pikitotosi akuza joma jenda neneẽã numatotosi.
40 Maun tea jarasi: “¿Karea mejancha perabarabu marara? ¿Injana ẽka Daizezeba marara karebaita?”.
41 Anyira mejancha perasida baera anyirai jarasida: “Warinubaira, ¿kai naun emberara? Puandruba akuza pusaba urinchu iya jaraburura”.
