Marcosba budata 12:1-44
12 Aramaunta yizadeba nekare jaradia jundrusi. Mombe jarasi: “Embera drua erbuba usi uvata, mombe cercanumusi. Adewara mama osi uva birachibarita akuza de untuchubuta. Tea iya maun druara emberara ne ude trajapanura arrendasi, mombe wansi drua jampe.
2 Uva buai ewaride, yi drua yibariba iyi nezokata zokasi uva buama iyaa diadaibarata diadamarea.
3 Anyara maun nezokara jidada karampe posida akuza maune juwa awa zokasida jenda.
4 Teajuneane drua yibaribara iyi nezoka awuruta zokabuesi, maunʼra mongaraba buruma posida akuza maua imitia bedeasida.
5 Maunʼare awuru nezokata zokabuesi maunra beasida. Maun tea awuru nezokara zokabueburude unkuruta posida, unkuruta beakuasida.
6 Drua yibaribara zokabuesi yi warra iya kangabuta ne ubarirainu, krinchabasi baera: ‘Mu warratru wawiadayi’.
7 Mamina ne ubarirambara anyirai jarasida: ‘Naunebayi naun druara, maumba beadadru dayirambara, mawua dayirane baita naun druara’.
8 Mawue anya jidada karampe beasida akuza uva utabumaembara ãĩ balbuesida.
9 Mamina uva ne u yibaribara, ¿karenta oi? Ze karampe beayi ne ubarirãrã, mombe maun druara awurura diayi.
10 ¿Lebada ẽka marambara Daizeze Bedeaba naun ũrũ jarabura: ‘De parãbariramba mongara kanga ẽ badara maun mongaratru audre yibia bazesi’?
11 ¿Lebada ẽka maramba maun ũrũra: ‘Maunra Jeowadeba zesi mombe dayiraintara jipa yibia’?”.
12 Maunra yizara urinsidade iyi nejurarambara kawuasida anyi ũrũ bedeakuasita, maun karea anyara jidakirampanasi mamina emberaranta wawiapanasi baera iduaribida karampe wansida.
13 Anyara unkuru fariseoranta akuza Herodes kaidupanuranta zokabuesida Jesústa kiriña aña bedeabimarea.
14 Anyi zeside naunta jarasida: “Noko, daibara kawuapanu buara warinuta jarabuta akuza buara juru ẽ emberara sawua sobiabita, buara bia kawuabu baera emberara sawua krinchabura akuza warinuta jaradiabuta Daizeze ũrũ. ¿Bumara, noko Romanebemamba plata widibura diaibaraka? ¿O dia ẽ baibara?
15 ¿Pagaibaraka o paga ẽ baibara?”. Jesúsba kawuaside anyi soiduba bedeakua ẽ basita, anyaa jarasi: “¿Karea aña bedeabikirambu marambara mura? Muinu weidua denario monedata aba”.
16 Mawue iyidu weda karampe Jesúsba widisi: “¿Naun monedabara kai kiranta abu akuza kai trunta erchu?”. Anya panusida: “Noko Romanebema”.
17 Aramaunta Jesúsba jarasi: “Noko Romanera, noko Romanebema diaidua, mamina Daizezedera diaidua Daizezea”. Jesúsba mawua jaraburu karea yiya bia aku akudrutotosida.
18 Mawue zesida saduceoranta, maurambara jarapanu beidarãrã jenda piradru ẽãta, mawue anya widisida:
19 “Noko, Moisésba bu amaesi yumakera kimabarabuta beira mamina wũãwũãbara ẽ basiburu, mawuara yi membeata juwa jidaibara maun pendraume, anya wũãwũãbaraburura yi membea beida wũãwũãra kiranka akudamarea.
20 Daide edabasi yumakeraranta 7, maunrãrã yi memberarambasi. Yi naambemara juwa jidasi, mamina wũãwũã neẽ beisi.
21 Mawue yi teambemanta juwa jidasi maun pendraume mamina maunsi wũãwũã neẽã beisi. Akuza maunʼarebemasida abarika berabarisi.
22 Mawue maunra membera 7 panurãrã wũãwũã neẽã beisi, tea beisi yi yuwueransida.
23 Mawuara jenda piradruburu ewaridera, ¿kai kimabai maun yuwuerara? Anyi jomaunta maun yuwueraume juwa jidasiburu”.
24 Jesúsba panusi: “Marambara undu kawuada ẽ Daizeze Bedeara, mia Daizezera kareamba zareabarabura maun karea marara aña bedeabarabu.
25 Jenda piradruburudera yumakerarãrã akuza yuwuerarãrã juwa jida ẽ bai baera awuaraburu anyira ángelera untupanu kirankapanañi.
26 Beidara jenda piradrui ũrũra bakuru zake pureatotoside, Daizezeba Moisésʼa jarasi: ‘Mura Abrahán Daizeze, Isaac Daizeze akuza Jacob Daizeze. ¿Lebada ẽka marambara maunʼra Moisés librode’?
27 Iyira beidara Daizeze ẽ awuaraburu zokaipanura Daizeze, marara aña bedeabarabu”.
28 Ley ũrũ jaradiapanuranebema abauba urinsi anyi bedeakabarabuta. Iya unduside Jesúsba anyi bedeara aripe panusita, widisi Jesúsʼa: “¿Leyba zokabudebemara, saunta audre yibia?”.
29 Jesúsba jarasi: “Yi naarabemara naun: ‘Israeldebemarãrã, urindua. Dayirã Zezera Jeowa, Jeowatru abapaibu.
30 Daizeze Jeowara kangara jipa bu soiduba, nekare joma bua obudeba, bu krinchaiduba akuza joma bu zareaiduba’.
31 Yi maunʼarebemara naun: ‘Kangara wuabemarãrã buyikuza kangabu kiranka’. Leyba zokabudebemara naunʼra umenta audre yibia”.
32 Ley ũrũ jaradiabariba jarasi: “Noko, buara aripe panutae, warinu bua jarabura: ‘Daizezera abapaibu, iyi awuarara neẽʼ.
33 Akuza Daizezera kangaibara jipa joma bu soiduba, bu krinchaiduba, bu zarea jomainumba, adewara wuabemarãrã kangaibara buyikuza kangabu kiranka, maunra audre valebu Daizezea ofrenda joma diaira akuza audre valebu sacrificioraira”.
34 Jesúsba unduside sawua bia panusita, iyaa jarasi: “Mejancha waembu ẽ bura Daizezeba zokaburude eda baira”. Mawue mia abauba wua kare widida ẽ basi.
35 Mamina Jesúsba wabida templode jaradianumune, anyaa widisi: “¿Karea Ley ũrũ jaradiabarirambara jarapanu Cristora David warrata?
36 Daizeze jaure zareadeba Davidba jarasi: ‘Jeowaba jarasi mu Nokoa: “Jewedara mu juwa arare, bu nejurarãrã bu juwa edre baebiyeda”’.
37 Davidba Cristota noko asiburu, ¿sawua iyi warra baibasi?”.
Emberara mejanchauba urinkira urimpanasi.
38 Iya jaradianumaside anyaa jarasi: “Kabuidua Ley ũrũ jaradiapanuramba anyira wua drazoa jun karampe wankira baera akuza anyi plaza ode wanera kangade saludadamarea,
39 judíora amba yi jurebarimaera* anyitru kirambita jewedapanu akuza yi zromara nekobarimaera anyitru jewedakira.
40 Jarimpanu pendrara deta akuza daara yiwidipanu wuabemaramba bia akudamarea. Mamina anyira audre zuburiabidayi”.
41 Jesúsʼra jewedasi caja plata buebari unduseabumae akuza akubasi sawua emberaramba plata buepanunta. Plata mejancha erburamba monedaranta mejancha buepanasi.
42 Maune zesi pendra pobrekiruta mombe moneda winkakiruta ume buesi.
43 Jesúsba iyi kaidupanuranta trun karampe jarasi: “Naun pendra pobrekiruba audre plata buesi wuabemaraneira caja plata buebaride.
44 Anyara anya sobradatru diapanu, mamina iyi pobrekirumina joma diasi iya abadata”.
Bed’ea biobʉbari
^ Lit. “sinagogas”. Amba yi jurepanasi Daizezea yiwidita akuza Daizeze ũrũ kawuaita.
