Marcosba budata 5:1-43
5 Mawue anyira pusa orilla jũẽsida gerasenora druaidu.
2 Jesús jambadeba ubaeburude daucha deguesi yumakera demonioba wawabuta, iyira bewara wuaganumu areba untu deguesi.
3 Iyira mama basi bewara wuaganumumae, maun ewaridubayedara mia abau emberamba taju auda ẽ basi, mia cadenabida taju auda ẽ basi.
4 Iyira badua tajupanasi cadenaba, mamina iyara maun cadenara tuduzoabibasi, mia abau emberanta zarea neẽ basi iyi jidaira.
5 Iyira ewari joma diamasi, ewaride, jura wambasi bewara denumemae akuza jura wambasi katumaena, adewara iyikuza konkuachuasi mongaraba.
6 Mamina iya Jesús wawarauba unduburude ara wembasi mombe iyi kirambita sankokode kubatotosi.
7 Mawue iya nemi jingua jurasi: “Jesús, Daizeze untubema Warra, iduaribira mura akuza Daizeze na jarada warinu bua mura zuburia oẽ baita”.
8 Jesúsba demonioa jaranumasi baera: “Kaun yumakera kakuadeba ãĩ wara”.
9 Mawue Jesúsba iyaa widisi: “¿Kai bu trunʼra?”. Iya panusi: “Legión* mu trunʼra, mejanchapanu baera daira”.
10 Iya Jesúsʼa zuburia widibasi anyita jurekua ẽ marea maun druadeba.
11 Maune katumane chinaranta nekobarabasi.
12 Mawue demoniorambara, zuburia widisida Jesúsʼa: “¿Daira eda wanseapanuka kaunra chinarane?”.
13 Mawue Jesúsba iduaribigasi, aramaunta demoniorãrã chinara kakuade eda eima wansi maun yumakeranemba ãĩ wana karampe, chinarãrã untuba uma wansi pusaeda. Jomaune 2 mil chinara joga beisi pusade.
14 Mamina yi china akubarirãrã miru wembasida akuza jara wansida maunra puwurueda akuza puwuru kawapanura. Mawue emberarambara aku wansida karenta berabarisita.
15 Jesúsʼidu jũẽsidade anya undusi maun embera legiónba wawabibadata, iyira undusida wua jun karampe jewedabuta akuza aduʼabuta, mawue mejancha perasida.
16 Yi sawua berabarida undudarambara jara urimbisida karenta berabarisita yi demonioba wawabadara akuza karenta berabarisita chinarãrã.
17 Mawue emberarambara Jesúsʼa jarasida wamarea anyi druadeba.
18 Maunta Jesús jambade bariburude, embera demonio abadaba Jesúsʼa jarasi iyisida kaidu edemarea.
19 Mamina Jesúsbara ede ẽ basi, awuaraburu iyaa jarasi: “Deda wara, bu memberainu wa karampe joma jarada Jeowaba karenta oburuta bu karea akuza sawua so borekea undubidata”.
20 Maun yumakerara wansi mombe iya Decápolisʼeda* jaraka wansi emberara, Jesúsba iyi sawua karebadata, emberaramba maun urimburudera bia aku akudru panasi.
21 Kombeburu Jesúsʼra kirara wansi, iyi wabida do orilla bueda emberaranta mejancha zesida.
22 Maune zesi noko judíora amba yi jurebaridebemanta,* maun trunʼra Jairobasi, Jesús unduside iyi na sankokode kuba wansi,
23 mawue iya zuburia Jesúsʼa mawuasi: “Mejancha kayanumu mu kaura, zera mu bia okarampe. Bebira iyira, bei ẽ bamarea”.
24 Aramaunta Jesúsʼra wansi iyi kaidu, maunera emberara mejancha wambasi iyi kaidu, maumba pensua wambasi.
25 Maune mamabasi embera wuera 12 poagabata waba kayabuta.
26 Iyara médicora mejanchauta aku wambasi, maunramba jaraburuta obuba mejancha zuburiasi iyira, adewara iya nekare erbadara joma gastasi, mawuasidu iyira biaikaude wuaburu idra wansi.
27 Iya urinsi baera Jesús ũrũ kare jarabarabuta emberarane eda wansi, Jesús ambudeare ze karampe tombaritasi Jesús wuama.
28 Iya krinchabasi baera: “Mua iyi wuata wiña tombaritara, mua kawuabu mura betotoita”.
29 Aramaunta iyi waba kayabadara tautotosi, maune sentisi iyira bedogota maun kaya kayiruadeba.
30 Aramaunta Jesúsba sentisi iyideba zareata ãĩ dogota, mawue jenda emberarama aku karampe widisi: “¿Kaiba tombaritabe mu wuara?”.
31 Mamina iyi kaidupanuramba panusida: “Bua akuku nama sawua pensuanumunta emberaramba, maune widiku bua kaiba tombarisita bura”.
32 Mawuasidu iya wabida akunumasi kaiba tombarisi kawuaita.
33 Maun wueramba kawuaside iyira bedogota, perabiba uretotosi, mawue Jesúsma sankokode kubatoto karampe joma jarasi warinuta.
34 Jesúsba iyaa jarasi: “Bua warinu Daizezeta injansi baera, bedogo kau zake bura. Wara, krincha orara, bu kaya kayiruara bedogo”.
35 Iyi wabida bedeanumuweda, unkuru emberaranta zesida Jairo dedauba, mombe iyaa jarasida: “Bu kaura beidogo, wua kare jararara, iduaribira Jesúsʼra”.
36 Mamina Jesúsba urimbuesi anya karenta jarakuanura, maun karea Jairoa, jarasi: “Krincha orara, injara Daizezeta”.
37 Mawue Jesúsba iyi kaidu edesi Pedrota, Santiagota akuza iyi membea Juanta. Maunʼra awuarara kai ede ẽ basi.
38 Anyi Jairo deidu jũẽburude undusida emberara mejancha jura jengabarabuta.
39 Mawue iyi eda wana tea anyaa jarasi: “¿Karea mejancha jengabarabu marara? Wũãwũã zakera bei ẽ, kãĩnumu iyira”.
40 Anya maun bedea urimburude Jesús karea ipidasida, kombeburu emberara ãĩ wambi karampe wũãwũã zakechuidu jũẽtotosi yibarirambawara akuza kaidu wansida iyi kaidupanuranta.
41 Mombeburu wũãwũã zake juwata jida karampe, jarasi: “Tálitha cúmi”, maumba jarakirambu “wũãwũã zake mua bua jaraya: Piradrura”.
42 Aramaunta wũãwũã zakera piradrutotosi akuza taiba wasi (12 poagabasi iyira). Maunta undudai mejancha sobiasida jipa.
43 Mamina iya jarada ũrũ jarasi mia kaia jarada ẽ bamarea, adewara jarasi wũãwũã zakera nendiadamarea.
