Marcosba budata 3:1-35
3 Jesúsʼra akuza jenda wansi judíora amba yi jurebadama,* mamabasi yumakera aba juwa bagubuta.
2 Fariseorambara Jesúsʼra akubarabasi maun yumakeranta sábado ewaride bebi kawuaita, mawua jaradaita iya karenta aña osita.
3 Aramaunta Jesúsba yumakera juwa bagubua jarasi: “Piradrura, muinu zera”.
4 Tea Jesúsba anyaa jarasi: “¿Karenta oseabu sábado ewaridera? ¿Nembiata mawua ẽ buru awuru zuburiabita? ¿Embera aba karebaita mawua ẽ buru beaita?”. Maunera anyara kare panuna ẽ basi.
5 Maune Jesúsba kĩrũ akusi anyira akuza sopuasi undusi baera anyara so borekea undubi ẽãta mombe yumakera kayabua jarasi: “Bu juwata wuara”. Naumba iyi juwa wuaburudera betotosi.
6 Fariseorãrã mamaumba wana tea waña amba yi juresida Herodes kaidupanurambawara mawua krinchadaita Jesús sawua beadaita.
7 Mamina Jesúsʼra iyi kaidubemarambawara wansida pusaeda, emberara Galileadebemarãrã akuza Judeadebemarãrã iyi kaidu wansida.
8 Emberara Jerusalénebemaranta akuza Idumeanebemaranta adewara Jordán kirarebemaranta akuza Tiro adewara Sidón kawabemaranta jũẽsida Jesús chuidu, anya urinsida baera Jesúsba karenta onumuta.
9 Jesúsba iyi kaidubemara jarasi jamba zaketa jurudamarea iyitaa, mawua emberara mejanchabuba iyita edabarida ẽ marea.
10 Maune Jesúsba emberara mejancha bebikuasi baera yi mejancha kayapanurãrã anyirai yi edabaripanasi Jesús tombarita.
11 Emberara demonio apanurãrã iyi unduburuza iyi na sankokode kubatotopanasi mombe jura jarapanasi: “Bura Daizeze Warra”.
12 Mamina Jesúsba anyaa jarada ũrũ jarasi mia abaua jarada ẽ marea kaita iyira.
13 Tea Jesúsʼra katumaena wansi mombe unkuru iyi kaidubemaranta trunsi, anyira iyibawara amba yi juresida
14 Mombe maunranebemanta 12 jidasi, iya mauranta trungasi apóstoles. Anyara Jesústa kopayaibasi akuza Jesúsba anyira zokaibasi jaradiade wanamarea.
15 Akuza iyara anyaa zareata diaibasi demonioranta ãĩ buemarea.
16 Maunra 12rane edabasi Simónta (iyabauta Jesúsba Pedro trungasi).
17 Zebedeo warra Santiagota akuza yi membea Juanta (iya Boanerges trungasi anyira, maumba jarakirambu “warrara, ba kirankapanunta”).
18 Akuza edapanasi Andrésta, Felipeta, Bartolométa, Mateota, Tomásta, Alfeo warra Santiagota, Tadeota, Simón zokeabuta,
19 akuza Judas Iscarioteta (naumbara tea sewasi Jesústa).
Maun tea Jesúsʼra embera abau deda jũẽsi.
20 Maunebida emberara mejancha jũẽsida, maumba anyira nekobeda ẽ basi.
21 Jesús memberamba kawuasidade karenta berabarinumasita eda jũẽsida anya jarapanasi baera: “Kawua ẽã numina iyira”.
22 Maune panasi Ley ũrũ jaradiapanuranta Jerusalénemba zedata, anya jarasida: “Satanásba kãwũã onumu kaunra, iyara demoniorãrã ãĩ jurekuabu demoniora nokodeba”.
23 Mamina Jesúsba anyaa jarasi iyi kawa zedamarea akuza yizaranemba jara urimbisi, jarasi: “¿Satanásbara sawua ariwia ãĩ buei Satanásʼra?
24 Gobiernonepanuranta anyirai bedea abarika zeda ẽ buru anyira bia wa ẽ bayi.
25 Akuza memberanta anyirai bedea abarikapanu ẽ buru bia wa ẽ bayi.
26 Abarika Satanásta abari Satanásʼume yõbuburu akuza bedea abarika ze ẽ buru, aduayi akuza beiyi.
27 Akuza embera abauta yumakera zareabarachu deda jũẽra akuza iya nekare erbuta zrugakirambuburu naarara maun yumakeranta tajuimbara. Mawuantru zrugaseabayi iya nekare deda erbuta.
28 Mua maraa jaraya, emberaramba nekare badu oburura perdonanaita krincha ẽã anya kare nemitia oburuta akuza kare bedea mitia jaraburusida.
29 Mamina Daizeze jaure zarea ũrũ i kayirua bedeara mauntru perdonana ẽ bayi, iyira ewari jomaune embera kayiruade beyi”.
30 Jesúsba maunta jarasi, anya jarapanasi baera: “Demoniota achu naumbara”.
31 Maune zesi yi papata akuza zesi yi memberanta, mawue anya trun zokada karampe ãĩ jũãsida,
32 maunera emberara mejanchauta iyi kawa jewedabarabasi maune iyaa jarasida: “Ãĩ ewarade edaubarabu bu papata bu memberambawara, buta widibarabu anyara”.
33 Mamina iya panusi: “¿Kaita mu papa akuza kairanta mu membera?”.
34 Mawue iyi kawa jewedapanurama aku karampe Jesúsba jarasi: “Naunranta mu papa, naunranta mu membera.
35 Joma yi Daizezeba jarabude butru mu membea akuza mu papa”.
Bed’ea biobʉbari
^ Lit. “sinagoga”. Amba yi jurepanasi Daizezea yiwidita akuza Daizeze ũrũ kawuaita.
