Marcosba budata 11:1-33
11 Anyi Jerusalén kawababurude jũẽsida Olivo katumainu, mamabu Betfagué puwuru zaketa akuza Betania puwuru zaketa, Jesúsba iyi kaidupanura umenta zokasi,
2 akuza naun bedeata jarasi anyaa: “Jari puwuru zake maramba undukuidu waindua, mara kainu jũẽburude burro zake taju edaumumunta unduyi marambara. Maun burro zakera miomba baridaka, enaenda karampe weidua nainu.
3 Mamina maraa wididara ‘¿Karenta obarabu marara?’, marambara panuindua ‘Nokoba nesidaku mamina tea diabariyi’”.
4 Anyi jũẽburude undusida burro zakera de puerta na taju edaunumunta ãĩ o abau are, mombe enetasida.
5 Mamina unkuru mamapanuramba widisida anyaa: “¿Karea enakuanu marambara kaun burro zakera?”.
6 Jesús kaidupanurambara panusida iya jarada kiranka mombe idu edebisida.
7 Mawue anya Jesúsʼidu wesida burro zakera, wuata ũrũ bueda karampe Jesúsʼra ũrũ barisi.
8 Embera mejanchauba ode bue wansida anyi wuata, unkuruba bakuru kiduata tu karampe bue wansida.
9 Emberara iyi na erbuzadaramba akuza iyi tea erbuzadaramba jura barabasi: “Karebara iyira. Jeowa, bu trunemba zebura buara bia akubu.
10 Nawedara dayirã zeze Davidba zokanumasi, mamina atiara Davideba zesi yumakera aba dayirã zokaita. Daizezeba bia akubu iyira”.
11 Iyi Jerúsalenʼinu jũẽna tea, Jesúsra temploidu jũẽsi joma akuita mamabuta, mamina kiubodobasi baera iyi kaidupanura 12 bawara wansida Betaniaena.
12 Nruema anyi Betanianemba wantakuanune Jesúsʼra jarra deguesi.
13 Iyara jingauba undusi bakuru higuera kidua barabuta, mawue kaitauba aku wansi yi tabarabu kawuaita. Iyi kaitababurude undusi yi kiduawabuta, wabida araba ẽ basi baera zauita.
14 Mawue Jesúsba jarasi: “Bura wua zau ẽ bai baera mia abauba ko ẽ bayi bu netara”. Iyi kaidupanurambara urinsida maun bedeara.
15 Iyi Jerusalénʼinu jũẽna tea temploidu jũẽ karampe Jesúsba jurekuasi emberara ne nendopanurãrã akuza mama ne edapanunta. Adewara korekuasi plata cambiabarira* mesara akuza paloma nendobarira jewedabarita.
16 Adewara iya mia abau embera nekare abura, berabaribi ẽ basi templo arera.
17 Tea iya emberara jaradianumasi akuza jaranumasi: “¿Daizeze Bedeade jarabu ẽka ‘Mu dera yiwidibari de adayi, embera naun drua jomauranebemarainta’? Mamina nezrugabarira de babinumu marambara”.
18 Sacerdotera nokoramba akuza Ley ũrũ jaradiabariramba kawuasida maunta, mombe krincha jurusida Jesús sawua beadaita. Anya Jesúsʼra wawiapanasi emberara mejanchauba urinkirambasi baera Jesúsba jaradiabura.
19 Ewarira kiubodobasi baera Jesúsʼra iyi kaidupanurambawara wansida Jerusalénemba.
20 Nruema diapeda anyi jenda wane undusida higuera bakurura beisita.
21 Pedroba kirambesi karenta berabaridata, mawue Jesúsʼa jarasi: “Rabí akura, higuera bakuru bua beimarea jaradara beisi”.
22 Jesúsba maun urimburude anyaa jarasi: “Injaindua Daizeze ũrũ.
23 Warinu embera abauba naun katuma jarara ‘Namaumba wara, adewara doitotora puzade’, mombe warinu soiduba injambuburu mawua berabarita, mawuara aripe berabariyi.
24 Maun karea mua maraa jarayi: Mara yiwidiburudera soiduba wididua maramba widikirambura akuza soiduba injaindua maramba widibura warinu diaita, mawuara warinu erbayi.
25 Mara yiwidinumunera embera abauba mara ũrũ nekayiruata osiburu perdonaindua maunʼra, mawua mara Zeze untrebemamba, perdonamarea maramba nekayirua oburuta”.
26 --
27 Mawue anyira jũẽsida Jerusalénʼinu, maunta Jesús templode edabuside, iyira orrasida sacerdotera nokoramba, Ley ũrũ jaradiabariramba akuza zoraramba,
28 mombe widisida: “¿Kaiba zokasi buara naun kãwũã omareara? ¿Kaiba kãwũã ojarasi buara?”.
29 Jesúsba anyaa panusi: “Mawuara muabida mara bedeata widiyi. Maramba panunara, mawuara muabida jarayi kaiba kãwũã ozokasita mua onumura.
30 ¿Kaiba zokasi Juanba emberara buru koemareara? ¿Daizezeba o emberaramba? Panuindua maunta”.
31 Anyira bedeada karampe anyirai jarasida: “Dayiramba Daizezeba zokasi ara, iya jarayi: ‘Mawuara, ¿karea inja ẽ basi marambara?’.
32 ¿Mamina sakuai, dayiramba jaradara emberaranemba zesita?”. Anyara emberara wawiabasi, jomaumba Juanʼra profeta kiranka akupanasi baera.
33 Aramaunta anya panusi: “Daibara kawuada ẽ”. Aramaune Jesúsba jarasi: “Muabida jara ẽ kaiba omarea zokadara”.
Bed’ea biobʉbari
^ Naunra emberarambara platata audu widipanasi anyimae plata cambiaburudera.
