Marcosba budata 1:1-45
-
Juan buru koebariba jaradiabu (1-8)
-
Jesústa buru koesi (9-11)
-
Satanásba nekayiruata obikirambu Jesúsʼa (12, 13)
-
Jesúsba jaradia jundrusi Galileade (14, 15)
-
Jesúsba beda beapanuranta kimare trunsi iyi kaidubema bamarea (16-20)
-
Emberane demoniobuta ãĩ buebu (21-28)
-
Jesúsba mejanchauta bebikuabu Carpernaúmne (29-34)
-
Mio neẽ numumae yiwidi wansi (35-39)
-
Lepraba kayabuta bebisi (40-45)
1 Bedea bia Jesúsba jaradiadata, Daizeze Warraba.
2 Aripe berabarisi profeta Isaías librode jarabu kiranka: “(Muara bu na wamarea zokabueyi embera aba bedea jarabarita, iyara bu wain ota ara owañi na).
3 Desiertodebu embera aba jurabuta, iya jarabu: ‘Jeowa ora ara oidua akuza daucha oidua’”.
4 Juan buru koebariba jaradianumasi desiertode buru koei ũrũ, mawua buru koe buruba undubidamarea anya nekayirua odata wua oẽ baita akuza Daizezeba perdonamarea kangabuta anyi nekayiruara.
5 Emberara Judeadebemaramba akuza Jerusalénebemaramba aku jũẽpanasi iyira. Iyara emberarãrã buru koebasi Jordán dode akuza maunʼra emberarambara anya nemitia obadara, jomaunʼra kirambita jarapanasi.
6 Juanbara jumbasi wua camello kara omata akuza kurrude jumbasi nenduwuru e omata, iyara auchichita kobasi akuza miel oidebemanta kobasi.
7 Iyara naun bedeata jaradiabasi: “Muare zeburura, mejancha zareabarabu. Mura iyi naara kare ẽ kirankabu, maumba iya sandalia jumbu wẽãĩsida zeri ẽ mura.
8 Muara marara buru koebu baniaba mamina iyara marara jaure zareaba buru koeyi”.
9 Maun ewade Jesúsʼra zesi Nazaret Galileadeba akuza iyira Juanba buru koesi Jordán dode.
10 Drua wane Jesúsba undusi bajãra ewara ewaradrutotosita akuza undusi Daizeze jaure zareata paloma kiranka iyi ũrũ deguewata.
11 Maune bajãnemba nemita urinsida, jarasi: “Mua bura mejancha kanga warra, buara mura mejancha sobiabibu”.
12 Aramaunta Daizeze jaure zareaba wambisi desiertoeda.
13 Jesúsʼra 40 ewaribayedabasi desiertode, maune Satanásba nekayiruata obikirambasi akuza iyi audurabasi nenduwurura oidebemanta mamina ángeleramba karebabasi.
14 Maun tea Juanʼra jidasida, maune Jesúsʼra Galileaeda wansi bedea bia Daizeze Bedeadebemanta jaradiade.
15 Iya naunta jarabasi: “Daizezeba jarada ewarira idi aripe berabariburu akuza Daizezeba zokaira arakaitaba. Idubuidua maramba nekayirua opanura mombe injaindua bedea bia ũrũ”.
16 Tea iyi Galilea doya jirabide undusi Simónta akuza Andrésta atarrayaba beda beapanunta, anyira beda beamiabasi baera.
17 Jesúsba anyaa jarasi: “Mu kaidu zeidua, mua jaradiayi emberara sawua juruita maramba beda jurubari kiranka”.
18 Aramaunta anyi atarraya idubuda karampe kaidu wansida.
19 Ara wandiare Jesúsba undusi Santiagota akuza yi membea Juanta, naunrãrã Zebedeo warrarabasi, anyara atarrayata ara obarabasi jambade.
20 Maune Jesúsba trunsi anyita, aramaunta anyi jamba amae karampe akuza anyi zeze Zebedeota iyiume trajapanurabawara amae karampe wansida kaidu.
21 Tea anyira jũẽsida Capernaúmʼinu.
Sábado ewari jundruburude judíora amba yi jurebaridu* jũẽsi mombe mama jaradia jundrusi.
22 Jesúsba jaradiakuadara emberara soidu jũẽsi, Ley ũrũ jaradiapanuraneira awuara jaradiabasi baera, iya jaradiabura Daizezedeba zebasi.
23 Maune judíora amba yi jurebarimae yumakeranta ababasi demonioba wawabibuta mombe naunta jura jarasi:
24 “Jesús Nazaretdebema iduaribira daira, ¿bura dai beaeda zesika? Mua biʼia kawuabu bura kayirua neẽã buta akuza Daizezeba zokasita”.
25 Mamina Jesúsba nemi jingua demonioa jarasi: “Chupeara, ãĩ wara kamaumbara”.
26 Mawue demonioba maun yumakera mejancha wawabi karampe akuza mejancha jurabi karampe ãĩ wansi iyideba.
27 Emberara jomaunta anyirai yiya aku akudrutotosida mombe anyirai naunta jarasida: “Akuidua, iya jaradiabura jipa awuarachu. Iyara zarea erchu demoniora ãĩ bueisida akuza demoniorambara urimpanu iyi bedeara”.
28 Aramaunta emberara mejanchauba uri kawuasida Jesús ũrũ akuza Galilea kawapanurambida.
29 Tea anyira judíora amba yi jurebarimaemba amba wansida Santiagoume akuza Juanʼume mombe wansida Simón akuza Andrés deda.
30 Maune Simón pakorera camane kaya tabasi kuwamiaba, aramaunta Jesúsʼa jarasida.
31 Mawue Jesúsbara Pedro pakorenta orrasi mombe iyi juwata jida karampe kareba piradrubisi, maune iyi kuwamiara neẽãtotosi, mawue iyara nekare ojundrusi anyita.
32 Kewarare umandau baeda tea emberarambara Jesúsʼidu erjuensida joma yi kayapanuranta akuza demonioba wawapanuranta.
33 Maune emberara mejanchauta de ewarade barabasi.
34 Maune Jesúsba emberara kira awuara awuaraka kayapanuranta bebikuasi akuza demonioramba wawapanuranta bebisi, mamina demoniorãrã iyara bedeabi ẽ basi iyi ũrũra, anya kawuapanasi baera iyira Cristota.
35 Diapeda paringuanumuweda iyira piradru karampe wansi mio neẽãinu mombe mama yiwidisi.
36 Mamina Simónba akuza iyibawarapanuramba Jesúsʼra juru wansida.
37 Anya undusidade Jesúsʼa jarasida: “Jomaumba jurubarabu bura”.
38 Mamina iya jarasi: “Wandru aña puwuru arakaitabemarama, mua mama jaradiaita, mura mauinta zesi baera”.
39 Mawue Jesúsba jaradia wansi Galileade judíora amba yi jurebari za akuza demonioba wawapanurãrã bebikuasi.
40 Maune zesi embera aba lepraba kayabuta, sankokode kube karampe jarasi: “Mua kawuabu buara mura bebiseabuta, bua kangabuburu”.
41 Jesúsʼra iyi karea so borekeasi, maun karea tombari karampe iyaa jarasi: “Muara bura bebikirambu”.
42 Aramaunta iyi lepraba kayabadara betotosi.
43 Mawue Jesúsba iyaa jarasi wamarea akuza kirankita jarasi:
44 “Kaubara jomaua jarakaita naunta, na wara sacerdoteidu. Bu kãwũã beda karea, Moisésba edemarea jaradata edera, mawua sacerdoteramba kawuadamarea bura warinu besita”.
45 Mamina iyi wana tea maun yumakerambara embera jomaua jaraka wansi karenta berabaridata, maun karea Jesúsʼra aduʼa wambe ẽ basi badu puwurude, maun karea ara jingara besi puwurudebara mawuasidu emberara badumaemba jũẽpanasi iyi akude.
Bed’ea biobʉbari
^ Lit. “sinagoga”. Amba yi jurepanasi Daizezea yiwidita akuza Daizeze ũrũ kawuaita.
