Marcosba budata 15:1-47
15 Unandrui joma Sanedrínebemaranta,* sacerdotera nokota akuza zoraranta akuza Ley ũrũ jaradiabariranta, amba yi juresida kawuadaita karenta oita. Tea anyara Jesúsra tajuna karampe edesida noko Pilatoidu.
2 Pilatoba iyaa widisi: “¿Judíora nokoka bura?”. Jesúsba iyaa panusi: “Buya jaratabe”.
3 Mamina sacerdotera nokoramba nemejancha jarasida iyi ũrũ.
4 Aramaunta Pilatoba akuza iyaa widisi, jarasi: “¿Kare panu ẽka buara? ¿Akura bu ũrũ karenta jarabarabuta?”
5 Mamina Jesúsba mia karesida panu ẽ basi, Pilatora maumba krincha o amaesi.
6 Pascua fiestaza, Pilatobara kabanauba jaraburu emberanta ãĩ buebasi cárceldeba.
7 Maun ewade emberanta cárceldechuasi, maun trunʼra Barrabásbasi. Iyira akuza awuru emberara iyiume cárcelde badarãrã nokoume yõnatapanasi akuza miabeasida.
8 Maun karea emberarãrã Pilato kawa zeda karampe widisida Pascua fiestaza obuta omarea anyibari
9 Pilatoba jarasi: “¿Marambara kangaika judíora nokota endrubimarea?”.
10 Pilatobara kawuatotosi sacerdotera nokorambara Jesúsʼra jidasidata envidia karea.
11 Mamina sacerdotera nokoramba emberara kabanabura jarasi wididamarea Barrabásta idu buedaita.
12 Maune Pilatoba anyaa jarasi: “Mawue, ¿maramba judíora noko apanura sawua oi muara?”.
13 Aramaunta anya jurasida: “Bakurude jirabura”.
14 Pilatoba anyaa jarasi: “¿Karea mamina? ¿kare kayiruata oburu iyara?”. Mamina wuaburu jura jundrusida: “Bakuruma tachi jirabura”.
15 Pilatobara emberaramba kangabuta okirambasi baera Barrabásta idubuesi akuza mombe Jesúsʼra ubisi akuza jarasi bakuruma tachi jirabudamarea.
16 Maune gorogororamba, iyira edesida noko de ewaraidu akuza iyi kawa joma zebisida gorogorora.
17 Anyara wua batatata jumbisida akuza uruta kasida, mombe iyi buru ũrũ jumbisida,
18 mombe jurasida: “Sawuabupe judíora nokora”.
19 Adewara bakuruba buruma tawesida akuza dau idupanasi akuza iyi na sankokode barrukuba wansida.
20 Kombeburu iyi karea ipidabarabada tea, iya wua batata jumbadara wẽãsida mombeburu iyi wuata jumbisida jenda, tea iyira edesida bakuruma tachi jirabudaita.
21 Maune mama berabari wambasi yumakera jampechuadata puwurueda wanta, iyi trunʼra Simónbasi, iyira Cirenenebemambasi akuza Alejandrota Rufoumera iyi warrarambasi, iyaa ajuerzade atubisida bakuru Jesús jirabudaita.
22 Tea anyara Jesúsra edesida Gólgota apanu druaidu, maumba jarakirambu “calavera”.
23 Mama iyaa diasida vino mirraeda* puerachuta mamina iyara do ẽ basi.
24 Iyi bakuruma tachi jirabuda tea, iya wua ũrũ jumbadata akuza diabari jumbadata koekuada karampe, suerte osida anyirai dedekaita.
25 Iyi untu bakuruma tachi jirabusidadera diapeda a las 9 babodobasi.
26 Anyara iyi buru ũrũ bedeata bu jirabusida, jarachuasi: “Judíora noko”. Mawua undubidaita karea beasidata.
27 Mombe iyi kawa untu bakuruma tachi jirabusida nezrugamiaranta ume, aba juwa arare, aba juwa ankare.
28 --
29 Yi mama berabaribururãrã, iyi karea ipidasida akuza ijura bedeasida. Mombe jarabarabasi: “¿Bubasi ẽka templo ãrĩ bue karampe jenda ewari umbeade parãña anumanara?
30 Buyikuza endrurame, ubaera kamaumbara”.
31 Sacerdote nokorãrã akuza Ley ũrũ jaradiabarirãrã iyaba ipidasida iyi karea mombe jarabarabasi: “Iya wuabemaranta karebasiburu, ¿karea iyikuzara kareba ẽpe?
32 Iyita Cristoburu akuza Israel nokoburu; ¿karea ubae ẽ kamaumbara? Mawuantru injañi daibara”. Emberara iyi kawa jirabadarabida imitia jarasida iyira.
33 Umatipauba a las 3 bayeda, naun druara joma paringua totosi.
34 A las 3 numune, Jesúsba nemi jingua jurasi: “Éli, Éli, ¿láma sabakhtháni?”. Maumba jarakirambu, “Zeze, Zeze, ¿karea doba amaeburu bua mura?”.
35 Unkuru mamabadaramba, maun unri anyirai jarasida: “Elíasta trunumina naumbara”.
36 Maune embera abauta wemba totosi, mombe esponjata soberaedasi vino origeamane. Bakurudeku karampe Jesúsʼa diasi domarea. Iya jarasi: “Akuakudru Elíasta warinu zei kawuaita iyi karebaita”.
37 Jesúsʼra mejancha jurasi, maun tea beitotosi.
38 Maune wua zroma templode jirabadara, enzadra koa totosi untuba eidubayeda.
39 Gorogorora noko iyi kirambita edaunumanamba unduside Jesús beisi ewaride kare berabaridata, jarasi: “Naun yumakerara, warinu Daizeze Warrabasi”.
40 Mama unkuru wueraramba jingauba akubarabasi. Maunrane eda basi María Magdalenata akuza awuru Maríata maunra Santiago, Josés akuza Salomé papabasi.
41 Jesús Galileadebasidera naunra wueraramba kopayapanasi akuza karebapanasi adewara mama mejanchapanasi wuerara, iyi kaidu Jerusaléna wanapeadaranta.
42 Kiubodoare, sábado* ewaritaa nekare obarabaside,
43 zesi José Arimateadebemanta Sanedríne bia akupanunta, iyabida jũãbasi Daizezeba zokabude eda baita iyira Pilatoidu jũẽsi pera ẽã, mombe widisi Jesús kakuata.
44 Mamina Pilatobara kawuakirambasi Jesúsra warinu beisi kawuaita, maun karea gorogorora nokota trumbuesi mombe maunʼa widisi.
45 Gorogorora nokoba Jesús beisi aside Pilatobara idu edebisi Jesús kakuara Joséa.
46 Joséba wua bia lino omata edasi akuza iyara Jesúsra ubaebisi mombe maun wuaba burasi, maunta bewara de mongara ũrũ bumae wuagabusi, mombe mongara zromaba ananumusi.
47 Mamina María Magdalenaba, Josés papa Maríaumeba akubarabasi Jesús wuagadapeadamae.
Bed’ea biobʉbari
^ Akura glosariota.
^ Mirrabara dayi puara taubitabe akuza kañatabe.
^ Mauba jarakirabu viernesede nekare obarabasita.
