Marcosba budata 8:1-38
-
Jesúsba 4 mil yumakerara nekobisi (1-9)
-
Jesúsʼa jarasida nekare zromanta omarea (10-13)
-
Fariseora pan waribibarita akuza Herodes pan waribibarita (14-21)
-
Yumakera dauberreabuta bebisi Betsaidade (22-26)
-
Pedroba jarabu Jesúsʼra Cristota (27-30)
-
Jesúsba iyi bei ũrũ jarabu (31-33)
-
Jesús kaidubemara sawua baibarata (34-38)
8 Maun ewaride emberara mejancha barabasi, Jesúsba undui anyi kare koi neẽã numunta, iyi kaidupanuranta trun karampe jarasi anyaa:
2 “So borekeabu mura naunra emberara karea, ewari umbeaba anyi mubawarabuta akuza kare koi neẽã numu anyira.
3 Mua anyita neko ẽã wambira anyi deda, ode dorrabariseapanu jarrababa akuza unkuruta wawarauba zeburu”.
4 Maunta iyi kaidupanuramba jarasida: “¿Sama undudai panʼra emberara kãwũã mejanchanumunta jãwua nekobira, kãwũã jingara panuburu?”.
5 Aramaunta Jesúsba widisi: “¿Marambara sombe pan erpanu?”. Anya panusi: “7 pai”.
6 Mawue Jesúsba emberara kabananumua jarasi egorode jewedadamarea, maun jarada tea 7 panta jiraeda karampe, Daizezea biga diasi. Maunta bue kua karampe iyi kaidupanura diasi, mawua anya emberara dedekadamarea.
7 Maun awuara anya erpanasi beda zakeranta, mawũã Daizezea biga diada tea jarasi wuabemara dedekamarea.
8 Mawue emberara jomaunta jãwua nekosida, maun tea yiko sobradara, ẽ zroma 7 jurepesida.
9 Panasibaibara 4 mil yumakerara, maun tea Jesúsba emberara jarasi wanamarea.
10 Aramaunta iyi kaidupanurambawara jambade barida karampe, jũẽsida Dalmanuta druaidu.
11 Maunta Jesúsʼidu zesida fariseoranta, mawue jarasida nekare zromata oundubimarea, anyara kangapanasi Jesúsba nekare aña omarea.
12 Mawue Jesúsʼra iñamba kayirua karampe jarasi anyaa: “Karea idibema emberarambara badua jurubarabu nekare zromata oundubidamarea, mamina muara nekare zromara oundubi ẽ bayi emberara idibemarãrã”.
13 Maun bedea jarada tea wansi iyira, mombe jenda jambade bari karampe, wansi kirara.
14 Kombeburu iyi kaidupanurambara kiranduasida pan edeibadara, anyara panra abapai apanasi jambadera.
15 Akuza Jesúsba kirankita jarasi: “Kaubaidua fariseora pan waribibarideba akuza Herodes pan waribibarideba”.
16 Mawue pan neẽ karea anyirai bedeakasida.
17 Iya maunta kawuasi baera anyaa jarasi: “¿Karea pan karea bedeakabarabu marara, wabida kawua ẽka marambara wabida mara soidu ze ẽka kãwũã urina ẽã barabaira?
18 ‘Akubarabumina, ¿unduda ẽka marambara? Urimbarabumina, ¿urina ẽka marambara?’. ¿Kirambeda ẽka marambara
19 pan 5 budeba 5 mil yumakerara nekodara? Akuza yiko sobraside, ¿ẽ zake sombe jurepesida?”. Anya jarasida: “Doce”.
20 “¿Akuza pan 7 budeba yumakerara 4 mil nekosidade, ẽ zroma sombe jurepesida yikora?”. Anya jarasida: “Siete”.
21 Mawue Jesúsba anya widisi: “¿Wabida urina ẽka marambara?”.
22 Anyira jũẽsida Betsaida druaidu, mama emberaramba Jesúsʼidu wesida embera dauberreabuta mombe zuburia widisida tombarimarea.
23 Iya maun embera dauberreabura juwama jida karampe maun puwurudeba ewaraeda edesi, tea dabuma idu karampe Jesúsba maun embera iyi juwaba tombari karampe widisi: “¿Undukuka buara?”.
24 Iya dakita karampe jarasi: “Embera wãnumenta akuku mua, mamina bakuru kirankachube”.
25 Mawue Jesúsba iyi dabuma tombarisi, aramaunta iyira betotosi mombe biʼia undutotosi.
26 Tea jarasi iyi deda wamarea mamina akuza jarasi: “Warara kaun puwuruedara”.
27 Tea Jesúsʼra iyi kaidubemarambawara wansi Cesarea druaeda maunra Filipo druadebasi, maune Jesúsba iyi kaidupanura widisi: “Emberarambara, ¿kai apanu mura?”.
28 Anya panusida: “Juan buru koebari apanu bura. Mamina unkuruba jarapanu bura Elíasta akuza unkuruba jarapanu bura profetaranebemanta”.
29 Iya anyaa jarasi: “Maramara, ¿kai mura?”. Maune Pedroba iyaa jarasi: “Bura Cristo”.
30 Mawue Jesúsba anyaa jarasi mia kaia jarada ẽ marea maunta.
31 Anya jaradia jundrusi Embera Warrara mejancha zuburiaibarata adewara zoraramba bia edada ẽ baita, sacerdote nokoramba akuza Ley ũrũ jaradiabariba mombe beadaita akuza ewari umbeade jenda piradruita.
32 Jesúsba maunra kare mera ẽã jarasi mamina Pedroba iyira jampe ede karampe jarasi mawua bedea ẽ bamarea.
33 Mamina Jesúsba enkarra dia karampe iyi kaidupanurama aku karampe jarasi Pedroa: “Jampeara munembara, Satanás kiranka krinchanumu bura, Daizeze kiranka krinchai kaude, krinchanumu emberara krinchabu kiranka”.
34 Mawue Jesúsba emberara kabananumunta iyi kaidupanurambawara amba zemarea jara karampe jarasi: “Embera abauta mu kaidubema bakirambuburu maun emberambara idubuibara iya kangata obadara akuza mu karea zuburiaita baibara mombe mu kaidubaibara ewari jomaune.
35 Embera abauta zarea obuburu bei ẽ baita maun emberara beiyi mamina yi mu karea iyi bebu diabura akuza bedea bia karea maunra bei ẽ bayi.
36 ¿Kare nembiata undui embera abauta beira naun druade nembia erbai karea?
37 ¿Buka nekare bua bu bebubari diaseabura?
38 Idibema emberara kerempa panu ẽ akuza nemitia omiara. Embera abauta mu karea perara akuza mua bedea jarabu karea, Embera Warrasida Daizeze zareaeda zeburude akuza ángelerambawara zeburude perayi iyi karea”.
