Marcosba budata 2:1-28
2 Mamina ewari bio berabarida tea Jesúsʼra jenda wansi Capernaúmʼena, mama emberaramba urinsida iyira embera abau dedachuta.
2 Mawue emberara mejancha zesi maunera akuza sama araisida neẽ basi, mia de ãĩbida. Maune jaradia jundrusi iyara.
3 Maune yumakerara kimaremba wesida yumakera kayaba piradrube ẽã buta.
4 Mamina mama emberaranta mejanchanumu baera Jesús chuidu erjuebeda ẽ basi anyara, maun karea de untre jũẽna karampe zobeata osida, mamaumba pikanga uda ubaebidaita maun embera kayaba piradrube ẽã buta.
5 Jesúsba kawuaside anya mejancha injambuta Daizezera, maun karea jarasi maun embera kayabua: “Krincha orara warra, bua nekayirua odara joma perdonadogo”.
6 Maune unkuru Ley ũrũ jaradiabariranta mama jewedaduanasi. Anya anyi sode kãwũã krinchapanasi:
7 “¿Karea kãwũã bedeabu naun yumakerara? Jipa wawia ẽ naumba Daizezera, ¿Daizeze awuarara kaiba perdonaseabu nekayiruara?”.
8 Jesúsba anyirai mawua krinchabarabuta kawuai anyaa jarasi: “¿Karea kãwũã krinchabarabu marambara?
9 ¿Karenta audre zarebaipe? ¿Kayaba piradrube ẽã bua jaraita: ‘bu kayiruara perdonadogo’ mawua ẽ buru jaraita ‘piradrura, jiraedara bu camillara mombe wara’?
10 Mamina maramba akudamarea Embera Warrabara zarea erchuta nama egorode wuabemara nekayirua perdonaita...”. Maune iya kayaba piradrube ẽã bua jarasi:
11 “Mua bua jarayi: piradrura, buyi camilla jiraeda karampe wara deda”.
12 Aramaunta naun yumakerara jomaunra kirambita piradrutotosi, iyi camilla jiraeda karampe wansi. Mawua berabari emberara anyirai yiya aku akudrutotosida mombe biga diasida Daizezea, anya jarapanasi: “Kãwũã undudakabasi daibara”.
13 Awuru ewaride Jesúsʼra wansi pusaeda, emberara mejanchauta zepanasi iyidu. Iya anyaa jaradiabasi.
14 Maunta iyi ode wane undusi Leví, Alfeo warrata nokoita plata cobra trajabari oficinane jewedabuta mombe Jesúsba iyaa jarasi: “Mu kaidubara”. Aramaunta Levíra piradru karampe wansi iyi kaidu.
15 Tea Jesústa iyi kaidupanurambawara wansida Leví deda nekode adewara anyibawara amba nekopanasi nokoita plata cobra trajapanuranta akuza nekayirua opanuranta, anyidebema mejanchauta Jesús kaidu wampanasi.
16 Maune Ley ũrũ jaradiapanura fariseoranebemanta, anya undusidade Jesús nekayirua opanurambawara akuza nokoita plata cobra trajapanurambawara ambabuta, Jesús kaidubemara jarasida: “¿Iyira nokorainta plata cobra trajabarirambawara akuza nekayirua opanurambawara nekobuka?”.
17 Maunta uri Jesúsba anyaa jarasi: “Yi kaya ẽã burambara nesida ẽ medicoeda wainʼra mamina yi kayapanurãrã waimbara. Mura zesi nekayirua opanuranta akude, yi kerempapanunta akuikaude”.
18 Juan kaidupanurãrã fariseora kiranka ayunapanasi, maun karea anya zeda karampe Jesúsʼa widisida: “¿Karea Juan kaidupanurãrã akuza fariseora kaidupanurãrã ayunapanu mamina bu kaidupanurãrã ayunana ẽ?”.
19 Jesúsba anyaa jarasi: “Embera juwa jidaitabuta iyi neundukawuarambawara budera iyi neundukawuarãrã neẽ karea ayunaira, ¿maramambi? Anyita juwa jidaitabume ambapanune ayunaira biga ẽ.
20 Mamina zeyi ewari yi juwa jidaitabura wua anyibawara ba ẽ baita, mauneburu ayunanañi anyira.
21 ¿Kaiba wua yiwidiba remendanumui wua sorera? Embera abauba maunta ora wua sorera tuduzuabiyi wua yiwidiba, mawuara wuaburu kõã wañi wua sorera.
22 Adewara, ¿kai emberamba nenduwuru cuero sorede eda tui vino yiwidira? Embera abauba mawua ora vinoba jensa wambiyi nenduwuru cuerora mombe joma wea wañi, awuaraburu vino yiwidira nenduwuru cuero yiwidide eda buepanu”.
23 Tea sábado ewaride, Jesúsʼra ne u utabu enzadra berabari wambasi, maune iyi kaidubemaramba maun ne udebemanta buaedasida ode wane.
24 Maune fariseoramba Jesúsʼa jarasida: “Akura, ¿anyara karea sábadode oẽ baibarata obarabu?”.
25 Mamina Jesúsba anyaa jarasi: “¿Urimbari ẽka marambara Davidba kare odara nekare nesidaside akuza iyi kaidubemarambawara jarra degueside?
26 ¿Marambara lebada ẽka sumo sacerdote Abiatar ewaribaside Davidba kare obaridata Daizeze deidu jũẽside? Davidbara kosi pan Daizeze na buedapeadata iyi kaidu panurambawarauba. Maun panʼra sacerdoteramburu koseabasi maun awuarara miomba kobe ẽ basi”.
27 Maune Jesúsba jarasi: “Daizezebara sábado ewarira osi emberara karebaita, mawua oẽ basi sábado ewarira audre yibiabamarea emberaraira.
28 Maun karea Embera Warraba zokabu sábado ewarisida”.
