Aksepte lotorite Zeova

“La lanmour Bondye: ki nou obei son konmannman; e son bann konmannman i pa en fardo.”—1 ZAN 5:3.

1, 2. (a) Akoz bokou dimoun ozordi pa kontan soumet anba lotorite lezot? (b) Eski sa bann ki pa obeir lotorite i vreman endepandan? Eksplike.

“LOTORITE” pa en mo ki sitan popiler denozour. Bokou dimoun pa oule soumet anba lotorite en lot dimoun. “Mwan personn pa dir mwan ki pour fer” i en latitid ki bokou dimoun ki pa oule obeir lotorite i annan. Me eski sa bann dimoun i vreman endepandan? Definitivman non! Laplipar parmi zot i senpleman swiv lezot ki “swiv bann koutim sa monn konmela.” (Rom. 12:2) Sa i totalman diferan avek endepandan akoz zot vin “lesklav bann move labitid koronpi.” (2 Pyer 2:19) Zot mars “dapre mannyer lemonn, an swivan sef pisans dan lespas” e sa se Satan Dyab.—Efe. 2:2.

² En ekriven ti vant son lekor an dizan: “Mon pa les ni mon paran, pret oubyen paster, pret Endou ouswa Labib deside kwa ki bon pour mwan.” I vre, serten i kapab abiz zot lotorite e i kapab ki zot pa merite ganny obeir. Me, eski ler nou refize krwar ki nou bezwen gidans, sa i sa vre solisyon? Me zis zet en koudey lo gran tit dan zournal pou donn nou en larepons kler. I vreman malere ki a sa moman ki imen i vreman bezwen gidans, laplipar pa montre okenn lentere pour aksepte li.

Nou pwennvi lo lotorite

3. Ki mannyer bann Kretyen dan premye syek ti montre ki zot pa ti soumet avek lotorite imen san reflesir?

³ Konman Kretyen, nou pwennvi i diferan avek sa ki pour lemonn. Sa pa vedir ki nou pou fer tou sa ki lezot i demann nou pour fer. O kontrer, dan serten moman nou devret refize soumet avek demann lezot ki annan lo torite lo nou. Se sa ki bann Kretyen dan premye syek ti fer osi. Par egzanp, kan bann zapot ti ganny lord pour aret prese, zot pa ti soumet avek demann sa gran pret ek lezot dimoun ki ti annan lotorite parmi bann Sannedren. Zot pa ti abandonn zot bon kondwit pour fer plezir bann imen ki ti annan lotorite.—Lir Akt 5:27-29.

4. Ki legzanp dan Lekritir Ebre ki montre ki bokou parmi pep Bondye ti fer bann desizyon ki lekontrer avek sa ki laplipar dimoun ti pou’n fer?

⁴ Bokou serviter Bondye avan lepok Kretyen ti annan menm determinasyon. Par egzanp, Moiz “ti refize ganny apele garson fiy Faraon. I ti swazir ganny maltrete ansanm avek pep Bondye” menm si sa ti ensit “lakoler lerwa.” (Ebr. 11:24, 25, 27) Zozef ti reziste lapros madanm Potifar ki ti annan pouvwar pour revanze e fer li ditor. (Zen. 39:7-9) Danyel ti’n “determinen dan son leker ki i pa pou sali son lekor avek bann bon manze lerwa,” menm si pa ti fasil pour bann zofisye Babilonnyen aksepte son desizyon lo sa size. (Dan. 1:8-14) Sa bann legzanp i montre ki pandan listwar, pep Bondye in pran pozisyon ferm pour sa ki byen malgre konsekans. Zot pa ti soumet zis pour ki zot ganny faver zonm; nou osi nou devret fer parey.

5. Ki mannyer nou pwennvi lo bann ki annan lotorite i diferan avek pour lemonn?

⁵ Sa kouraz ki nou annan pa parey avek en latitid antete ouswa rebel kont sistenm politik ki serten i annan. O kontrer, nou determinen pour aksepte lotorite Zeova plis ki sa ki pour nenport imen. Swa ki ou devret fer pa difisil kan lalwa zonm i lekontrer avek lalwa Bondye. Parey bann zapot dan premye syek, nou devret obeir Bondye plito ki zonm.

6. Akoz i pli meyer pour obeir komannman Zeova?

⁶ Kwa ki’n ed nou aksepte lotorite Bondye? Sa i akoz nou dakor avek sa ki Proverb 3:5, 6 i dir: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.” Nou krwar ki nenport kwa Bondye i ekspekte avek nou dan en fason ou en lot i pour nou prop dibyen. (Lir Deterononm 10:12, 13.) Deplis, Zeova ti dekrir son lekor avek bann Izraelit konman “sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse.” I ti azoute: “Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.” (Iza. 48:17, 18) Nou devret annan konfyans dan sa bann parol. Nou konvenki ki i touzour dan nou lavantaz si nou obeir komannman Bondye.

7. Ki nou devret fer menm si nou pa vreman konpran en komann ki ganny donnen dan Parol Bondye?

⁷ Menm si i arive ki nou pa konpran tou sa ki Zeova i ekspekte avek nou dan son Parol, nou aksepte Son lotorite e obeir li. Sa pa en lafwa ki san okenn laprev me plito se sanmenm sa konfyans. Sa i demontre konfyans total ki nou annan dan nou leker ki Zeova i konnen kwa ki bon pour nou. Nou lobeisans i osi demontre ki nou annan lanmour akoz zapot Zan ti ekrir: “La lanmour Bondye: ki nou obei son konmannman.” (1 Zan 5:3) Me i annan en lot laspe dan nou lobeisans ki nou pa devret inyore.

Devlop nou abilite pour fer diferans ant sa ki byen ek sa ki mal

8. Ki mannyer devlop nou abilite pour fer diferans ant sa ki byen ek sa ki mal i relye avek aksepte lotorite Zeova?

⁸ Labib i konsey nou pour devlop nou abilite pour “konn fer diferans ant sa ki byen ek sa ki mal.” (Ebr. 5:14) Alors, nou bi se pa zis obeir lalwa Bondye san reflesir lo la. O kontrer, nou anvi kapab “fer diferans ant sa ki byen ek sa ki mal” dapre standar Zeova. Nou anvi vwar lasazes dan fason azir Zeova pour ki nou kapab eksprim nou parey sa psalmis  ki ti dir: “Ou lalwa i oprofon dan mwan.”—Ps. 40:8.

9. Ki mannyer nou kapab aziste nou konsyans avek standar Zeova e akoz i enportan ki nou fer sa?

⁹ Parey sa psalmis, nou devret medit lo sa ki nou lir dan Labib pour ki nou ava kapab apresye lalwa Bondye. Par egzanp, kan nou aprann lo en serten keksoz ki Zeova i ekspekte nou fer, nou kapab demande: ‘Akoz sa komann ouswa prensip i saz? Akoz i pou pli bon pour mwan si mon obeir li? Ki move konsekans in arive lo bann ki pa’n ekout konsey Bondye lo sa size?’ Kan nou konsyans i azir an armoni avek fason azir Zeova, nou pou kapab fer bann desizyon ki an armoni avek son lavolonte. Nou pou kapab fer “tou [nou] posib pour [nou] konpran konman Senyer i oule [nou] azir” e swiv sa konsey par obeir li. (Efe. 5:17) I pa touzour fasil pour fer sa.

Satan i rod fason pour opoz lotorite Bondye

10. Dan ki domenn Satan i rod fason pour opoz lotorite Bondye?

¹⁰ Satan in touzour anvi opoz lotorite Bondye. Son kalite lespri endepandan i aparan dan plizyer fason. Pran par egzanp sa mank respe pour sa laranzman maryaz ki Bondye in etablir. Serten i viv dan menaz pandan ki lezot ki’n marye pe rod fason pour divorse avek zot konzwen. Tou le de group i kapab tonm lo menm konklizyon ki sa aktris byen renonmen ti dir: “I enposib pour bann seks opoze reste avek en sel partner.” I ti azoute: “Mon pa konn personn ki fidel avek zot konzwen ouswa ki anvi reste fidel.” Kan i ti pe reflesir lo son relasyon ki pa ti’n reisi, en akter byen popiler e ki annan preski menm pwennvi ti dir: “Mon pa asire si i dan nou natir pour nou reste avek en sel dimoun tou dilon nou lavi.” I ti pou bon si nou demann nou lekor: ‘Eski mon aksepte lotorite Zeova an sa ki konsern maryaz ouswa mon annan menm pwennvi avek lemonn ki dir ki maryaz pa dire?’

11, 12. (a) Akoz i kapab difisil pour bann zenn aksepte lotorite Zeova? (b) Akont en leksperyans pour montre en konsekans ki kapab annan kan lalwa ek prensip Zeova pa ganny obeir.

¹¹ Eski ou en zenn dan lorganizasyon Zeova? Si wi, i kapab ki Satan i vreman anvi ki ou krwar ki lotorite Zeova pa dan ou lavantaz. “Pasyon lazenes,” ansanm avek presyon sorti kot lezot zenn i kapab fer ou tonm lo sa konklizyon ki lalwa Bondye i en fardo. (2 Tim. 2:22) Pa les sa arive. Fer tou ou zefor pour vwar lasazes dan bann standar Bondye. Par egzanp, Labib i dir: “Elwanny zot avek bann pratik imoral.” (1 Kor. 6:18) La osi parey, demann ou lekor sa bann kestyon: ‘Akoz sa konsey i saz? Ki byenfe mon pou gannyen si mon obeir dan sa domenn?’ I kapab ki ou konn serten ki’n inyor konsey Bondye e ki pe pey konsekans zot aksyon. Eski zot vreman ere la konmela? Eski zot annan en pli meyer lavi ki sa enn ki zot ti rezwir kan zot ti asosye avek lorganizasyon Zeova? Eski zot in vreman trouv serten sekre ki anmenn boner ki larestan serviter Zeova pa’n trouve?—Lir Izai 65:14.

¹² Egzamin sa komanter ki en Kretyen ki apel Sharon ti fer en pe letan pase: “Mon’n ganny  sa maladi mortel ki apel SIDA akoz mon pa ti obeir lalwa Zeova. Plizyer fwa mon ti mazin lo sa kantite moman lazwa ki mon ti annan kan mon ti pe servi Zeova.” I ti rekonnet ki i ti bet pour li dezobeir lalwa Zeova e ki i ti’n devret rekonnet valer ki zot annan. Lalwa Zeova i pour nou prop proteksyon. Sharon ti mor set semenn apre ki i ti’n ekrir sa detrwa mo pli o. Malerezman parey son leksperyans i montre, Satan pa ofer nanryen ki bon pour bann ki anvi form parti son move sistenm. Konman “papa tou mansonz,” i fer bokou promes e i pa zanmen gard son promes, zis parey i ti fer avek Ev. (Zan 8:44) I pli meyer alor ki nou aksepte lotorite Zeova.

Protez ou kont en lespri endepandan

13. Dan ki domenn nou devret protez nou kont en lespri endepandan?

¹³ I enportan ki nou protez nou lekor kont sa lespri endepandan si nou aksepte lotorite Zeova. Larogans i kapab fer nou santi ki nou pa bezwen gidans lezot. Par egzanp, nou kapab rezet konsey bann ki donn gidans parmi pep Bondye. Bondye in met an plas en laranzman kot lesklav fidel e pridan i donn nou nouritir spirityel dan sa bon moman. (Mat. 24:45-47) Nou devret rekonnet avek limilite ki Zeova pe pran swen avek son pep ozordi dan sa fason. Imit bann zapot fidel. Kan serten disip ti ofanse e ale, Zezi ti demann son bann zapot: “E zot, zot pa anvi ale, zot osi?” Pyer ti reponn: “Senyer, kot lekel nou pou ale? Ou annan parol lavi eternel.”—Zan 6:66-68.

14, 15. Akoz avek limilite nou devret soumet avek konsey ki Labib i donnen?

¹⁴ Kan nou aksepte bann konsey ki sorti dan Labib sa i montre ki nou aksepte lotorite Zeova. Par egzanp, lesklav fidel e pridan in averti nou pour “reste vizilan e azen.” (1 Tesa. 5:6) Sa bann konsey parey i vreman apropriye pandan sa letan lafen kot bokou dimoun i “egois [e] kontan larzan.” (2 Tim. 3:1, 2) Eski sa bann latitid popiler i kapab annan lefe lo nou? Wi. Bann lobzektif ki pa spirityel i kapab plonz nou dan en sonmey spirityel ouswa i kapab fer nou adopte en latitid kot nou mazin zis keksoz materyel. (Lik 12:16-21) Alor, pa i pou pli saz si nou aksepte konsey ki Labib i donnen e evit sa stil lavi orgeye e egois ki popiler dan sa lemonn Satan!—1 Zan 2:16.

¹⁵ Sa nouritir spirityel ki lesklav fidel e pridan i fourni i ganny distribye avek sak kongregasyon par bann ansyen ki’n ganny apwente. Labib i konsey nou: “Obei zot bann dirizan e swiv zot lord; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.” (Ebr. 13:17) Eski sa i vedir ki bann ansyen i parfe? Non. Bondye i klerman konn zot lenperfeksyon plis ki imen. Kantmenm sa, i ekspekte ki nou soumet avek zot. Kan nou korpere avek bann ansyen, menm si zot enparfe, sa i donn levidans ki nou aksepte lotorite Zeova.

Akoz limilite i enportan?

16. Ki mannyer nou demontre respe pour Zezi konman Sef kongregasyon?

¹⁶ Nou devret touzour mazinen ki Zezi i Sef  kongregasyon. (Kol. 1:18) Se pour sa rezon ki avek limilite, nou devret soumet anba gidans bann ansyen ki’n ganny apwente e “montre ki [nou] estim sa bann frer.” (1 Tesa. 5:12, 13) Byensir, bann ansyen osi i devret montre ki zot soumet kan zot pas mesaz Bondye avek kongregasyon dan en bon fason e non pa donn zot prop lopinyon. Zot pa devret “al pli lwen ki sa ki’n ekri” pour ki zot pa promot zot prop lide.—1 Kor. 4:6.

17. Akoz en lespri anbisye i danzere?

¹⁷ Tou bann ki dan kongregasyon i devret konsyan danze ki kapab annan kan zot rod zot prop laglwar. (Prov. 25:27) I evidan ki zapot Zan ti zwenn en disip ki ti’n tonm dan sa latrap. I ti ekrir: “Dyotref ki kontan plas sef, pa aksepte mon lotorite. Pour sa rezon, si mon vini, mon pou montre tou sa ki i pe fer, bann parol mesanste ek kalomni ki i pe dir lo mwan.” (3 Zan 9, 10) Nou osi ozordi nou kapab tir en leson ladan. I annan bon rezon akoz nou devret retir tou latras okenn lanbisyon dan nou. Labib i dir nou: “Avan maler i annan lorgey, e avan fo pa en lespri arogan.” Bann ki aksepte lotorite Bondye i devret retir okenn pti latras la­rogans dan zot akoz en tel latitid i anmenn laont.—Prov. 11:2; 16:18.

18. Kwa ki pou ed ou aksepte lotorite Zeova?

¹⁸ Wi, fer li en lobzektif pour rezet en lespri endepandan dan sa lemonn e aksepte lotorite Zeova. De tanzantan, medit avek lapresyasyon lo sa gran privilez ki ou annan pour servi Zeova. Lefet ki ou form parti pep Bondye, i evidan ki i’n atir ou ver li atraver son lespri sen. (Zan 6:44) Pa zanmen pran ou relasyon avek Zeova alalezer. Dan tou laspe ou lavi, fer ou mye pour montre ki ou rezet en lespri endepandan e ki ou aksepte lotorite Zeova.

Eski ou rapel?

• Aksepte lotorite Zeova i enplik kwa?

• Ki mannyer devlop nou abilite pour fer diferans ant sa ki byen ek sa ki mal i relye avek aksepte lotorite Zeova?

• Dan ki domenn Satan i esey opoz lotorite Bondye?

• Akoz i enportan pour annan limilite kan nou pe aksepte lotorite Zeova?

[Kestyon]

[Portre lo paz 26]

“Nou devre obei Bondye plito ki zonm”

[Portre lo paz 26]

I touzour pli saz pour obeir standar Bondye