Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Unsay kahulogan sa Kristohanong bawtismo?

Ang bawtismo maoy paghangyo sa Diyos ug maayong relasyon uban kaniya. Busa, ang usa ka Kristohanon angayng bawtismohan, dili sa masuso pa, kondili sa dihang makahimo na siya sa pagkat-on bahin sa Diyos ug mahimong tinun-an ni Jesus. (Buhat 8:12; 1 Pedro 3:21) Kita mahimong tinun-an ni Jesus kon atong tun-an ug buhaton ang iyang mga sugo.—Basaha ang Mateo 28:19, 20.

Sa panahon sa mga apostoles ni Jesus, daghan ang wala maglangan sa pagkat-on bahin sa Diyos ug kang Jesus. Pananglitan, sa dihang nakat-onan sa usa ka lalaki nga pinaagi sa kamatayon ni Jesus nahimong posible ang kaluwasan, siya nahimo dayong tinun-an. Karon, daghang sinserong mga tawo ang mipili nga mahimong sumusunod ni Jesus.—Basaha ang Buhat 8:26-31, 35-38.

2. Nganong gibawtismohan man si Jesus?

Si Jesus mga 30 anyos sa dihang siya gituslob ni Juan Bawtista sa Suba sa Jordan. Ang bawtismo ni Jesus nagsimbolo sa iyang desisyon nga buhaton ang kabubut-on sa Diyos alang kaniya. (Hebreohanon 10:7) Lakip niini ang paghalad sa iyang kinabuhi alang sa sala sa katawhan. Bisan sa wala pa siya moanhi sa yuta, si Jesus nahigugma ug nagtuman na gayod sa iyang Amahan, si Jehova.—Basaha ang Marcos 1:9-11; Juan 8:29; 17:5.

  3. Nganong angayng bawtismohan ang usa ka Kristohanon?

Lahi ang atong kahimtang nianang kang Jesus kay kita natawong makasasala. Bisan pa niana, pinaagi sa kamatayon ni Jesus, kita mahimong makabaton ug maayong relasyon sa Diyos. (Roma 5:10, 12; 12:1, 2) Posible gayod nga mahimo kitang membro sa iyang pamilya. (2 Corinto 6:18) Sa unsang paagi nato mabatonan kana nga pribilehiyo? Sa pribadong pag-ampo, atong ipahinungod ang atong kaugalingon kang Jehova, nga manaad nga buhaton ang iyang kabubut-on sa tibuok natong kinabuhi. Human sa maong pagpahinungod, ato kanang ipakita sa publiko pinaagig bawtismo.—Basaha ang Mateo 16:24; 1 Pedro 4:2.

4. Unsay imong himoon aron mokuwalipikar sa bawtismo?

Ang mga Saksi ni Jehova nagdumalag pagtuon sa Bibliya niadtong buot makigsuod sa Diyos. Ang pagtuon sa Bibliya ug pagtambong sa Kristohanong mga tigom makapalig-on sa imong gugma ug pagtuo sa Diyos. Kana makatabang usab kanimo nga maugmad ang maayong tinamdan ug panggawi. Ang pag-ugmad sa gugma, pagtuo, ug sa ubang diyosnong hiyas makatabang nimo sa pagtuman sa imong panaad nga mag-alagad kang Jehova hangtod sa hangtod.—Basaha ang Juan 17:3; Hebreohanon 10:24, 25.

Alang sa dugang impormasyon, tan-awa ang kapitulo 18 niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.