‘Pagbantay sa Lebadura sa mga Pariseo’

Gipasidan-an ni Jesus ang iyang mga tinun-an: ‘Pagbantay sa lebadura sa mga Pariseo, nga maoy pagkasalingkapaw.’ (Luc. 12:1) Sa susamang asoy, giklaro ni Mateo nga ang gisaway ni Jesus mao ang “pagtulon-an” sa mga Pariseo.—Mat. 16:12.

Usahay gigamit sa Bibliya ang “lebadura,” o igpapatubo, ingong simbolo sa pagkadunot. Busa ang mga pagtulon-an ug tinamdan sa mga Pariseo makadaot sa ilang mamiminaw. Ngano?

1 Ang mga Pariseo nag-isip sa ilang kaugalingon nga matarong ug nagtamay sa ordinaryong mga tawo.

Ang maong pagpakamatarong sa kaugalingon gihisgotan ni Jesus sa usa sa iyang mga sambingay. Siya miingon: “Ang Pariseo mitindog ug nag-ampo niining mga butanga sa iyang kaugalingon, ‘Oh Diyos, nagapasalamat ako kanimo nga dili ako sama sa ubang mga tawo, mga mangingilkil, mga dili-matarong, mga mananapaw, o gani sama niining maniningil ug buhis. Nagpuasa ako makaduha sa usa ka semana, nagahatag akog ikapulo sa tanang butang nga akong nabatonan.’ Apan ang maniningil ug buhis nga nagtindog sa halayo dili gani buot moyahat sa iyang mga mata sa langit, apan nagpamukpok sa iyang dughan, nga nag-ingon, ‘Oh Diyos, magmapuangoron ka kanako nga usa ka makasasala.’”—Luc. 18:11-13.

Gidayeg ni Jesus ang pagkamapaubsanon sa maniningil ug buhis: “Sultihan ko kamo, Kining tawhana mipauli sa iyang puloy-anan nga napamatud-ang mas matarong kay [sa Pariseo]; tungod kay ang matag usa nga magabayaw sa iyang kaugalingon igapaubos, apan siya nga magapaubos sa iyang kaugalingon igabayaw.” (Luc. 18:14) Bisag ang mga maniningil ug buhis nailhan nga dili matinud-anon, gusto silang tabangan ni Jesus. Gani duha kanila, si Mateo ug Zaqueo, nahimo niyang mga sumusunod.

Komosta kon maghunahuna kita nga labaw sa uban tungod sa atong katakos o pribilehiyo o tungod sa kapakyasan o kahuyangan sa uban? Isalikway dayon nato kini, kay ang Bibliya nag-ingon: “Ang gugma mapailobon; ang gugma maluloton ug dili masinahon. Ang gugma dili mapahitas-on, ni manghambog, ni bastos; dili mangita sa kaugalingong interes, dili daling masuko. Ang gugma dili madumtanon; dili mahimuot sa daotang gibuhat, apan malipay sa kamatuoran.”—1 Cor. 13:4-6, The New English Bible.

Atong sundogon ang tinamdan ni Pablo. Human miingon nga “si Kristo Jesus mianhi sa kalibotan aron sa pagluwas sa mga makasasala,” siya midugang: “Niini nila ako maoy kinalabwan.”—1 Tim. 1:15.

Mga pangutana nga palandongon:

Giila ko ba nga ako makasasala ug ang akong kaluwasan nagdepende sa dili takos nga kalulot ni Jehova? O mibati ba kong labaw sa uban kay dugay na kong nag-alagad nga matinumanon, may mga pribilehiyo sa kongregasyon, o may mga abilidad nga wala sa uban?

2 Ang mga Pariseo nagpabilib sa uban pinaagi sa publikong pagpasundayag sa ilang pagkamatarong. Gusto nilang mainila ug makabatog dungganong mga titulo.

 Apan si Jesus nagpasidaan: “Ang tanang buluhaton nga ginabuhat nila ginabuhat nila aron makita sa mga tawo; kay ginapalapad nila ang mga kahita nga sudlanag kasulatan nga ilang ginasul-ob ingong panalipod, ug ginapadako ang mga borlas sa ilang mga besti. Buot nila ang labing dungganong dapit panahon sa mga panihapon ug ang unahang mga lingkoranan sa mga sinagoga, ug ang mga timbaya diha sa mga tiyanggihan ug pagatawgon nga Rabbi sa mga tawo.” (Mat. 23:5-7) Lahi gayod ang tinamdan ni Jesus. Bisag hingpit nga Anak sa Diyos, siya mapainubsanon. Dihang may lalaki nga nagtawag kaniya nga “maayo,” si Jesus miingon: “Nganong gitawag mo ako nga maayo? Walay bisan kinsa nga maayo, gawas sa usa, ang Diyos.” (Mar. 10:18) Sa laing okasyon, gihugasan ni Jesus ang tiil sa iyang mga tinun-an, nga naghatag kanilag panig-ingnan sa pagkamapaubsanon.—Juan 13:1-15.

Ang matuod nga Kristohanon mag-alagad sa iyang isigkamagtutuo. (Gal. 5:13) Ilabina kining ipakita niadtong buot nga mahimong magtatan-aw sa kongregasyon. Dili man sayop nga ‘mangab-ot ug katungdanan sa pagkamagtatan-aw,’ apan angay nga ang motibo mao ang pagtabang sa uban. Kini nga “katungdanan” dili usa ka posisyon aron mainila o mahimong labaw. Ang mga magtatan-aw kinahanglang “mapainubsanon sa kasingkasing,” sama kang Jesus.—1 Tim. 3:1, 6; Mat. 11:29.

Mga pangutana nga palandongon:

Mas maayo ba ang akong pagtratar niadtong may mga responsabilidad sa kongregasyon aron hatagan ko nilag dugang pribilehiyo? Sa akong pag-alagad, gipili lang ba nako ang mga buluhaton nga maghimo nakong inila ug aron dayegon ko sa uban? Naningkamot ba kong molabaw sa uban?

3 Ang mga lagda ug tradisyon sa mga Pariseo nakapabug-at sa ordinaryong mga tawo sa pagtuman sa Balaod.

 Gihatag ni Jehova ang iyang Balaod ngadto sa Israel aron mahibalo sila kon unsaon siya pagsimba. Apan wala kini maghatag sa tanang detalye. Pananglitan, ang Balaod nagdili sa pagtrabaho panahon sa Igpapahulay, apan wala kini espesipikong giingon kon unsang trabaho ang pwede o dili pwedeng himoon. (Ex. 20:10) Busa gidugang sa mga Pariseo ang kaugalingon nilang mga lagda ug tradisyon kay dili kono detalyado ang Balaod. Gisalikway ni Jesus ang dili makataronganong mga lagda sa mga Pariseo, apan gituman niya ang Moisesnong Balaod. (Mat. 5:17, 18; 23:23) Nasabtan niya ang diwa ug katuyoan sa Balaod. Nahibalo siya nga ang mga tawo nagkinahanglag kaluoy ug kahangawa. Siya makataronganon, bisan sa panahong nasayop ang iyang mga tinun-an. Pananglitan, bisag giingnan ni Jesus ang iyang tulo ka apostoles nga magtukaw ug padayong magbantay sa gabii nga dakpon siya, balikbalik gihapon silang nakatulog. Apan iyang gisabot sila ug miingon: “Hinuon, maikagon ang espiritu, apan maluya ang unod.”—Mar. 14:34-42.

Mga pangutana nga palandongon:

Nagahimo ba kog kaugalingong mga lagda o nagapugos sa uban sa pagsunod sa akong opinyon? Makataronganon ba ko sa akong gidahom sa uban?

Palandonga ang kalainan sa pagtulon-an ni Jesus ug sa mga Pariseo. Duna ka bay nakitang pauswagonon sa imong kaugalingon? Kon duna, paningkamoting mapauswag kana.

[Hulagway sa panid 28]

Ang mga Pariseo nagsul-ob ug mga kahita nga sudlanag kasulatan.—Mat. 23:2, 5.

[Mga hulagway sa panid 29]

Dili sama sa mapahitas-ong mga Pariseo, ang mapaubsanong mga ansiyano nag-alagad sa uban

[Hulagway sa panid 30]

Sama kang Jesus, ikaw ba makataronganon sa imong gidahom sa uban?