SA USA ka nasod sa Asia, ang mga tawo nagsaulog ug pista nga nagpasidungog sa mga espiritu. Naghinamhinam ang tanan nga makasaksi sa seremonyas diin ang duha ka babaye nga gipili sudlan ug espiritu. Ang ilang mata misulirap, ug dayon ang mga babaye nagkurog-kurog nga morag nakoryentehan.

Sa Puerto Rico, ang usa ka espiritista (santero) nagsangpit sa usa ka espiritu nga ginganlag Changó, ang diyos sa dalugdog. Gihubit sa espiritista ang iyang nakita, ug ang tanan diha sa lawak nangurog nga morag gisudlan ug espiritu.

Daghan karon ang nalangkit sa okulto sa lainlaing dapit sa kalibotan. Nagkadaghan ang naikag ug mituo sa misteryosong mga butang. Ang mga libro, mga dula, mga programa sa telebisyon, ug mga pelikula nga nagpasiugdag mga demonyo, pamarang, ug dili-kinaiyanhong mga butang mas komon karon.

Apan, ang Bibliya nagtudlo nga ang pagpakigbahin sa bisan unsang butang nga nalangkit sa okulto matawag nga espiritismo. Ang espiritismo makadaot. Kini dili lamang basta pagsusi sa misteryosong mga butang, kondili kini maoy pagsangpit sa mga demonyo, ang daotang mga manulonda nga mirebelde sa Diyos.​—Pinadayag 12:9, 12.

Sa pagkatinuod, ang espiritismo gigamit sa mga demonyo sama nga ang mga paon gigamit sa mga mangingisda. Ang usa ka mangingisda mogamit ug lainlaing paon aron makakuhag nagkadaiyang matang sa isda. Sa susama, ang daotang mga espiritu mogamit ug lainlaing matang sa espiritismo aron mabitik ang tanang matang sa mga tawo. Diha sa Bibliya ang pangulo sa mga demonyo gitawag ug ‘diyos niining [daotang] sistema sa mga butang.’ Iyang gibutaan ang hunahuna sa mga dili-magtutuo aron dili sila makasabot sa kamatuoran sa Pulong sa Diyos ug sa Iyang katuyoan.​—2 Corinto 4:4.

Ang tumong sa daotang mga espiritu mao kini: Gusto nila nga kita malinga aron dili kita makaugmad ug suod nga relasyon sa atong Maglalalang. Ilang impluwensiyahan ang mga tawo sa pagsupak sa matarong nga mga balaod sa Diyos, nahibalo man niini ang mga tawo o wala. Busa, ang pagkalangkit sa espiritismo mosangpot sa pagkasinalikway sa Diyos, kawalay-paglaom, ug sa ulahi, sa pagkalaglag.​—Pinadayag 21:8.

Si Luis, nga taga-Puerto Rico, nag-ingon: “Sukad sa pagkamatngon nakog buot, ang among pamilya nalangkit na sa espiritismo. Bahin na kini sa among relihiyon ug sa among pagkinabuhi. Abi nakog gitugahan ko ug abilidad nga makatag-an sa umaabot ug makabasa ug mga barahang tarot. Sagad makapili akog mga numero nga pustaan sa uban aron sila makadaog sa loteriya. Kini nga abilidad nakapugong kanako sa pagkuhag kahibalo sa Bibliya ug sa pagpakigsuod sa Diyos.”​—Juan 17:3.

Daghan ang nagtuo nga dili makadaot ang pagsusi  sa kalibotan sa espiritu, hinunoa, mapuslanon pa gani. Tingali maghisgot sila nga duna konoy buotan nga mga multo o mangangkon nga ang mga buhat nga nalangkit sa espiritismo makahatag ug talagsaong kinaadman, makapadato, o makapalipay. Dili kana tinuod. “Aduna gayoy bugti niana,” matod pa ni Luis.

Ang usa ka batan-ong lalaki nga ginganlag Chad nagsugod sa pagkakitag makahahadlok nga mga panan-awon ug kanunayng matugaw sa iyang pagkatulog. “Kada gabii, hasion ug sakiton ako sa mga demonyo,” matod pa niya. Sa unsang paagi kita mapanalipdan batok nianang maong mga pag-atake?

Aron atong mapanalipdan ang atong kaugalingon, kinahanglan natong likayan ang bisan unsa nga nalangkit sa espiritismo. (Galacia 5:19-21) Busa, si Jehova nga Diyos nagsugo sa iyang mga alagad sa paglikay sa mosunod nga mga buhat: “Walay makaplagan diha kanimo nga . . . bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.”​—Deuteronomio 18:10-12.

Sa pagsunod niana, giwagtang sa daghan ang bisan unsang basahon o ubang mga butang nga nalangkit sa espiritismo aron mapanalipdan ang ilang kaugalingon. Si Ken nga nakabiya na sa espiritismo miingon, “Akong gisusi ang tanan nakong butang ug giwagtang ang bisan unsa nga may koneksiyon sa espiritismo.”​—Tan-awa ang Buhat 19:19, 20.

Ang kinalabwang panalipod batok sa daotang espiritu mao ang pag-ugmad ug suod nga relasyon uban sa matuod nga Diyos, si Jehova. Matikdi kon unsay angay natong himoon sumala sa giingon sa Santiago 4:7, 8: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo. Duol sa Diyos, ug siya moduol kaninyo. Hinloi ang inyong mga kamot, kamong mga makasasala, ug lunsaya ang inyong mga kasingkasing, kamong mga maduhaduhaon.”

Tudloan ug panalipdan ni Jehova nga Diyos kadtong moduol o makigsuod kaniya. Sila mahibalo sa ‘mga laraw ni Satanas’ ug dili malimbongan sa iyang pagtakoban. (2 Corinto 2:11; 11:14) Gawas pa, si Jehova mao ang Labing Gamhanan nga Diyos. Kon ang usa motuo ug mosangpit kaniya, siya pagaluwason ni Jehova gikan sa mga kamot sa daotang mga espiritu. Si Chad nga gikutlo ganina miingon, “Kay nasayod ako kon kinsay nanghasi kanako, ako nangamuyo kang Jehova nga Diyos alang sa panalipod, ug tungod niana, ang mga demonyo mihunong na sa pag-atake kanako.”​—Salmo 91:1, 2.

Gipakita niini nga kasinatian nga bisan karon, ang matarog-kasingkasing nga mga tawo makalaom nga panalipdan sa Diyos ug makasalig nga sa dili madugay ang mga demonyo ug ang tanan nga nagpaimpluwensiya kanila pagalaglagon. Handurawa lang ang kalipay ug kalinaw nga maghari unya sa yuta sa dihang ang katawhan maluwas na gikan sa mga epekto sa espiritismo!​—Isaias 11:9; Pinadayag 22:15.