Ang Pagkamanggihatagon ba ang Solusyon?

ANG kinaiyanhong mga katalagman, kakabos, gutom, sakit, ug hulga sa kalikopan maoy kanunayng ulohan sa mga balita. Apan duna usay usa ka makapalipayng balita​—ang nagkadaghang buhat sa pagkamanggihatagon. Atong madunggan usahay ang bahin sa mga adunahan nga nagdonar ug minilyon, o binilyon ka dolyar pa gani alang sa kaayohan sa uban. Sagad nga gipahimuslan sa inilang mga personalidad ang ilang kabantog aron makuha ang pagtagad sa mga tawo ngadto sa dagkong mga problema. Bisan ang mga tawo nga kasarangan ug kinitaan naghatag usab ug mga donasyon. Apan sa unsang sukod nga ang pagkamanggihatagon makatabang, ilabina sa umaabot nga mga tuig?

Usa ka Maayong Yugto sa Pagpanghatag?

Diha sa pipila ka kayutaan, nagkadaghan ang mga manggihatagon. “Sa pagsugod sa ika-21 nga siglo, mas daghang institusyon sa mga pilantropo ang mas dakog pondo diha sa mas daghang nasod kay sukad masukad,” nag-ingon ang usa ka basahon. Gituohan nga magpadayon kini nga mga buhat samtang magkadaghan ang mahimong adunahan. Gidahom nga modako pa ang pondo sa mga institusyon tungod kay mas daghan na man ang modonar kanila, ug inigkamatay sa mga adunahan mahimong ilang ipapanunod sa maong mga institusyon ang ilang mga bahandi. Kini ang hinungdan kon nganong ang basahong The Economist sa Britanya nag-ingon nga tingali mao na kini ang sinugdanan sa “usa ka maayong yugto sa pagkamanggihatagon.”

Tungod sa pagkapakyas sa mga gobyerno sa pagtaganag dinaliang solusyon sa mga problema sa tibuok kalibotan, daghang tawo ang nahimong manggihatagon. Ang espesyal nga hawas sa UN ngadto sa Aprika alang sa HIV ug AIDS nag-ingon nga  ang “dili-maayong pagdumala sa gobyerno” ang hinungdan kon nganong nagkadaghang inila nga mga personalidad ang nahimong aktibo sa mga isyu bahin sa panglawas sa tibuok kalibotan. Nalangkit man ang problema sa kakabos, panglawas, kalikopan, edukasyon, o hustisya, ang mga adunahan ilabinang “nawad-ag pailob tungod sa kakulang sa mga paningkamot sa gobyerno ug sa mga nasod sa pagsulbad niining mga problemaha,” matod ni Joel Fleishman diha sa iyang librong The Foundation: A Great American Secret​—How Private Wealth Is Changing the World. Kay naghinamhinam sa pagsulbad niining mga sulirana, gigamit sa pipila ka adunahang pilantropo ang mga pamaagi nga maoy hinungdan nga miasenso sila sa ilang negosyo.

Mahimo sa mga Pilantropo

Sa pagsugod sa mga tuig 1900 mibutho ang daghang pilantropo. Nahunahunaan sa impluwensiyado nga mga negosyante sama ni Andrew Carnegie ug John D. Rockefeller, Sr., nga gamiton ang ilang salapi aron tabangan ang mga nanginahanglan. Ilang nakita nga ang naandang mga pamaagi sa pagtabang wala makasulbad sa mga hinungdan sa problema, bisan pag nakatabang kini sa pagpakaon sa mga gigutom o pagtambal sa masakiton nga mga bata. Sila nagtuo nga gikinahanglan ang mas organisadong paagi sa pagpanghatag. Tungod niini, sila nagmugnag mga institusyon nga magpasiugda ug kausaban diha sa katilingban ug aron makakolektag pondo nga magamit sa pagsulbad sa pangunang hinungdan sa mga problema. Sukad niadtong mga tuiga, tinagpulo ka libong institusyon ang natukod sa tibuok kalibotan, kapig 50 niini ang may pondo nga kapin sa usa ka bilyong dolyar.

Kini nga mga institusyon nakahatag gayod ug daghang kaayohan. Daghang eskuylahan, librarya, ospital, parke, ug mga museyo ang natukod. Diha usay gihimong mga programa aron mas modaghan ang produksiyon sa pagkaon. Nakatabang kini sa pagtaganag mas daghang pagkaon ngadto sa kabos nga mga nasod. Ang paghatag ug pondo alang sa medikal nga panukiduki nakatabang sa pagpauswag sa pag-atiman sa panglawas ug, sa pipila ka kaso, nakatabang sa pagsumpo sa pipila ka sakit, sama sa yellow fever.

Karong adlawa, sa tabang sa mga tawo nga naningkamot sa pagsumpo sa mga problema sa tibuok kalibotan uban ang pagkadinalian ug mas dakong pondo kay sukad masukad, daghan ang nagtuo nga masulbad ra ang mga problema. Ang usa ka kanhing presidente sa U.S. miingon ngadto sa usa ka grupo sa mga pilantropo niadtong 2006: “Nakatabang gayod ug dako sa katawhan ang mga donasyon sa mga indibiduwal ug pribado nga mga institusyon.”

Hinunoa, lahi ang panglantaw sa daghan. Si Laurie Garrett, nga usa ka eksperto bahin sa pag-atiman sa panglawas, misulat: “Ang usa lagmit maghunahuna nga hapit nang masulbad ang mga problema sa tibuok-kalibotan bahin sa panglawas tungod sa kadako sa pondo. Apan sayop kana.” Ngano? Gipunting ni Garrett ang dili maayong pagdumala, korapsiyon, dili pagtinabangay, ug ang ginahimo sa mga tigdonar nga igahin lamang ang ilang mga donasyon alang sa partikular nga mga suliran sa panglawas, sama sa AIDS.

Sanglit dili maayo ang pagkadumala, ug ang pondo sa mga institusyon “sagad gigahin alang lamang sa pipila ka grabeng sakit​—imbes igahin alang sa kaayohan sa tanan,” si Garrett nagtuo nga “adunay dakong kapeligrohan nga ang mga buhat sa pagkamanggihatagon karon mapakyas ug makapasamot lang hinuon sa problema.”

Kon Nganong Dili Pa Igo ang Salapi

Bisan unsa pay tumong sa mga pilantropo, limitado lamang ang ilang mahimong kalamposan. Ngano? Ang usa ka rason mao nga walay mahimo ang salapi ni ang maayong edukasyon sa pagwagtang sa mga problema sama sa kadalo, pagdumot, diskriminasyon, nasyonalismo, pagpihigpihig sa tribo, ug bakak nga mga tinuohan. Bisan pag nakaamot kining mga butanga sa kasakit sa mga tawo, dili kini mao ang pangunang hinungdan sa pag-antos. Ang Bibliya nag-ingon nga adunay pangunang mga hinungdan sa pag-antos sa tawo.

Ang usa niana mao ang pagkadili-hingpit sa tawo tungod sa sala. (Roma 3:23; 5:12) Kini ang hinungdan kon nganong kita makiling sa paghunahuna ug sa pagbuhat ug daotan. Ang Genesis 8:21 nag-ingon: “Ang kiling sa kasingkasing sa tawo daotan sukad pa sa iyang pagkabatan-on.” Milyonmilyon ang nakahimog seksuwal nga imoralidad ug pag-abuso sa droga tungod kay sila nagpadaog sa maong daotang kiling. Kini nga mga buhat maoy nakaingon  sa pagkaylap sa lainlaing sakit, sama sa AIDS.​—Roma 1:26, 27.

Ang ikaduhang hinungdan sa pag-antos sa tawo mao ang kawala natoy katakos nga mandoan ang atong kaugalingon sa epektibong paagi. “Dili iya sa yutan-ong tawo . . . ang pagtultol sa iyang lakang,” nag-ingon ang Jeremias 10:23. Ang “dili-maayong pagdumala sa gobyerno,” nga gihisgotan sa ibabaw, maoy usa sa mga hinungdan kon nganong wala na maghulat pa sa tabang sa gobyerno ang daghang institusyon. Ang Bibliya nagpatin-aw nga ang mga tawo makiling sa pagdangop sa Maglalalang ingong Magmamando, dili sa ilang isigkatawo.​—Isaias 33:22.

Dugang pa, ang Bibliya nagsaad nga sulbaron sa Maglalalang, si Jehova nga Diyos, ang tanang suliran sa katawhan. Sa pagkatinuod, nakahimo na siyag dagkong butang aron matapos ang pag-antos.

Ang Labing-Manggihatagong Pilantropo

Ang pulong “pilantropo” naggikan sa Gregong pulong nga nagkahulogang “gugma alang sa katawhan.” Ang atong Maglalalang mao ang may kinadak-ang gugma alang sa katawhan. Ang Juan 3:16 nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” Sa pagkatinuod, labaw pa sa salapi ang gihatag ni Jehova aron makalingkawas ang katawhan gikan sa talikala sa sala ug kamatayon. Iyang gihatag ang iyang pinalanggang Anak isip “lukat baylo sa daghan.” (Mateo 20:28) Bahin kang Jesus, si apostol Pedro misulat: “Siya nagpas-an sa atong mga sala diha sa iyang kaugalingong lawas sa estaka, aron kita mamatay ngadto sa kasal-anan ug mabuhi ngadto sa pagkamatarong. Ug ‘pinaagi sa iyang mga labod kamo nangaayo.’”​—1 Pedro 2:24.

Si Jehova mihimo usab ug mga kahikayan sa pagsulbad sa problema bahin sa pagmando. Sa paghimo niana, iyang gitukod ang usa ka gobyerno nga momando sa kalibotan, ang Gingharian sa Diyos. Kining maong Gingharian magmando gikan sa mga langit, ug maglaglag sa tanang daotang tawo ug magpatunghag pakigdait ug panaghiusa sa Planetang Yuta.​—Salmo 37:10, 11; Daniel 2:44; 7:13, 14.

Pinaagi sa pagsulbad sa pangunang mga hinungdan sa pag-antos sa tawo, ang Diyos magahimo sa butang nga dili gayod mahimo sa tawo, ingong indibiduwal ug ingong grupo. Tungod niini, imbes magtukod ug mga institusyon alang sa pagpanghatag, agig pagsundog kang Jesu-Kristo, ang mga Saksi ni Jehova migugol sa ilang panahon ug salapi sa pagsangyaw sa “maayong balita sa gingharian [sa Diyos].”​—Mateo 24:14; Lucas 4:43.

[Kahon/​Hulagway sa panid 21]

“Gihigugma sa Diyos ang Malipayong Maghahatag”

Kana nga mga pulong nga mabasa sa Bibliya diha sa 2 Corinto 9:7, mao ang nagagiyang prinsipyo sa mga Saksi ni Jehova. Sa paghatag sa ilang panahon, kusog, ug materyal nga mga butang alang sa kaayohan sa uban, sila naningkamot sa pagsunod niining maong awhag: “Maghigugmaay kita, dili pinaagi sa pulong ni sa dila, kondili sa buhat ug sa kamatuoran.”​—1 Juan 3:18.

Panahon sa panginahanglan, sama sa kinaiyanhong mga katalagman, giisip sa mga Saksi nga pribilehiyo ang pagtabang sa mga biktima. Pananglitan, human nga gilampornas sa mga Bagyong Katrina, Rita, ug Wilma ang habagatang mga rehiyon sa Tinipong Bansa, nanghugop ang linibo ka boluntaryong mga Saksi ngadto sa mga dapit nga apektado aron suportahan ang paghatag ug mga hinabang ug ang pagpanukod pag-usab. Ubos sa pagdumala sa mga komite sa maong mga dapit alang sa mga hinabang, giayo sa mga boluntaryo ang kapin sa 5,600 ka balay sa mga Saksi ni Jehova ug ang 90 ka Kingdom Hall. Sa kataposan natabangan nila ang halos tanang naapektohan.

Ang mga Saksi ni Jehova wala mangolektag ikapulo sa ilang mga membro ug wala sila mangayog mga pondo. Ang ilang buluhaton bug-os nga gisuportahan sa mga kontribusyon.​—Mateo 6:3, 4; 2 Corinto 8:12.

[Mga hulagway sa panid 19]

Walay mahimo ang salapi sa pagwagtang sa pangunang hinungdan sa sakit ug pag-antos sa tawo

[Credit Line]

© Chris de Bode/​Panos Pictures