Sa Dihang ang Sakit Mawala Na!

DAGHANG tawo naglaom nga sila makatagamtam ug kahupayan gikan sa kasakit ug balatian didto sa laing kinabuhi sa langit. Apan, sukwahi sa kasagarang pagtuo, ang tinuod nga paglaom nga gitanyag sa Bibliya alang sa mga tawo sa katibuk-an mao ang kinabuhi diha sa usa ka yutan-ong paraiso. (Salmo 37:11; 115:16) Kining gisaad nga palaaboton naglakip ug hingpit nga panglawas, kalipay, ug kinabuhing walay kataposan.

Nganong kita masakit man ug mamatay? Ug sa unsang paagi molungtad ang usa ka kalibotan nga wala nay sakit? Ang Bibliya nagtubag nianang mga pangutanaha.

◼ Ang tinuod nga hinungdan sa sakit Si Adan ug Eva, ang atong unang mga ginikanan, gilalang nga may hingpit ug himsog nga mga lawas. (Genesis 1:31; Deuteronomio 32:4) Sila gidisenyo nga mabuhi sa walay kataposan sa yuta. Apan sa dihang sila tinuyo nga mirebelde sa Diyos, ang ilang mga lawas mahimo nang takboyan ug sakit. (Genesis 3:17-19) Pinaagi sa pagsalikway sa awtoridad sa Diyos, sila mibulag sa ilang Maglalalang, ang Tinubdan sa ilang hingpit nga kinabuhi. Sila nahimong depektoso. Tungod niini sila nasakit ug namatay, nga maoy gipasidaan sa Diyos nga mahitabo kanila.—Genesis 2:16, 17; 5:5.

Human sa pagrebelde ni Adan ug Eva, lunlon pagkadili-hingpit ang ilang gipasa ngadto sa ilang mga anak. (Roma 5:12) Sama sa gihisgotan sa nag-unang artikulo, giila sa mga siyentipiko karon nga kita  adunay napanunod nga mga depekto nga moresulta sa sakit ug kamatayon. Human ang mabug-osong pagpanukiduki, usa ka grupo sa mga siyentipiko mihinapos dili pa dugay: “Ang dili-ikapangulipas nga kamatuoran sa biolohiya mao nga inigsugod sa kinabuhi, ang lawas magsugod sa pagdaot sa kaugalingon niini.”

◼ Dili pinaagi sa paningkamot sa tawo Talagsaon ang kalamposan sa siyensiya sa pagpakigbugno batok sa sakit. Apan ang siyensiya dili gayod bug-os makasulbad sa hinungdan sa sakit. Dili kini katingad-an alang sa mga estudyante sa Bibliya nga nahibalo sa inspiradong mga pulong sa Diyos: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan.”—Salmo 146:3.

Apan, sumala sa gipahayag sa Bibliya, “ang mga butang nga imposible sa tawo maoy posible sa Diyos.” (Lucas 18:27) Si Jehova nga Diyos may katakos sa pagwagtang sa hinungdan sa sakit. Iyang ayohon ang tanan natong mga balatian. (Salmo 103:3) Ang iyang inspiradong Pulong nagsaad: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.

◼ Kon unsay imong kinahanglang buhaton Klaro nga gipatin-aw ni Jesus kon unsay atong angayng buhaton aron matagamtam sa umaabot ang usa ka kalibotan nga wala nay sakit. Siya miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Ang kahibalo bahin sa Diyos ug ang mga pagtulon-an sa iyang Anak, si Jesus, mabasa diha sa Bibliya. Ang maong kahibalo naglakip ug praktikal nga tambag nga makapauswag sa imong kinabuhi karon. Apan labaw sa tanan, ang Diyos nagsaad ug usa ka kalibotan diin ang iyang masinugtanong mga magsisimba dili na masakit. Oo, ang Diyos nagtanyag kanimo ug usa ka palaaboton diin ‘wala nay pumoluyo nga moingon: “Ako masakiton”’!—Isaias 33:24.

[Kahon/Mga hulagway sa panid 11]

Usa ka Timbang nga Panglantaw sa Panglawas

Ang Bibliya nagpasiugda ug pagtahod sa kinabuhi. Ang mga Saksi ni Jehova nagpasundayag sa maong pagtahod pinaagi sa pagpaningkamot sa pag-atiman sa ilang panglawas. Sila naglikay sa makadaot nga mga buhat, sama sa pag-abuso sa droga ug pagpanabako. Buot sa Diyos nga ang iyang mga magsisimba magmakasaranganon sa ilang mga batasan sa pag-inom ug pagkaon. (Proverbio 23:20; Tito 2:2, 3) Ang maong praktikal nga mga lakang uban ang bastanteng pahulay ug ehersisyo makatabang aron dili daling matakboyan ug malikayan ang daghang sakit. Kadtong dunay mga sakit mahimong nagkinahanglan sa tabang sa kasaligang mga espesyalista.

Ang Bibliya nagpasiugda ug pagkamakataronganon ug “maayong panghunahuna.” (Tito 2:12; Filipos 4:5) Daghan karon ang dili timbang ug nalinga pag-ayo sa ilang pagpangitag tambal, nga gipasagdan bisan ang ilang espirituwalidad. Ang pipila migamit ug kuwestiyonableng mga terapiya nga makadaot. Ang uban nag-usik ug salapi ug panahon sa mga terapiya ug mga tambal nga dili epektibo o makadaot pa gani.

Ang tinuod mao nga dili pa mabatonan karon ang hingpit nga panglawas. Samtang ikaw nagpaabot sa panahon sa dihang ang sakit mawala na, ang kaalam ug pagkamakataronganon nga gitudlo sa Bibliya makatabang kanimo sa pagpabiling balanse sa imong paningkamot nga makabaton ug maayong panglawas.