Kam Klosap Long God

‘God i Stap Lukluk Long Hat Blong Man’

1 SAMUEL 16:1-12

FASIN blong yumi blong lukluk wan man i save giaman long yumi, from we plante taem lukluk blong yumi long saed blong man ya i no stret. Bodi blong man i no soemaot stret se man ya i wanem kaen man, mo i no soemaot tu, samting we i stap long hat blong hem. Yumi ol man, yumi jajem narafala folem ol samting ya nomo we yumi luk. Be yumi talem tangkiu long Jeova God, from we hem i stap lukluk ol tingting mo hat blong man. Hemia i kamaot klia long ol tok we i stap long 1 Samuel 16:1-12.

Traem tingbaot taem ya we Jeova i rere blong jusumaot wan king blong ol laen blong Isrel. God i talem long profet Samuel se: “Yu go long Betlehem, yu go luk wan man, nem blong hem Jese. Mi mi jusumaot wan pikinini blong hem finis blong bambae i kam king.” (Vas 1) Jeova i no talem nem blong man ya long Samuel, be hem i talem nomo se, man ya we hem i jusumaot bambae i wan long ol pikinini ya blong Jese. Nao taem Samuel i stap kam klosap long Betlehem, hem i stap tingting se, ‘?Olsem wanem bambae mi mi luksave pikinini ya blong Jese we Jeova i jusumaot?’

Taem Samuel i kasem Betlehem, hem i singaot Jese mo ol pikinini blong hem, blong oli kam joen wetem hem blong mekem sakrefaes. Mo taem Eliab, bigfala boe blong Jese, i kam insaed, wantaem nomo Samuel i luk we boe ya i naes tumas. Hem i luk se Eliab i wan longfala man, mo se hem i stret blong i kam wan king. Ale hem i stap tingting se: “Man ya we i stap stanap long fes blong Hae God, ating hem nao we hem i jusumaot.”—Vas 6.

Be Jeova i lukluk samting we i defren olgeta. Hem i talem long Samuel se: “Yu no tingbaot we man i longfala man mo i naes. Mi mi no wantem man ya.” (Vas 7) Jeova i no stap lukluk Eliab se, hem i longfala mo i naes. Taem Jeova i stap lukluk wan man, Hem i luk evri samting long saed blong man ya, blong faenemaot stret samting we i mekem se man ya i rili naes.

Jeova i eksplenem long Samuel se: “Fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting [“hat,” NW] blong hem.” (Vas 7) Yes, long ae blong Jeova, samting we i impoten, hemia samting we i stap dip insaed long hat blong man. Hemia nao stamba blong ol filing, fasin, mo tingting we i pusum man blong mekem wan samting. Jeova i stap “skelem olgeta samting long hat” blong man. Taswe hem i no jusumaot Eliab, mo ol sikis narafala pikinini blong Jese, we oli kam luk Samuel.—Ol Proveb 17:3, NW.

Jese i gat wan moa boe i stap yet, hemia lasbon blong hem, Deved, we “i stap lukaot long ol sipsip.” (Vas 11) Taem oli singaot Deved i kam luk Samuel, Jeova i talem long Samuel se: “!Hemia nao! !Yu girap, yu makemaot hem se bambae i kam king!” (Vas 12) I tru se Deved i wan boe we “i naes, bodi blong hem i strong mo fes blong hem i saen.” Be Jeova i lukluk long hat blong Deved, mo samting ya nao i mekem se Jeova i glad long hem mo i jusumaot hem blong i kam king.—1 Samuel 13:14.

Tingting blong ol man long wol tede se man i mas gat naes bodi. Be yumi glad blong save se Jeova God i no stap lukluk long samting ya. I blong nating nomo se yu yu longfala olsem wanem, mo se long lukluk blong narafala, yu stret gud mo yu naes. Samting we i impoten long Jeova, hemia samting we i stap insaed long hat blong yu, we i soemaot se yu yu wanem kaen man. ?Olsem wanem? ?Save ya i pulum yu blong wantem wokem ol gudfala fasin, we bambae oli mekem yu yu kam naes long fes blong God?