Intenasnal Asembli Long 2003

MITING we ol memba blong Watch Tower Bible and Tract Society of Pennsylvania oli mekem evri yia, i bin stap long Sarede, Oktoba 6, 2001, long Jersey City, long New Jersey, Yunaeted Stet. Afta long miting ya, ol memba wetem ol narafala we oli joen long miting ya, oli glad blong lesin long wan spesel program. Nekis dei blong hem, oli mekem wan moa miting bakegen long fo bigfala taon long Kanada mo Yunaeted Stet. Long en blong laswan tok long miting ya, ol memba blong Hed Kampani blong ol Witnes blong Jeova oli talemaot spesel mesej ya:

“Taem yumi tingbaot fiuja, wan samting we i impoten tumas blong olgeta man blong God hemia se oli no lego fasin blong go oltaem long ol miting. Aposol Pol i givim advaes se, fasin blong go oltaem long ol miting wetem fasin blong leftemap tingting blong yumi, tufala fasin ya yumi mas mekem moa, taem yumi luk we bigfala dei blong Jeova we i mekem ol man oli fraet i stap kam klosap. (Hibrus 10:24, 25) Folem oda ya blong Baebol, long nekis yia [2002] bambae yumi wantem mekem ol distrik asembli long olgeta ples blong wol. Biaen, long yia 2003, sipos Jeova i wantem, maet yumi save mekem sam spesel intenasnal asembli long sam ples long wol. Naoia i stret taem blong yumi stap wekap mo lukaot gud, mo yumi traem luksave olsem wanem ol samting we i stap hapen long wol ya oli laenap wetem Baebol.”

Taem wol ya klosap i kasem en blong hem, bambae tingting blong ol man i fasfas moa mo bambae ol problem oli kam antap. Nating se i olsem, wok blong ol man blong God i mas gohed. Mesej blong gud nius blong Kingdom, wetem woning we Baebol i givim, i mas go long ol man blong olgeta kantri, laen, mo lanwis, blong oli save ‘ona gud long God mo leftemap nem blong hem, from we taem i kam finis blong hem i jajem olgeta man.’ (Revelesen 14:6, 7) Taswe, folem wanem we Papa blong yumi long heven i wantem mo i glad long hem, bambae yumi mekem plan blong holem sam intenasnal asembli long ol defren ples long wol, long yia 2003.

Fastaem, bambae oli mekem ol asembli ya long sam bigfala taon long Not Amerika mo biaen long Yurop. Sam taem biaen, long sem yia ya 2003, oli mekem plan blong sanem sam grup oli go long ol asembli ya long sam taon long Esia. Long en blong yia ya, sam narafala grup bakegen bambae oli go long Afrika, Saot Amerika, mo Pasifik. Bambae oli askem long sam branj ofis blong sanem wan stret namba blong man nomo oli go long sam long ol spesel asembli ya. Oli no save givim invitesen long olgeta man evriwan. Nating se i olsem, bambae yumi glad blong luk we bambae i gat ol man blong ol defdefren kantri oli stap long olgeta asembli ya.

Bambae i no longtaem, ol kongregesen blong ol Witnes blong Jeova oli kasem infomesen long saed blong ol asembli ya. Ol branj ofis bambae oli givimaot save long saed blong stret dei mo ples blong ol asembli ya we ol man bambae oli kasem invitesen blong go long hem. Taswe, mifala i askem long yufala blong no raet i kam long branj ofis naoia blong askem kwestin long saed blong ol asembli ya.

Olgeta we branj ofis bambae i jusumaot blong go long ol asembli ya, hemia ol Witnes nomo we oli givim laef blong olgeta i go long Jeova mo oli baptaes finis. Olgeta ya oli man mo woman we bambae oli soem gudfala eksampol mo oli soem lav long ol lokol brata blong kantri ya we bambae i gat asembli long hem. Ol lokol brata tu bambae oli gat nambawan janis blong welkamem gud olgeta ya wetem lav mo glad fasin blong tekem olgeta i kam long haos. (Hibrus 13:1, 2) Gudfala frut we bambae i kamaot from, hemia se ‘bilif blong olgeta i save givhan long yumi, olsem we bilif blong yumi i save givhan long olgeta.’ (Rom 1:11, 12) Ol branj ofis we Sosaeti i jusum blong oli lukaot long wok ya blong sanem ol man oli go long ol kantri ya we i gat spesel asembli long hem, bambae oli givimaot moa save long saed blong ol plan ya.

Long 2003, olsem oltaem, bighaf blong ol kantri bambae oli mekem ol distrik asembli blong tri dei. Olgeta we oli kam long ol asembli ya, oli gat janis blong ‘harem tok ya, lanem samting, mo tingting blong olgeta i save kam strong moa.’ (Dutronome 31:12; 1 Korin 14:31) Long rod ya olgeta man blong God oli gat janis blong “testem mo luk we Jeova i gud.” (Ol Sam 34:8, NW ) Long olgeta intenasnal asembli, mo tu long bighaf blong ol distrik asembli, bambae ol misinari oli stap, mo sam long olgeta bambae oli joen long program.

Long yia ya 2002, bambae yumi haremgud long distrik asembli we stamba blong hem se “Ol Man Blong Talemaot Kingdom We Oli Wok Strong.” Asembli ya bambae i pulum yumi blong talemaot gud nius long wan fasin we i bigwan moa. Taem yumi mekem olsem, bambae yumi wantem tumas blong luk wanem we Jeova i rerem blong ol man blong hem long yia we bambae i kam biaen. Samting ya bambae i halpem yumi blong lukaot gud, stap wekap, mo rere oltaem long impoten taem ya we laef i strong tumas.—Matiu 24:42-44.