Baebol i Talem Wanem

?Yu Mas Go Long Wan Tempol, No Wan Olta, No Wan Jos Haos Blong Prea Long God?

PLANTE man oli stap go long wan jos haos blong oli prea long God. Samfala oli wokbaot, oli mekem ol longfala trip blong go long ol spesel ples blong prea. ?Olsem wanem? ?Yu ting se yu mas go long wan tempol, no wan olta, no wan jos haos blong yu save prea long God? ?No yu ting se yu save prea long God long eni taem mo long eni ples? ?Baebol i talem wanem?

Taem God i mekem fas man mo woman, i no gat wan jos haos. God i mekemrere wan gudfala ples, nao i putum Adam mo Iv long hem. (Jenesis 2:8) Long ples ya, tufala i toktok oltaem long Jehova God we i mekem tufala. Taem ol man oli kam plante, ol gudfala man olsem Noa oli “fren gud wetem God.” Oli no go long ol jos haos blong prea long God. (Jenesis 6:9) Ol man ya oli lavem Jehova mo oli prea long hem oltaem. Jehova i glad long olgeta.

God i No Stap Long Ol Haos We Man Nomo i Wokem

Ol man blong God bifo oli save se God ya we i mekem heven mo wol i no stap long ol haos we man nomo i wokem. Waes King Solomon i talem long God se: “Wol ya i smol tumas. ?Bambae yu yu save kam stap long hem wetem mifala olsem wanem?” Solomon i luksave se, ‘heven i bigwan we i bigwan, be olgeta ples long hem i no naf long God.’ (2 Kronikel 6:18) I tru, fastaem ol man Isrel oli gat wan haos tapolen, mo biaen oli bildim wan tempol. Oli kam long ol haos ya blong oli mekem ol lafet blong wosipim God, we Loa i talem se oli mas mekem evri yia. (Eksodas 23:14-17) Nating se i olsem, oli save prea long God long eni taem nomo. Maet oli prea taem oli stap lukaot long ol sipsip blong olgeta, no taem oli stap long garen, no taem oli stap wanples wetem famle blong olgeta, no taem oli stap olgeta wanwan nomo.—Ol Sam 65:2; Matiu 6:6.

Yumi tu yumi save prea long God long eni ples mo long eni taem. Plante taem, Jisas Kraes, we hem i Eksampol blong yumi, hem i go long ol kwaet ples blong i save prea hem wan nomo. (Mak 1:35) Wan taem hem i “go antap long wan hil blong i prea. Mo hem i stap long ples ya wan fulnaet, i stap prea long God.”—Luk 6:12.

Jisas i wan man Isrel, taswe hem i stap go long tempol long Jerusalem, blong mekem ol lafet blong wosipim God. (Jon 2:13, 14) Be hem i talem se i gat taem i stap kam we tempol ya bambae i no moa stap olsem stamba ples blong mekem tru wosip. Taem Jisas i wokbaot i go long Sameria, hem i storian wetem wan woman klosap long wan hil. Ol manples blong woman ya oli wokem wan tempol antap long hil ya. Jisas i talem long hem se: “I gat taem i stap kam we bambae yufala i no moa save mekem wosip long Papa blong yumi long bigfala hil ya, mo long Jerusalem tu.” Biaen, hem i talem se ol man we oli mekem wosip long tru God, bambae oli mekem long olgeta tingting blong olgeta, mo bambae oli folem trutok.—Jon 4:21, 23.

Jisas i no ting se oli mas gat wan haos we oli wokem long brikis no long ston, blong oli save mekem wosip we i kamaot long hat we i klin. ?Olsem wanem? ?Ol man blong Jisas we biaen oli tekem nem ya Kristin, oli no joen wanples long wan haos wosip? Si, oli yusum wan haos wosip. (Ol Wok 11:26) I gat plante risen blong oli joen wanples blong mekem wosip.

Ol Man Blong God Oli Olsem Wan Famle

Ol man we oli mekem wosip long tru God, oli olsem wan famle nomo. (Luk 8:21) Long wan gudfala famle, evriwan oli joen wanples blong mekem plante samting, mo oli kakae wanples. Hemia i mekem se oli laeklaekem olgeta moa. Samting ya i sem mak long famle blong ol Kristin brata mo sista.  Taem oli joen wanples long ol miting, oli tekem ol save blong God olsem kakae. Ol save ya i givhan long tingting blong olgeta mo i mekem olgeta oli harem gud long hat blong olgeta, mo tu, i mekem se oli fren gud wetem God. Aposol Pol i talem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong jos, olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi.”—Hibrus 10:24, 25.

Ol man we oli wosipim tru God oli luksave se i impoten blong joen wanples blong mekem wosip. Samting ya i givhan long olgeta blong oli wokem ol gudfala fasin, we oli no save wokem sipos oli stap olgeta wanwan. Olsem nao, oli lavlavem olgeta, oli fofogivim olgeta, oli kaen long olgeta, oli kwaet man, mo oli gat pis.—2 Korin 2:7; Galesia 5:19-23.

?Ol Kristin bifo oli stap joen weples blong mekem wosip mo blong harem gud long kampani blong olgeta? Plante taem oli joen long ol haos blong olgeta nomo. (Rom 16:5; Kolosi 4:15) Taem aposol Pol i raet long wan Kristin brata, hem i talem halo long ‘ol man blong jos we oli stap mekem wosip long haos blong hem.’ a—Filimon 1, 2.

Long taem blong yumi tu, ol man blong God oli no nidim ol flas jos haos blong mekem wosip long God. Oli nidim nomo wan haos we i naf blong olgeta man oli sidaon insaed long hem mo lesin gud. Ol Witnes blong Jehova oli yusum ol haos olsem, we oli kolem olgeta se ol Haos Kingdom. Ating i gat wan Haos Kingdom long ples blong yu. Ol haos ya oli no flas, be oli stret blong ol man oli mekem wosip long Jehova. I isi blong kasem save long ol miting long ol haos wosip ya. Long ol miting ya oli tokbaot Baebol, mo i gat singsing mo prea.

Ol Witnes blong Jehova oli tinghevi long prea we olgeta wanwan oli mekem long God. Taswe oli meksua se oli prea long God evri dei, wetem famle blong olgeta, mo olgeta wanwan. Jemes 4:8 i talem se: “Yufala i mas stap klosap long God, nao hem bambae i kam stap klosap long yufala.”

[Futnot]

?YU YU BIN TINGBAOT?

● ?God i stap long ol haos we man nomo i wokem?—2 Kronikel 6:18.

● ?Jisas i go wea blong i prea wan fulnaet?—Luk 6:12.

● ?Blong wanem ol man blong God oli joen wanples blong mekem wosip?—Hibrus 10:24, 25.

[Tok blong makem poen long pej 15]

?Yu ting se yu mas go long wan spesel ples blong God i harem prea blong yu?