Samting We Ol Papa Mama Oli Talem

Taem pikinini blong yu i stap kam bigwan, ?yu save mekem wanem blong givhan long hem blong i obei? ?Yu save tijim hem olsem wanem, blong hem i mekem ol defren wok we bambae i givhan long hem taem i kam bigwan? Yu traem lukluk gud long samting we sam papa mama raon long wol oli talem.

OL GUDFALA FASIN MO OL DEFREN KAEN WOK

“Taem mifala i kakae wanples mo mifala i tokbaot samting we mifala i mekem long dei, trifala pikinini blong mitufala oli lanem blong lesin gud. Taem oli luk se papa mama i lesin gud, sloslo oli gat respek long narafala long famle mo long olgeta bakegen.”—Richard, Briten.

“Ol pikinini blong mitufala oli soemaot respek long olgeta wanwan, mo olgeta nomo oli stretem raorao blong olgeta. Samting ya i tajem hat blong mitufala. Mo tu, oli no fraet blong storian wetem ol bigman.”—John, Saot Afrika.

“Mi mi no stret gud, mo samtaem mi mekem tufala pikinini blong mi i harem nogud, be mi no minim blong mekem olsem. Long taem ya mi mi talem sore. I impoten tumas blong mekem olsem.”—Janelle, Ostrelia.

“Mitufala i trenem ol pikinini blong mitufala blong oli mekem ol wok long haos. Mitufala i tijim olgeta blong oli mekem ol samting blong givhan long narafala. Ale ol samting insaed long famle oli ron gud, mo i gat pis. Mo ol pikinini oli glad tu from we oli harem se oli mekem ol gudfala wok.”—Clive, Ostrelia.

“I no isi blong tijim pikinini blong i kasem save long brata no sista blong hem, i respektem hem, mo i fogivim hem. Be hemia i impoten tumas.”—Yuko, Japan.

KLIN BODI MO GUDFALA HELT

“Taem tufala pikinini blong mitufala oli smol, mitufala i tijim tufala blong wasem gud bodi blong tufala taem tufala i swim. Mitufala i karem sop we i olsem pija blong man no anamol, mo botel sampo we i gat katun long hem, mo spons we i olsem pija blong anamol. Samting ya i mekem se tufala i save pleplei mo harem gud taem tufala i swim.”—Edgar, Meksiko.

“Fastaem mifala i stap long wan ples we i no gat wota saplae. Be oltaem mi meksua se i gat sop mo baket wota long wan ples we mifala i save wasem han long hem, taem mifala i stap kam insaed long haos.”—Endurance, Naejeria.

“Evri dei, mitufala i givim ol gudfala kakae long tufala pikinini blong mitufala, mo mitufala i eksplenem se bodi i nidim ol defdefren kakae ya. Tufala pikinini i wantem save tumas wanem ol samting we mi mi putum insaed long kakae, ale mi letem tufala i givhan long mi blong kuk. Taem ya we mifala i spenem wanples, hemia janis blong storian gud.”—Sandra, Briten.

“I impoten blong mekem eksasaes blong bodi i stap strong, mo mitufala i traem soemaot wan gudfala eksampol long saed ya. Ol pikinini blong mitufala oli laekem tumas taem mifala evriwan i go ronron, swimswim, pleplei tenis, basket bol, mo ron long baskel. Oli lanem tu se eksasaes i mekem olgeta oli harem gud.”—Keren, Ostrelia.

“Wan bigfala nid blong ol pikinini, hemia se papa mama i mas spenem taem wetem olgeta. Ol narafala samting olsem mane, ol presen, mo ol trip long narafala kantri, oli no save tekem ples blong taem ya we oli nidim. Mi mi faenem wan wok we mi save mekem long moning nomo, taem ol pikinini oli stap long skul. Nao long aftenun, mi mi gat taem blong spenem wetem olgeta.”—Romina, Itali.

STRETEM PIKININI

“Mitufala i faenemaot se i no gat wan rod nomo we yumi save talem se i beswan blong stretem pikinini. Hemia i dipen long samting we i hapen. Samtaem i naf we papa mama i tok long pikinini nomo, be long sam narafala taem tufala i mas blokem hem blong i no kasem sam gudfala samting.”—Ogbiti, Naejeria.

“Taem mitufala i talem long ol pikinini se bambae mitufala i stretem olgeta sipos oli no obei, mitufala i askem long olgeta blong oli ripitim samting we mitufala i talem. Hemia i blong meksua se oli kasem save. Biaen, mitufala i folem toktok blong mitufala. Sipos mitufala i wantem se ol pikinini oli lesin mo obei, mitufala i mas stretem olgeta taem oli no obei.”—Clive, Ostrelia.

“Taem mi tok long ol pikinini blong mi blong stretem olgeta, mi bendaon blong mi save lukluk fes blong olgeta. Mi luk se hemia i gud from we oli lesin long mi. Mo tu, taem oli luk fes blong mi, oli kasem save se mi minim samting we mi talem.”—Jennifer, Ostrelia.

“Mitufala i no sakem tok ya long pikinini se ‘Yu neva lesin,’ nating sipos samting ya i tru. Mo tu, mitufala i no stretem wan long fored blong narawan. Mitufala i toktok long hem long smol voes, sipos no, mitufala i tekem hem i go long wan saed, ale mitufala i toktok long hem.”—Rudi, Mosambik.

“Ol pikinini oli save tekem fasin blong narafala isi nomo, mo oli laekem folem fasin blong narafala. From samting ya, ol fren blong olgeta long skul, wetem televisin, ol muvi, mo ol narafala man tu, oli gat paoa blong spolem fasin blong olgeta. Taswe yumi mas blokem samting ya, mo yumi mas givhan long olgeta blong oli wokem ol gudfala fasin we oli stanap long ol stret rul. Sipos yumi tijim olgeta olsem, bambae oli naf blong talem ‘no’ long eni samting we i save spolem olgeta.”—Grégoire, Demokratik Ripablik blong Kongo.

“Taem yumi stretem pikinini, yumi no mas jenisim ol rul we yumi stretem hem from. Yumi mas strong, be yumi no strong bitim mak. Ol pikinini oli mas kasem save long panis we bambae oli kasem taem oli mekem i rong, mo oli mas save se bambae yumi mekem samting we yumi talem.”—Owen, Inglan.

 [Tok blong makem poen long pej 14]

“Bambae yufala i no stap mekem ol samting we i save mekem ol pikinini blong yufala oli kros, from we sipos yufala i stap mekem olsem, bambae tingting blong olgeta i foldaon.”—Kolosi 3:21

 [Bokis/Foto blong pija long pej 15]

STORI BLONG WAN FAMLE

Wan Mama We i No Gat Man Blong Hem i Lukaot Long Ol Pikinini Blong Hem

Lucinda Forster i ansa long ol kwestin ya

From we yu yu wan mama we yu no gat man blong yu, ?wanem samting i had moa long yu?

Taem yu gat pikinini, hemia i hadwok finis. Be from we mi mi no gat man blong mi, i hadwok moa blong faenem taem mo paoa blong mekem wok blong mi. Mi nidim taem blong tijim ol pikinini blong mi long ol stret rul, mo blong pleplei mo harem gud wetem olgeta. Plante taem mi lego spel blong mi, mo mi yusum taem ya blong mekem ol wok long haos.

?Yu yu mekem wanem blong yu save storian gud oltaem wetem tufala gel blong yu?

Taem papa mama i divos, ol pikinini oli fraet mo oli kros. Taem i gat wan problem, mi toktok long tufala long voes we i kwaet, mo mi lukluk long fes blong tufala. Mi wet gogo tingting blong mifala i kam kwaet nao mi talemaot samting ya we mi wari long hem, be long fasin we mi no rao. Mi askem tingting blong tufala, mi lesin gud long tufala, mo mi soemaot se mi tinghae long tingting blong tufala. Mi mi wantem save long ol wok blong tufala long skul, mo mi talem gudfala toktok long tufala from ol wok ya. Oltaem mifala i kakae wanples, mo hemia i wan taem we mifala i spel mo harem gud. Mo tu, mi talem long tufala oltaem se mi lavem tufala tumas.

?Yu yu stretem tufala olsem wanem?

Ol pikinini oli nidim ol rul blong folem, mo i impoten we papa mama i no jenisim ol rul ya oltaem. Mi mi kaen long tufala, be mi strong tu. Mi mekem tufala i tingting, mo mi eksplenem from wanem sam fasin oli no stret. Mo tu, bifo we mi stretem tufala, mi pulum tufala blong talemaot from wanem tufala i mekem samting we i rong. Sipos mi mi rong, olsem maet mi mi no kasem save gud long samting we i hapen, ale mi talem sore long tufala.

?Yu yu mekem wanem blong tijim tufala pikinini blong yu, blong tufala i respektem ol narafala?

Mi mekem tufala i tingbaot samting we Jisas i tijim, hemia blong mekem i gud long ol narafala man, olsem we yumi wantem blong olgeta oli mekem long yumi. (Luk 6:31) Mi pulum tufala blong tufala i stretem raorao blong tufala. Mo mi tijim tufala se taem tufala i kros, tufala i mas stap kwaet mo soemaot kaen fasin.

?Yufala i mekem wanem blong spel?

Plante taem, mifala i no gat mane blong go long narafala ples blong spel. Ale mifala i traem luk long niuspepa blong faenem sam samting we mifala i save mekem, we i no nidim plante mane. Mifala i go piknik, mo mifala i go wokbaot blong lukluk ol flaoa. Mifala i planem ol smosmol tri we oli gat gudfala smel, mo mifala i jusum ol defren kaen lif blong ol tri ya blong putum long kakae. I impoten tumas we mifala i spenem taem blong pleplei mo spel, nating sipos mifala i go sidaon nomo long open ples.

?Wanem glad mo blesing we yufala i kasem?

I no isi long famle blong mifala, from we mi mi stap mi wan blong lukaot long ol pikinini. Be mifala i joen gud mo mifala i lanem blong harem gud long ol blesing we mifala i gat. Mi mi glad tumas taem mi luk se prapa fasin blong tufala pikinini i stap kamaot klia moa. Naoia tufala i wantem spenem moa taem wetem mi, mo mi mi glad tumas taem tufala i stap wetem mi. Tufala i harem save taem mi mi glad mo taem mi mi harem nogud, mo samtaem tufala i putum han blong tufala i goraon long mi blong leftemap tingting blong mi. Mi harem gud tumas taem tufala i soemaot se tufala i lavem mi. Be samting we i impoten moa, mifala i harem se God we i mekem yumi, i lavem mifala mo i kea long mifala. Hem nao i halpem mifala blong gotru long plante hadtaem. Baebol i givim paoa long mi blong mi traehad oltaem blong stap olsem wan gudfala mama.—Aesea 41:13.

[Foto]

Lucinda wetem tufala gel blong hem, Brie mo Shae