Matiu 28:1-20
28 Afta long Sabat dei, long fas dei blong wik, taem i no delaet gud yet, Meri we i woman Magdala wetem narafala Meri, tufala i kam blong luk gref.
2 Graon i bin seksek bigwan, from we enjel blong Jehova* i aot long heven i kam mo i rolemaot ston ya we i blokem hol, nao i stap sidaon antap long hem.
3 Hem i saen olsem laetning, mo klos blong hem i waet we i waet.
4 Nao ol gad ya oli fraet tumas long hem, oli seksek nao oli kam olsem dedman nomo.
5 Be enjel ya i talem long tufala woman ya se: “Yutufala i no fraet, mi save we yutufala i stap lukaot Jisas ya we oli kilim hem i ded long pos.
6 Hem i no stap long ples ya, hem i laef bakegen finis olsem we hem i bin talem. Yutufala i kam luk ples we hem i bin stap long hem.
7 Yutufala i go kwik, yutufala i talem long ol disaepol blong hem se hem i laef bakegen finis, mo naoia hem i stap go fastaem long Galili. Bambae yufala i luk hem longwe. Hemia nao tok blong mi.”
8 Nao tufala i aot kwiktaem long beregraon we tufala i glad tumas be tufala i fraet tu. Tufala i resis i go blong talemaot long ol disaepol blong hem.
9 Nao wantaem nomo Jisas i kam mitim tufala mo i talem se: “!Halo tufala!” Ale tufala i kam nildaon mo tufala i holem leg blong hem.
10 Nao Jisas i talem long tufala se: “!Yutufala i no fraet! Yutufala i go talem long ol brata blong mi se oli save go long Galili, mo long ples ya, bambae oli save luk mi.”
11 Taem tufala i stap go, sam long ol soldia ya oli gobak long taon mo oli go talemaot long ol jif pris olgeta samting we i hapen.
12 Mo afta we ol jif pris ya mo ol elda oli mekem miting, oli givim plante silva mane long ol soldia ya,
13 mo oli talem se: “Yufala i mas talem se: ‘Ol disaepol blong hem oli kam stilim bodi blong hem long naet, taem mifala i slip.’
14 Mo sipos Paelat i harem nius blong samting ya, yufala i no wari, bambae mifala i go stretem wetem hem.”
15 Nao ol soldia ya oli tekem mane ya, mo oli mekem olsem we oli talem long olgeta, mo stori ya i stap goraon long ol man Jiu kam kasem tede.
16 Nao ol eleven disaepol oli go long Galili, long bigfala hil we Jisas i bin talem se bambae i mitim olgeta long hem.
17 Mo taem oli luk hem, oli bodaon* long hem, be sam long olgeta oli gat tu tingting.
18 Ale Jisas i kam klosap long olgeta, mo i talem se: “God i givim paoa long mi long olgeta samting long heven mo long wol.
19 Nao from samting ya, yufala i mas go long ol man blong olgeta neson, yufala i pulum olgeta oli kam disaepol blong mi, mo yufala i baptaesem olgeta long nem blong Papa, mo long nem blong Pikinini, mo long nem blong tabu spirit.
20 Mo yufala i tijim olgeta blong oli folem olgeta tok ya we mi mi talem finis long yufala. Mo yufala i mas save se mi bambae mi stap wetem yufala oltaem, gogo kasem en blong wol.”*
