Matiu 10:1-42
10 Nao hem i singaot ol twelef disaepol blong hem oli kam, mo i givim paoa long olgeta blong oli ronemaot ol rabis spirit, mo blong oli mekem ol man we oli gat ol defdefren kaen sik mo olgeta we bodi blong olgeta i nogud, oli kam gud bakegen.
2 Nem blong ol twelef aposol ya i olsem: Saemon we oli kolem hem Pita, mo brata blong hem Andru. Jemes mo brata blong hem Jon, we tufala i pikinini blong Sebedi.
3 Filip, mo Batolomiu, mo Tomas, mo Matiu we i man blong tekem takis, mo Jemes we i pikinini blong Alfeas, mo Tadeas,
4 mo Saemon we i gat strong tingting blong mekem samting, mo Judas Iskariot we biaen i letem Jisas i go long han blong ol enemi blong hem.
5 Taem Jisas i sanemaot ol twelef man ya, hem i givim advaes long olgeta se: “Yufala i no mas go long olgeta we oli no laen blong Isrel, mo yufala i no go insaed long eni taon blong ol man Sameria.
6 Be yufala i mas go nomo long ol laen blong Isrel, olgeta ya oli olsem ol sipsip we oli lus.
7 Taem yufala i go prij, yufala i mas talem se: ‘Kingdom blong heven i kam klosap finis.’
8 Mo yufala i mas mekem ol sikman oli kam gud bakegen, ol dedman oli laef bakegen, ol man we oli gat leprosi oli kam klin bakegen, mo yufala i ronemaot ol rabis spirit long ol man. Yufala i kasem fri nomo, mo yufala i mas givim fri nomo.
9 Yufala i no mas tekem gol no silva no kopa long paos blong yufala,
10 mo taem yufala i go, yufala i no karem basket blong kakae, no tu klos,* no ol sandel, no wan wokingstik, from we taem wan man i mekem wok blong narafala, i stret nomo we oli givim kakae long hem.
11 “Taem yufala i go long wan taon no long wan vilej, yufala i mas faenem wan gudfala man we i glad blong lesin long yufala, mo yufala i stap long ples ya gogo kasem we yufala i aot.
12 Taem yufala i go insaed long wan haos, yufala i talem halo long ol man long haos ya mo yufala i talem se pis i stap wetem olgeta.
13 Sipos ol man long haos ya oli gudfala man, pis ya i save stap wetem olgeta. Be sipos oli no gudfala man, pis ya bambae i kambak long yufala.
14 Sipos wan man i no wantem tekem yufala i go long haos blong hem, no i no wantem lesin long yufala, taem yufala i aot long haos ya no long taon ya, yufala i mas kilkilim leg blong yufala blong das i kamaot.
15 Tru mi talem long yufala, long Dei Blong Jajmen, panis we olgeta ya bambae oli kasem, bambae i strong moa i winim panis blong tufala ples ya Sodom mo Gomora.
16 “!Yufala i luk! Mi mi sanem yufala i go, olsem ol sipsip we oli go long medel blong ol wael dog. From samting ya, yufala i mas waes olsem snek, mo yufala i mas kwaet olsem sotleg tu.
17 Yufala i mas lukaot gud, bambae ol man oli tekem yufala i go long kot, mo bambae oli wipim yufala long ol sinagog blong olgeta.
18 Bambae oli tekem yufala i go stanap long fes blong ol hed gavman mo ol king from we yufala i holem nem blong mi, nao yufala i save talemaot mi long olgeta mo long ol man blong ol neson.
19 Be taem oli tekem yufala i go, yufala i no mas wari se bambae yufala i toktok olsem wanem mo se bambae yufala i talem wanem. Stret long taem ya, bambae yufala i kasem tok we bambae yufala i talem.
20 From we bambae i no yufala nomo i toktok, be tabu spirit blong Papa blong yufala bambae i givim tok long yufala blong yufala i talemaot.
21 Mo tu, bambae man i save letem stret brata blong hem i go long ol narafala blong oli kilim hem i ded, mo ol papa oli save mekem olsem long stret pikinini blong olgeta. Mo ol pikinini bambae oli agensem papa mo mama blong olgeta, mo bambae oli letem tufala i go long ol narafala blong oli kilim tufala i ded.
22 Mo bambae ol man oli no laekem yufala nating from we yufala i holem nem blong mi, be man we i stanap strong gogo kasem en, God bambae i sevem hem.
23 Taem oli ronem mo kilim yufala long wan taon, yufala i mas ronwe i go long wan narafala taon. Tru mi mi talem long yufala, bambae yufala i no save goraon long evri taon mo vilej blong Isrel yet, be Pikinini blong man* bambae i kam.
24 “Wan studen i no hae moa long tija blong hem, mo wan slef i no hae moa long masta blong hem.
25 Be studen ya i save kam olsem tija blong hem mo slef ya i save kam olsem masta blong hem. Sipos ol man oli singaot masta blong haos se Bielsebal,* !bambae oli save singaot ol man long haos ya long ol nem we i nogud moa!
26 Nao from samting ya, yufala i no mas fraet long ol man. Samting we oli kavremap, bambae i open long klia ples, mo samting we man i haedem, bambae ol man oli save.
27 Ol samting we mi talem long yufala long tudak, yufala i mas talem long delaet, mo samting we mi stap talem smosmol long sora blong yufala, yufala i mas go antap long ruf blong haos mo talemaot long bigfala voes.
28 Mo yufala i no fraet long olgeta we oli save kilim bodi i ded, be oli no save tekemaot laef* blong yufala. Be yufala i mas fraet long God nomo we i save mekem bodi mo laef,* tufala tugeta i lus wantaem long Gehena.*
29 Tingbaot ol smol pijin ya we oli salem tu blong wan selen* nomo, be Papa blong yufala i save taem wan nomo long olgeta i foldaon long graon.
30 Be yufala, ol hea blong hed blong yufala, hem i kaontem evriwan.
31 From samting ya, yufala i no fraet. Long fes blong hem, yufala i gud moa i winim plante smol pijin.
32 “Man we i talemaot mi long fes blong ol man, mi tu bambae mi talemaot hem long Papa blong mi long heven.
33 Be man we i talemaot long fes blong ol man se hem i no save mi, mi tu bambae mi talemaot long Papa blong mi long heven se mi no save hem.
34 Yufala i no mas ting se mi kam blong mekem pis long wol ya. Mi mi no karem pis i kam, be mi karem naef blong faet,
35 from we mi mi kam blong mekem ol man oli seraot. Man i agensem papa blong hem, mo gel i agensem mama blong hem, mo woman i agensem mama blong hasban blong hem.
36 Yes, bambae man i gat ol enemi blong hem, we olgeta oli famle* blong hem nomo.
37 Man we i lavem papa mo mama blong hem moa i winim we hem i lavem mi, hem i no stret blong kam man blong mi. Mo man we i lavem boe no gel blong hem moa i winim we hem i lavem mi, hem i no stret blong kam man blong mi.
38 Mo man we i no wantem karem pos* blong hem mo biaen long mi, hem i no stret blong kam man blong mi.
39 Man we i traem sevem laef* blong hem, bambae hem i lusum, mo man we i lusum laef* blong hem from mi, bambae hem i kasem.
40 Man we i tekem yufala i go insaed long haos blong hem, i olsem we hem i tekem mi tu, mo man we i tekem mi, hem i tekem Man ya tu we i sanem mi.
41 Man we i tekem wan profet i go long haos blong hem from we man ya i wan profet, bambae hem i kasem sem pei we wan profet i kasem. Mo man we i tekem wan stret man i go long haos blong hem from we man ya i wan stret man, bambae hem i kasem sem pei we wan stret man i kasem.
42 Mo man we i luk wan disaepol blong mi we i daon moa long ol narafala man blong mi, nao i givim wan kap kolwota nomo long hem, mi talem tru long yufala se man ya bambae i mas kasem pei blong hem.”
Ol futnot
^ NT: “wan narafala klos.”
^ Yu luk Diksonari.
^ Hemia wan nem blong Setan. Yu luk Diksonari.
^ NT: “sol.”
^ NT: “sol.”
^ Yu luk Diksonari.
^ PT: “blong wan asarion.”
^ PT: “olgeta oli stap long haos blong hem nomo.”
^ Yu luk Diksonari.
^ NT: “sol.”
^ NT: “sol.”
