Matiu 17:1-27

  • Bodi blong Jisas i jenis (1-13)

  • Bilif i smol olsem sid blong mastad (14-21)

  • Jisas i talemaot bakegen se bambae hem i ded (22, 23)

  • Pem takis long mane we i kamaot long maot blong fis (24-27)

17  Nao sikis dei biaen, Jisas i tekem Pita mo Jemes mo brata blong hem Jon, trifala i folem hem, nao olgeta fo nomo oli go antap long wan bigfala hil.  Mo stret long fes blong trifala, bodi blong hem i jenis i kam narafala, fes blong hem i saen olsem san, mo ol klos blong hem oli saen* olsem laet.  Nao trifala i luk Moses mo Elaeja, tufala i stap storian wetem hem.  Nao Pita i talem long Jisas se: “Masta, i gud we mifala i stap long ples ya, sipos yu wantem bambae mi wokem tri haos tapolen long ples ya, wan blong yu, wan blong Moses, mo wan blong Elaeja.”  Taem hem i stap toktok yet, wan klaod we i saen i kam kavremap olgeta, nao wan voes i kamaot long klaod ya, i se: “Hemia Pikinini blong mi. Mi mi lavem hem tumas, mo mi glad long hem. Yufala i lesin long hem.”  Taem ol disaepol oli harem tok ya, oli foldaon we fes blong olgeta i kasem graon mo oli fraet we oli fraet.  Nao Jisas i kam klosap, i tajem olgeta, i talem se: “Yufala i girap. Yufala i no fraet.”  Taem oli leftemap hed, oli no moa luk tufala ya, Jisas nomo i stap.  Ale taem oli stap kamdaon long hil ya, Jisas i talem long trifala se: “Yufala i no mas talemaot vison ya long wan man gogo kasem we Pikinini blong man* i laef bakegen.” 10  Nao ol disaepol oli askem long hem se: “?From wanem ol tija blong Loa oli talem se Elaeja i mas kam fastaem?” 11  Hem i ansa se: “I tru, Elaeja bambae i kam mo bambae hem i stretem olgeta samting. 12  Be mi mi talem long yufala se Elaeja i kam finis, mo olgeta oli no luksave hem, be oli mekem long hem olsem we oli wantem. Long sem fasin, Pikinini blong man* bambae i safa long han blong olgeta.” 13  Nao ol disaepol oli kasem save se hem i stap tokbaot Jon ya we i stap baptaesem ol man. 14  Taem oli stap wokbaot i kam klosap long ol hip man, wan man i kam long hem, i nildaon mo i talem se: 15  “Masta, yu sore long boe blong mi, from we hem i kasem sik blong faol mo hem i sik bigwan. Plante taem hem i stap foldaon long faea mo long wota. 16  Mi tekem hem i kam long ol disaepol blong yu, be oli no save mekem hem i kam gud bakegen.” 17  Jisas i talem se: “Man, yufala ol man blong tede, yufala i no bilif mo tingting blong yufala i no stret nating. ?Bambae mi stap wetem yufala gogo kasem wetaem? ?Mo bambae mi mas letem yufala i gohed olsem gogo kasem wetaem? Yufala i tekem boe ya i kam long mi.” 18  Nao Jisas i tok strong long rabis spirit ya, mo rabis spirit ya i goaot long boe ya, mo stret long taem ya, hem i kam gud bakegen. 19  Nao taem Jisas i stap hem wan, ol disaepol oli kam askem long hem se: “?From wanem mifala i no save ronemaot rabis spirit ya?” 20  Hem i talem long olgeta se: “From we bilif blong yufala i no naf. Tru mi talem long yufala, sipos bilif blong yufala i smol olsem sid blong mastad,* bambae yufala i save talem long hil ya se: ‘Yu muvaot long ples ya, yu go longwe,’ mo hem bambae i muv i go, mo bambae i no gat wan samting we yufala i no save mekem.” 21  * 22  Taem oli stap wanples long Galili, Jisas i talem long olgeta se: “Bambae oli putum Pikinini blong man* long han blong ol enemi, 23  mo bambae oli kilim hem i ded mo long namba tri dei, bambae hem i laef bakegen.” Nao olgeta oli harem nogud tumas. 24  Afta we oli kamtru long Kapaneam, ol man blong tekem mane blong takis* blong haos tempol, oli kam long Pita mo oli talem se: “?Tija blong yu i stap pem takis?” 25  Hem i talem se: “Yes, hem i pem.” Be taem hem i go insaed long haos, Jisas i toktok long hem fastaem, i talem se: “?Wanem tingting blong yu, Saemon? ?Ol king long wol ya oli stap askem hu blong pem ol defdefren takis? ?Long ol pikinini blong olgeta, no long ol strenja?” 26  Hem i ansa se: “Long ol strenja,” ale Jisas i talem se: “Yes, taswe ol pikinini blong king oli no stap pem takis. 27  Be from we yumi no wantem mekem olgeta oli foldaon, yu go long solwota, yu sakem huk, mo fas fis we yu pulum, yu openem maot blong hem, nao bambae yu faenem wan silva mane.* Yu tekem mo yu go pem takis blong yumitu long hem.”

Ol futnot

NT: “waet.”
Yu luk Diksonari.
Yu luk Diksonari.
Hemia wan tri we i gru long Palestaen. Taem hem i kam bigwan hem i no bitim 4 meta, mo hem i gat ol branj blong hem.
Vas ya i no stap long sam olfala hanraet, mo i klia se hem i no kamaot long God.
Yu luk Diksonari.
PT: “tu drakma selen,” hemia i samting olsem pei blong tu dei. Yu luk Diksonari.
PT: “silva steta,” we oli ting se hem i tetradrakma.