Matiu 19:1-30
19 Taem Jisas i talem ol tok ya finis, hem i aot long Galili, i krosem Jodan Reva, mo i go long boda blong distrik ya Judia.
2 Mo plante plante man oli folem hem, nao long ples ya, hem i mekem olgeta oli kam gud bakegen.
3 Mo ol Farisi oli kam luk hem, oli wantem traem hem, ale oli askem se: “?Folem Loa, i stret blong wan hasban i divosem waef blong hem from eni risen nomo?”
4 Nao hem i talem se: “?Yufala i no ridim se long stat, God i mekem tu man nomo, wan i man mo narawan i woman?
5 Mo hem i talem se: ‘From samting ya, man bambae i aot long papa mo mama blong hem, i go joen wetem waef blong hem, mo bambae tufala i kam wan bodi nomo.’
6 Nao tufala i no moa tu, be wan bodi nomo. Taswe, samting we God i joenem,* man i no mas seraotem.”
7 Ale oli askem long hem se: “?Be from wanem Moses i talem se man i mas givim pepa blong divos long waef blong hem mo sanem hem i gowe?”
8 Hem i ansa long olgeta se: “Moses i mekem olsem from we yufala i stronghed tumas, taswe hem i letem yufala, blong yufala i divosem ol waef blong yufala. Be long stat i no olsem.
9 Mi mi talem long yufala se, man we i divosem waef blong hem, we waef ya i no mekem enikaen doti fasin blong seks,* nao man ya i go mared long narafala woman, hem i mekem adaltri.”*
10 Nao ol disaepol oli talem long hem se: “Sipos laef blong mared i olsem, i moa gud man i no mared.”
11 Be hem i talem long olgeta se: “I no olgeta man we oli save folem tok ya. Be hemia wan presen we God i givim long olgeta ya nomo we oli naf blong folem.
12 Sam man oli no save mared from we ol man oli mekem natamap long olgeta. Sam narafala oli no save mared from we taem oli bon, bodi blong olgeta i olsem finis. Mo sam narafala bakegen oli no mared from we oli wantem mekem ol wok blong Kingdom blong heven. Sipos wan man i no wantem mared, hemia i gud nomo.”
13 Nao ol man oli tekem ol pikinini i kam long hem, blong hem i putum han blong hem long olgeta mo i prea from olgeta, be ol disaepol oli tok strong long olgeta.
14 Be Jisas i talem se: “Yufala i lego ol pikinini ya, mo yufala i no blokem olgeta, from we Kingdom blong heven i blong olgeta we oli olsem ol pikinini ya.”
15 Nao hem i putum han blong hem long olgeta, nao biaen hem i aot long ples ya.
16 Nao wan man i kam long hem, mo i talem se: “?Tija, wanem gudfala samting we mi mas mekem, blong mi kasem laef we i no save finis?”
17 Hem i talem long hem se: “?From wanem yu askem long mi se, ‘wanem gudfala samting’? God nomo i gud. Sipos yu wantem kasem laef, yu mas obei oltaem long ol loa.”
18 Man ya i talem long hem se: “?Weswan?” Ale Jisas i se: “Yu no mas kilim man i ded, yu no mas mekem adaltri, yu no mas stil, yu no mas talem giaman tok agens long narafala,
19 yu mas ona long papa mo mama blong yu, mo yu mas lavem ol man raonabaot long yu olsem we yu stap mekem long yu wan.”
20 Be yang man ya i talem se: “Mi mi obei long olgeta samting ya finis. ?Mi mas mekem wanem moa?”
21 Jisas i talem long hem se: “Sipos yu wantem kam stret gud olgeta, yu go salemaot olgeta samting blong yu, mo yu givim mane blong hem long ol puaman, nao bambae yu gat ol gudgudfala samting long heven. Mo yu kam, yu biaen long mi.”
22 Taem yang man ya i harem tok ya, hem i harem nogud tumas nao i gowe, from we hem i gat plante samting.
23 Nao Jisas i talem long ol disaepol blong hem se: “Tru mi talem long yufala, bambae i had blong wan rijman i go insaed long Kingdom blong heven.
24 Bakegen, mi talem long yufala se ating wan kamel i save gotru long ae blong nidel, i bitim we wan rijman i go insaed long Kingdom blong God.”
25 Taem ol disaepol oli harem tok ya, oli sapraes tumas, oli se: “?Man, be hu i naf blong kasem laef?”
26 Jisas i lukluk stret long olgeta, mo i talem se: “Samting ya, man i no naf blong mekem, be God hem i naf blong mekem olgeta samting.”
27 Nao Pita i talem se: “!Yu luk! Mifala i lego evri samting mo mifala i biaen long yu. ?Bambae mifala i kasem wanem?”
28 Jisas i talem long olgeta se: “Tru mi talem long yufala, long taem ya we God bambae i mekem ol samting oli kam niuwan bakegen, Pikinini blong man* bambae i sidaon long gudfala jea blong king. Long taem ya, yufala ya we yufala i stap biaen long mi, bambae yufala i sidaon long twelef jea blong king mo yufala i jajem ol twelef laen blong Isrel.
29 Mo man we i lego haos, no brata, no sista, no papa, no mama, no pikinini, no graon blong hem from nem blong mi, bambae hem i kasem wan handred taem antap bakegen, mo bambae hem i kasem laef we i no save finis.
30 “Be plante we oli kam faswan, bambae oli laswan, mo olgeta we oli kam laswan, bambae oli faswan.
Ol futnot
^ PT: “fasem long wan yok.”
^ Grik: por·neiʹa. Yu luk Diksonari.
^ Yu luk Diksonari.
^ Yu luk Diksonari.
