Wan tua we yu mekem yu wan blong luk histri blong ol Witnes blong Jehova, i stat long Oktoba 2012 long wol hedkwota blong ol Witnes long Brooklyn, New York. a Tua ya i soemaot ol hadtaem, denja, mo ol gudfala taem blong samfala we oli traehad blong folem trufala Kristin fasin.

Ol visita oli luk histri, i stat long taem blong ol Kristin long 33 K.T. i kam kasem taem blong yumi. Oli luk fo defren haf, mo wan laen i joenem ol haf ya we oli makem ol impoten yia long hem. Long evri haf, i gat wan stamba tok we i kamaot long Baebol, mo wan sot video long Inglis, mo tu, ol toktok i save kamaot long skrin long sikis narafala lanwis—hemia Franis, lanwis blong Itali, Japan, Koria, Potugal, mo Spen.

Stamba tok blong fas haf, “Ol Man Oli Laekem Tudak,” hem i tok blong Jisas we i kamaot long Jon 3:19. Baebol i talem se ol rabis man “bambae oli girap mo oli twistim ol tijing.” (Ol Wok 20:30) Laen ya we oli makem ol impoten yia long hem, i soemaot se i gat plante man long ol yia we i pas, we oli mekem ol rabis wok olsem.

Stamba tok blong seken haf, “Laet i Saenaot,” i kamaot long 2 Korin 4:6. Laen ya we oli makem ol impoten yia long hem, i soemaot se samting ya i hapen long ol yia klosap long 1900 mo afta 1900. Haf ya i tokbaot sam man we oli stadi gud long Baebol mo olsem wanem oli kasem plante save, mo namba blong olgeta i kam antap bifo long Wol Wo Wan.

Mo tu, long seken haf ya i gat “Photo-Drama of Creation,” we i joenem ol pija we oli muvmuv wetem saon we oli rikodem. Long 1914, ol Baebol studen (nem blong ol Witnes blong Jehova bifo) oli stat blong soemaot sinema ya, mo long ol yia biaen, plante milian man oli wajem. Long tua, ol man oli luk sam long ol olfala pija ya, wan sot video blong fastok blong sinema, mo bitim 500 slaed foto.

Stamba tok blong nambatri haf, “Bigfala Algita Ya i Kros Tumas,” i kamaot long Revelesen 12:17. Hem i soemaot ol hadtaem we ol man blong Kraes oli kasem long stat blong ol yia 1900, mo stori blong ol Kristin we oli stanap strong mo no joen long faet. Wan sot video i tokbaot Remigio Cuminetti, wan Witnes long Itali we i no wantem putum yunifom blong ami mo faet long Wol Wo Wan. Wan narafala sot video i tokbaot Alois Moser blong Ostria, we i no wantem talem “Heil Hitler!” mo from samting ya, hem i lusum wok blong hem, mo biaen oli putum hem long rabis kalabus blong Dachau.

Oli wokem wan rum we i dak olsem prisen, blong putum ol pija blong ol Witnes blong Jehova we oli go long prisen from we oli no wantem lego wosip blong olgeta. Hemia ol Witnes long ol kantri olsem Gris, Japan, Polan, mo Sebia.

Stamba tok blong lashaf blong tua, “Gud Nius Ya Blong Kingdom Long Olgeta Ples Long Wol,” i kamaot long Matiu 24:14, mo i soemaot wok blong ol Witnes blong Jehova stat long 1950 kam kasem tede. I gat plante pija blong soemaot se wok i kam antap kwiktaem, oli gohed nomo blong prij, mo oli lavlavem olgeta.

Long en blong tua, wan visita i save luk Baebol Haos mo Brooklyn Tabenakel long wan smol skrin olsem tablet, mo ridim stori blong tufala haos ya we ol Witnes blong Jehova oli yusum bitim 100 yia bifo.

I tekem wan yia blong mekem plan blong tua ya, mo plante manis blong bildim ol samting we ol man oli luk. Plante Witnes long olgeta ples long wol we oli holem ol sas samting blong bifo, oli givim olsem presen blong joenem long tua ya.

?From wanem oli mekem ol wok ya? Oli askem long wan memba blong Hed Kampani olsem wanem tua ya bambae i givhan long ol Witnes blong Jehova, mo hem i talem bakegen tok ya we plante man oli harem finis se: “Blong save weples yumi stap go long hem, yumi mas save weples yumi bin pas long hem.”