Inkondo Yalibipa
Inkondo ilalenga abantu balacula sana. Mwi sonde lyonse abashilika e lyo na bashili bashilika, bali-imwena ifyo inkondo yabipa.
ABASHILIKA
Ba Gary abekala ku Britain batile: “Nga kuli inkondo ponse apo walolesha kulamona fye uko abantu balelemana no kufwa. Takuba ukwishiba ifyalakucitikila.”
Ba Wilmar, aba ku Colombia batile: “Balindashile imfuti mu numa e lyo na pa menso, nalemona uko abantu abengi balefwa, ukubikako na bana e lyo na bakote. Inkondo kuti yalenga umuntu aleka ukumfwa ububi nga amona abantu balecula nelyo balefwa.”
Ba Zafirah aba ku United States batile: “Nga wamona uko umuntu balemwipaya takuba ukulaba, ninshi ukatwalilila fye ukwibukisha ifyo alecula ne fyo alepunda pa kufwa.”
ABANTU ABASHILI BASHILIKA
Ba Oleksandra,aba ku Ukraine batile: “Nalemona kwati nshakabepo ne nsansa na kabili. Nalesakamana ukutila kuti nafwa kabili nalesakamana no kuti balupwa lwandi e lyo ne fibusa nabo kuti babepaya.”
Ba Daler aba ku Tajikistan batile: “Naleumfwa sana umwenso ukwiminina mu mulongo wa kupoka ifya kulya ukufuma ku ma 02:00 ku macaca, ukufika kuma 23:00 ubushiku, pantu kuti bakulasa imfuti.”
Ba Marie, aba ku Rwanda batile: “Abafyashi bandi balibepeye ilyo kwali inkondo kabili nashele fye ukwabula abakunsakamana.”
Nangu ca kuti abantu bonse abo tulandilepo pa muulu bali sana no bulanda, pali ino nshita baliba sana ne nsansa. Ne cacilapo ukucindama ca kuti balishiba ukuti inkondo ili no kupwa nomba line. Ino magazini ya Ulupungu lwa kwa Kalinda nailondolola ifyo Baibo yalanda ukuti e fyo inkondo ili no kupwa.
