Tinikeni pa kuti muye ku filimo

Tinikeni pa kuti mumone imitwe iilimo

 IFYO BAIBOLO ISAMBILISHA | UBUNKALWE

Ubunkalwe

Ubunkalwe

Ukufuma fye na kale, abantu balacita ubunkalwe. Bushe bakatwalilila fye ukucita ifi umuyayaya?

Bushe Lesa amona shani ubunkalwe?

IFYO ABANTU BALANDA

Abantu abengi, ukubikako fye na batemwa ifya mapepo, bamona kwati ukucita ubunkalwe kwaliba fye bwino nga na bakukalifya. Kabili abengi bamona kwati ukutamba amafilimu na maprogramu ya pa TV aya lukaakala kwaliba fye bwino.

IFYO BAIBOLO ILANDA

Mupepi no musumba wa Mosul, ku kapinda ka kuso aka Iraq, kwaba ifitantaala fya wali umusumba uukalamba uwa Asiria uwaleitwa ati Ninebe. Ilyo Baibolo yasobele ukuti Lesa ali no ‘kulenga Ninebe ukuba icibolya’ ninshi uyu musumba wali na maka. (Sefania 2:13) Lesa atile, “Nkakulenga ukuba ica kutiinya kuli bonse abakumona.” Mulandu nshi? Pantu wali “musumba uusumya umulopa.” (Nahumu 1:1; 3:1, 6) Pa Amalumbo 5:6 patila: “Umuntu uusumya umulopa . . . alaselausha Yehova.” Twalishininkisha ukuti Lesa alicitile ifyo alandile, pantu na lelo line tulamona ifitantaala fya musumba wa Ninebe.

Uwatendeke ulukaakala mulwani mukalamba uwa kwa Lesa na bantu, no yu ni Satana Kaseebanya, uo Yesu Kristu aitile ukuti “kepaya.” (Yohane 8:44) Nomba apo “icalo conse calaala mu maka ya mubifi,” imibele ya kwa Satana ilamoneka mu fyo abantu batemwa ubunkalwe, e lyo no kutamba amafilimu na maprogramu ya pa TV aya lukaakala. (1 Yohane 5:19) Nga tulefwaya ukulasekesha Lesa, tufwile ukupata ubunkalwe no kutemwa ifyo atemwa. * Bushe ico kuti cacitika?

“Onse uwatemwa ubunkalwe [Yehova] alimupata.”Amalumbo 11:5.

Bushe abantu abankalwe kuti bayaluka?

IFYO ABANTU BALANDA

Ifi abantu bacita ulukaakala filanga fye ukuti mu cifyalilwa fye tuli bankalwe, kanshi te kuti twaluke.

IFYO BAIBOLO ILANDA

Pooseni “ubukali, icipyu, ububifi, imiponto, kabili mwilalanda ne lyashi lya nsoni.” Kabili itila: “Fuuleni ubuntu bwa kale pamo ne micitile ya buko, kabili fwaleni ubuntu bupya.” (Abena Kolose 3:8-10) Bushe abantu kuti baaluka no kutendeka ukukonka ifi Lesa alanda? Ee kuti bayaluka. * Kuti bayaluka shani?

Ica kubalilapo, kwishiba bwino bwino Lesa. (Abena Kolose 3:10) Nga ca kuti umuntu  alefwaisha ukusambilila pa mibele iisuma iya kwa Kabumba wesu ne fyo afwaya, akatemwa Lesa kabili akalafwaisha ukumusekesha.—1 Yohane 5:3.

Ica bubili, kusala bwino ifibusa. “Wibikana icibusa no ufulwa bwangu; kabili wilapalama ku muntu wa cipyu, epali wasambilila imibele yakwe no kubikila umweo obe iciteyo.”—Amapinda 22:24, 25.

Ica butatu, kuba uwashilimuka. Mufwile ukulamona ulukaakala ukuti bunake ubulanga ukuti tatwailama. Lelo umuntu wa mutende alikwata amaka ya kuilama. Pa Amapinda 16:32 patila: “Uukokola ukukalipa awama ukucila impalume.”

“Lyonse mulebombesha ukuba aba mutende ku bantu bonse.” AbaHebere 12:14.

Bushe ubunkalwe bukapwa?

IFYO ABANTU BALANDA

Ubunkalwe bwa kale kabili tabwakapwe.

IFYO BAIBOLO ILANDA

“Pashala fye panono no mubifi takabepo . . . Lelo abafuuka e bakekala mu calo, kabili bakasekelela nga nshi pantu umutende ukafula.” (Amalumbo 37:10, 11) Pa kupususha abafuuka na ba mutende, Lesa akonaula abatemwa ubunkalwe nga filya acitile ku bantu abaleikala mu musumba wa Ninebe. Pa numa ya konaula ababifi, mu calo tamwakabe na kabili ubunkalwe! —Amalumbo 72:7.

“Abafuuka . . . bakapyana isonde.”—Mateo 5:5.

Kanshi, ino e nshita tulingile ukuba aba mutende pa kuti tulesekesha Lesa. Pali 2 Petro 3:9, patila: “Yehova . . . alamutekanishisha pantu tafwaya umuntu nangu umo ukonaika lelo afwaya ukuti bonse bakalapile.”

“Kabili bakafula bapanga babo ukuti babe baplao na mafumo yabo ukuti yabe ifya kutungwilako imiti.” Esaya 2:4.

^ par. 7 Lesa alisuminishe abena Israele ba ku kale ukulwa inkondo pa kuti balecingilila imipaka ya mpaanga yabo. (2 Imilandu 20:15, 17) Lelo ifintu fyalyalwike ilyo Lesa akeene abena Israele no kupanga icilonganino ca Bena Kristu.

^ par. 11 Ifya kumwenako fya bantu abayalula imibele yabo kuti mwafisanga mu cipande citila “Baibolo Ilaalula Abantu” iciba mu Ulupungu lwa kwa Kalinda.