• UMWAKA BAFYELWE: 1958

  • ICALO: ITALY

  • IFYO BALI: BALI MWI BUMBA LYA FIPONDO

INKULILO YANDI:

Nafyalilwe no kukulila mu musumba wa Rome umwaleikala abantu abalebomba incito ya pa nshi. Imikalile yalyafishe. Nshatalile monapo bamayo kabili nshaleumfwana sana na batata. Nalisambilile ifyo abana abekala mu misebo balecita.

Ilyo nali ne myaka 10 ninshi nalitendeka kale ukwiba. Ilyo nali ne myaka 12, nalifyukile pa ng’anda pa muku wa kubalilapo. Pa miku iingi bakapokola nga banjikata, batata e baleisa mu kumfumya. Nalepusana sana na bantu, nali uwa lubuli sana kabili nalefulilwa fye uli onse. Ilyo nali ne myaka 14, nalifuminine pa ng’anda. Natampile ukubomfya imiti ikola no kwikala mu misebo. Apo nshakwete ukwakulaala, nalelaala mu myotoka sha bene kabili nalefumamo ku macaca. Nga nabuuka nalefwaya apali amenshi pa kutila nsambeko.

Naishileba pompwe, ica kuti naileba fye fyonse ifyo nasanga, nalesompola ifyola no kwiba mu mayanda ubushiku. Naishileba impupu iyakamamo na menshi kabili tapapitile na nshita, ibumba lya mpupu ishacushishe sana abantu lyalinjitile pa kuti tuleibila pamo, ne ci calengele ukuti nsambilile ifya kwiba mu mabanki. Apo nali sana no lubuli, abengi mwi bumba lyesu balentiina. Nshalesha imfuti konse uko naya, na pa kulaala naleibika pa nshi ya pilo. Nalitemenwe sana ukucita ulubuli, ukubomfya imiti ikola, ukuponta e lyo no kucita ubulalelale. Lyonse bakapokola balemfwaya ica kuti imiku iingi balenjikata no kumbika mu cifungo.

IFYO BAIBOLO YA-ALWILE UBUMI BWANDI:

Inshita imo ilyo bamfumishe mu cifungo, naile mu kutandala kuli bamayo mwaice. Nshaishibe ukuti bamayo mwaice na bana babo babili bali ni Nte sha kwa Yehova. Balinjebele ukuya nabo ku kulongana kwa Nte sha kwa Yehova. Apo nalefwaisha ukuyaimwena ifyo balongana, nalisumine ukuya nabo. Ilyo twafikile ku Ng’anda ya Bufumu nali bapatikishe  ukuti twikale ku mwinshi pa kuti ndemona abaleingila na balefuma. Ne li line nali ne mfuti.

Ifyo naumfwile pali kulya kulongana fyalyalwile imibele yandi. Ifyo namwene fyalimpapwishe, abantu abalemposha baali ne nsansa kabili baali abayangusha. Ncili ndebukisha ifyo ba Nte balemoneka, aba cikuuku kabili abafumacumi. Imibele yabo yalipusene sana ne mibele nakwete.

Nalitendeke ukusambilila Baibolo na ba Nte. Ilyo naleya ndeishibilako ifingi ifya mu Baibolo natampile ukumona ukuti mfwile ukwalula imibele yandi. Nalitontonkenye sana pa mashiwi yaba pa Amapinda 13:20 ayatila: “Uule-enda na ba mano akaba uwa mano, lelo uwangala na bawelewele akacula.” Nailwike ukuti mfwile ukuleka ukwangala na filya fipondo, nomba calyafishe, lelo Yehova alingafwile.

Ukufuma iyi nshita, nshalecita fye ifintu ukwabula ukutontonkanyapo

Na kabili natendeke ukumoneka uwa busaka. Nalibombeshe pa kuleka ukupepa fwaka no kubomfya imiti ikola. Nalibeyele umushishi uutali kabili nalilekele ukufwala amasikiyo no kuponta. Ukufuma iyi nshita, nshalecita fye ifintu ukwabula ukutontonkanyapo.

Nshatemenwe sana ukubelenga, kanshi calinkosele sana ukubika amano ku kusambilila Baibolo. Lelo nalibombeshe ica kuti mu kupita kwa nshita natampile ukutemwa Yehova kabili ifyo nalesambilila fyalengele ukuti njaluke. Ilingi line naleumfwa ububi kabili naletwishika nga cine cine Yehova kuti anjelela pa fibi fyonse ifyo nalecita. Lyonse nga natontonkanya ifi nalesansamuka fye nga nabelenga ifyo Yehova abelele Imfumu Davidi uluse pa lubembu ulukalamba ulo yacitile.—2 Samwele 11:1–12:13.

Ubwafya na bumbi ubo nakwete bwa kushimikila abantu pa mayanda yabo. (Mateo 28:19, 20) Naleumfwa sana umwenso ukuti nalimo nkasanga umuntu uo nalufyenye. Lelo mu kupita kwa nshita nalilekele ukutiina. Naletemwa sana ukusambilisha abantu pali Shifwe wa ku muulu umusuma kabili uwelela apakalamba.

IFYO NANONKELAMO:

Ukwishiba Yehova kwalimpususha. Abengi abo naleiba nabo balifwa bambi balibakaka, lelo ine naliba ne nsansa kabili ndasubila ukuti ifintu fikawama ku ntanshi. Ino nshita nalileka ulubuli, naliicefya kabili naliba uwacumfwila. Ici calilenga ukuti ndeumfwana na bantu bambi kabili ine no mwina mwandi Carmen twalitemwana nga nshi. Twaliba ne nsansa pantu tulaafwa abantu ukusambilila Baibolo.

Ino nshita ndabomba incito iisuma iya kuwamya amabanki, te mu kwiba mu mabanki!