Yeremia 7:1-34
7 Yehova aebele Yeremia ati:
2 “Iminina mu mpongolo ya ng’anda ya kwa Yehova, kabili ubilishe auti, ‘Umfweni ifyo Yehova alanda, mwe bantu bonse aba mu Yuda, mwe bengila muli ishi mpongolo pa kuti mukontamine Yehova.
3 Yehova Lesa wa mabumba, Lesa wa kwa Israele alanda ati: “Wamyeni imibele yenu kabili lekeni ifyabipa ifyo mucita, lyena nkamuleka mukekale muli ici cifulo.+
4 Mwicetekela amashiwi ya bufi kabili mwilanda amuti, ‘Ili e tempele lya kwa Yehova, e tempele lya kwa Yehova,* e tempele lya kwa Yehova!’+
5 Pantu nga mwawamya imibele yenu kabili mwaleka ukucita ifyabipa, nga mwaba no mulinganya pa kupingula abantu;+
6 nga tamulecusha abafuma ku calo cimbi, abana ba nshiwa* na bamukamfwilwa;+ nga tamulesuumya umulopa wa kaele muli cino cifulo; kabili nga tamulepepa balesa bambi no kuiletelela;+
7 lyena nkaleka mukatwalilile ukwikala muli cino cifulo, mu calo ico napeele ifikolwe fyenu pa kuti cibe icalo cabo umuyayaya.”’”*
8 “Lelo mulecetekela amashiwi ya bufi,+ tayakamwafwe kantu nangu panono.
9 Bushe kuti muleiba,+ no kwipaya, no kucita ubucende, no kulapa ubufi,+ no kutuulila Baali amalambo,*+ no kukonka balesa bambi abo mushaishibe,
10 e lyo nomba mwaisaiminina muli iyi ng’anda iyainikwa ishina lyandi, no kulanda amuti, ‘Tukapusuka’ e lyo ninshi mulacita fyonse ifi ifya bunani?
11 Bushe ino ng’anda iyainikwa ishina lyandi naisanguka ulucengo lwa fipondo mu menso yenu?+ Ine ndamona ifyo mucita,” e fyo Yehova alanda.
12 “‘E ico nomba kabiyeni ku cifulo candi mu Shilo,+ umo ishina lyandi lyaikele pa kubala,+ muyemona ifyo nacitile ici cifulo pa mulandu wa fyabipa ifyo abantu bandi abena Israele balecita.+
13 Lelo mwatwalilile fye ukucita ifi fintu,’ e fyo Yehova alanda, ‘kabili nangu ca kuti nalilandile na imwe pa miku iingi* tamwaumfwile,+ nalitwalilile ukumwita, lelo tamwaleasuka.+
14 Filya nacitile Shilo+ e fyo nkacita ne ng’anda iyainikwa ishina lyandi+ iyo mwacetekelamo,+ kabili e fyo nkacita ici icifulo ico napeele imwe ne fikolwe fyenu.
15 Nkamupoosa ukufuma pa cinso candi, nga filya napoosele bamunyinenwe bonse, bonse abatuntwike muli Efraimu.’+
16 “Wipepelako aba bantu. Wililila kuli ine nelyo ukupepa ipepo lya kubapaapaatilako,+ pantu nshakumfwe.+
17 Bushe taumona ifyo bacita mu misumba ya mu Yuda na mu misebo ya mu Yerusalemu?
18 Abana baleteba inkuni, bashibo balekosha umulilo, e lyo abakashi balekasa umufuba pa kuti bapange amakeke ya kutuulila Namfumu wa mu Muulu,*+ kabili baleitulwila tulesa tumbi umutuulo wa mwangashi pa kuti bankalifye.+
19 ‘Bushe nine balekalifya?’ e fyo Yehova alanda. ‘Bushe tabaleikalifya fye abene no kuiseebanya?’+
20 E ico Shikulu Mulopwe Yehova alanda ati, ‘Moneni! Ndepongolwela ubukali bwandi pali ici cifulo,+ ndebupongolwela pa bantu na pa nama, pa fimuti fya mu mpanga na pa fisabo fya mu mushili; ubukali bwandi buli ngo mulilo uulebilima uo bashakashimye.’+
21 “Yehova wa mabumba, Lesa wa kwa Israele, alanda ati, ‘Lundenipo imituulo yenu iya koca pa malambo yenu, kabili lyeni iminofu.+
22 Pantu pa bushiku nafumishe ifikolwe fyenu mu calo ca Egupti, nshalandile na fyo kabili nshafyebelepo pa mituulo ya koca na pa malambo.+
23 Lelo ifunde napeele ifikolwe fyenu ni li: “Muleng’umfwila, na ine nkaba Lesa wenu kabili mukaba abantu bandi;+ mufwile ukula-enda mu nshila iyo nakulamweba ukuti e mo mule-enda, pa kuti ifintu filemwendela bwino.”’+
24 Lelo tabaumfwile kabili tababikileko amano,*+ bale-enda mu mapange yabo kabili balekonka umutima wabo uwabipa.+ Balebwelela ku numa, tabaleya ku ntanshi,
25 ukufuma pa bushiku ifikolwe fyenu fyafumine mu calo ca Egupti ukufika buno bushiku.+ E ico nalemutumina ababomfi bandi bonse bakasesema, nalebatuma cila bushiku imiku iingi.*+
26 Lelo balikeene ukung’umfwila, kabili tabalefwaya ukukutika.+ Bali bacintomfwa,* kabili ifyo bacitile fyalibipile ukucila ifyo ifikolwe fyabo fyacitile!
27 “Ukabeba aya amashiwi yonse,+ lelo tabakomfwe; ukabeta, lelo tabakasuke.
28 Kabili ukabeba ati, ‘Ulu e luko ulushaumfwile ifyo Yehova Lesa wabo alandile, kabili balikeene ukumfwa ilyo abasalapwile. Icishinka calipwa, tabalandapo no kulandapo pa kuba aba cishinka.’*+
29 “Beyeni umushishi wenu uo mushabeyapo* no ku-upoosa, kabili samuneni ulwimbo lwa bulanda* pa tupili apashaba nangu cimo, pantu Yehova nakaana iyi nkulo iyamukalifya kabili akaisha.
30 ‘Pantu abantu ba mu Yuda nabacita ifyabipa mu menso yandi,’ e fyo Yehova alanda. ‘Nababika ifilubi fya bunani mu ng’anda iyainikwa ishina lyandi, pa kuti baikoweshe.+
31 Balikuula ififulo fya kupepelapo mu Tofete, iyaba mu Mupokapoka wa Mwana wa kwa Hinomu,*+ pa kuti baleocelapo abana babo abaume na bana babo abanakashi mu mulilo,+ icintu ico nshabebele kabili icishatalile acisa mu mutima wandi.’*+
32 “‘E ico moneni! inshiku shileisa,’ e fyo Yehova alanda, ‘ilyo Tofete bakaleka ukuita ati Tofete nelyo Umupokapoka wa Mwana wa kwa Hinomu,* lelo bakalaita ati Umupokapoka wa Kwipailamo. Mu Tofete e mo bakalashiika abantu mpaka incende yonse ikapwe.+
33 Kabili ifitumbi fya aba bantu fikaba ifya kulya fya fyuni fya mu lwelele ne fya nama sha mu mpanga, kabili takwakabe uukalafitamfya.+
34 Kabili nkatalalika amashiwi ya kusekelela na ya kusansamuka, ishiwi lya kwa shibwinga ne lya kwa nabwinga+ mu misumba ya mu Yuda na mu misebo ya mu Yerusalemu, pantu icalo cikonaulwa.’”+
Amafutunoti
^ Itempele lya kwa Yehova, fikuulwa fyonse ifya pe tempele.
^ Nelyo “abana abashakwata bashibo.”
^ Nelyo “pa kuti cibe icalo cabo ukufuma umuyayaya ukuya umuyayaya.”
^ Nelyo “no kufutumwina Baali icushi.”
^ Mu ciHebere, “nalecelela no kulanda na imwe.”
^ Ifi e fyo baleita lesa mwanakashi uo abena Israele abapondokeele Lesa balepepa, nalimo ali ni lesa wa bufyashi.
^ Mu ciHebere, “tabateyamike ukutwi kwabo.”
^ Mu ciHebere, “cila bushiku nalecelela ukubatuma.”
^ Mu ciHebere, “balikoseshe imikoshi yabo.”
^ Mu ciHebere, “icishinka caliputulwa mu tunwa twabo.”
^ Nelyo “umushishi uo mwapeela kuli Lesa.”
^ Nelyo “ulwimbo lwa kuloosha.”
^ Moneni Amashiwi ya mu Baibo ne fyo Yapilibula, “Gehena.”
^ Nelyo “icintu ico nshatalile ntontonkanyapo.”
^ Moneni Amashiwi ya mu Baibo ne fyo Yapilibula, “Gehena.”
