Kɛ n ɲannin afuɛ 12 e nin Zoova e afiɛn w’a sɛman kpa kun. Ɔ yoli min kɛ min wiengu suklu ba’m be yo ninnge nga be klo’n naan min liɛ’n m’an mian sa. Ɔ maan n buli i kɛ like kpa kun su sin min sin. N ma buli i kɛ mmla nga min si nin min nin be kpɛ be awlo nun’n ɔ nin Zoova i mmla’m be su nantilɛ’n yo ya dan. I ti’n Ɲanmiɛn sulɛ’n wa yoli kekle min sa nun. N si kɛ Zoova o lɛ sanngɛ e nin i e afiɛn sɛman kun.

Ɔ nin i sɔ ngba’n, m’an yaciman jasin fɛ’n i bolɛ. Sanngɛ n tuman min klun n bomɛn i kpa kɛ laa’n sa. N siesieman min wun kun naan m’an wɔ jasin fɛ’n i bolɛ. Ɔ maan kɛ ɔ ko yo naan e nin sran mun y’a koko yalɛ’n, ɔ yoli kekle mannin min. I sɔ’n ti’n, jasin fɛ nga n bo’n ɔ baman nvlɛ, yɛ min klun jɔman. Jasin fɛ bolɛ’n wa yoli kekle min sa nun ekun. Ɔ maan n usali min wun kɛ: ‘?Jasin fɛ mɔ i bolɛ ti kekle kɛ nga sa’n, aniaan’m be yo be liɛ sɛ yɛ be wun kpaja be i bolɛ nun-ɔn?’

Kɛ n ɲannin afuɛ 17 min waan ń yó min klunklo like. Ɔ maan n fali min trɔ’n yɛ n ɔli Ɔstrali-ɔ. Min kɔlɛ’n boli min si nin min be wla. Sanngɛ be seli be wun kɛ kɛ ń kɔ́ lɛ’n ń sú Zoova titi.

 Kɛ n juli Ɔstrali lɔ’n, n ma kpɔnzɔli Zoova i sulɛ nun trali laa’n. Yɛle kɛ n ma kpɛli aɲia’m be bo kɔlɛ nun cɛn. Yɛ n wa trali Zoova i sufuɛ gbanflɛn nin talua wie mɔ be suman Zoova kpa wie’n be janvuɛ. Sɛ andɛ’n e kɔ aɲia bo’n, kɛ i aliɛ cɛn’n, e kɔ nzan nɔnwlɛ nga be yo sa sukusuku lɔ’n be nun e ko nɔn nzan yɛ e si able. Kɛ n bu i akunndan sa’n, n wun i wlɛ kɛ n dili n fuka nɲɔn nun. Ɔ maan i anuannzɛ’n nun-o, i mɛn’n nun lɔ-o, n wunman min wun fɛ.

Kɛ ɔ dili afuɛ nɲɔn kun’n, n ma wunnin aniaan bla kun mɔ i ajalɛ kpa’n ɲannin ta min su’n. I bɔbɔ siman kɛ i ajalɛ kpa’n ukali min. I dunman nun ti’n, n ma buli wafa nga n su Zoova’n i akunndan. Aniaan bla sɔ m’ɔ suan Tamara’n i wun’n ti akpasua sunianfuɛ. Cɛn kun’n, ɔ nin i wun’n be bali e asɔnun’n i osu nianlɛ yɛ e sikeli be e awlo lɔ. Blɛ sɔ’n nun’n, min nin aniaan bla nnun mɔ be leman bian’n, e tran likawlɛ. Kɛ Tamara i wun’n kɔ asɔnun’n nun junman wie’m be dilɛ’n, Tamara nin e yo ninnge wie mun likawlɛ. Kpɛkun ɔ nin e di aɔwi. N kloli i sɔ’n kpa. Bla’n klo sran yɛ i like yolɛ yoman ya. Ɔ maan a kwla kan ɔ klun ndɛ kle i. Kɛ n wun i kɛ sran kun m’ɔ si Ɲanmiɛn Ndɛ’n i kpa yɛ ɔ miɛn i ɲin su Zoova kpa’n i tranlɛ yo fɛ kɛ ngalɛ sa’n, i sɔ’n boli min nuan.

Tamara ti juejue kpa. Sɛ ń kwlá sé’n, wafa ng’ɔ klo Ɲanmiɛn Ndɛ’n nin jasin fɛ bolɛ’n ɔ sa. Asa’n, ɔ tu i klun su Zoova. Ɔ maan i klun jɔ. Sanngɛ min liɛ’n min klun jɔman, afin n tuman min klun n suman Zoova. I ayeliɛ’n nin wafa ng’ɔ su Zoova’n, be ɲannin ta min su. I ajalɛ kpa’n yoli maan n wunnin like cinnjin kpa kun i wlɛ. Yɛle kɛ ‘Zoova kunndɛ kɛ e kwlakwla e su i aklunjuɛ su.’—Jue. 100:2.

N kunndɛli kɛ min klun jɔ kɛ Tamara sa. Sanngɛ kɛ ɔ ko yo naan i sɔ liɛ’n w’a kwla yo ye’n, ɔ fata kɛ n kaci min sa ninnge wie’m be yolɛ nun. Nanwlɛ, i sɔ yolɛ’n w’a yoman pɔpɔ yɛ ɔ fali blɛ. N ma siesieli min wun ka naan m’an ɔ jasin fɛ’n i bolɛ. Yɛ ɔ ju wie’n, n kaci cɛn kunngun atin bofuɛ. I sɔ’n ukali min maan kɛ n bo jasin fɛ’n, srɛ kunman min kun. Kɛ ń bó jasin fɛ’n n fa Biblu’n n di junman tra laa’n. I sɔ’n ti’n min wun wa kpajali min jasin fɛ’n i bolɛ’n nun kpa ekun. Ɔ maan w’a cɛman n ma yoli cɛn kunngun atin bofuɛ anglo kwlaa nun.

 N ma trali aniaan wie mɔ be tu be klun be su Zoova’n be janvuɛ. Aniaan sɔ’m be nun wie’m be ti kpɛnngbɛn, wie’m be ti gbanflɛn annzɛ talua, yɛ wie’m be ti bakan. Yɛ be kwlaa be klun jɔ. Be ajalɛ kpa’n ukali min naan m’an bu ninnge nga be ti min cinnjin kpa’n, be akunndan. Ɔ maan n ma kanngannin Biblu’n nun cɛn kwlakwla. I sɔ’n ti’n, min wun wa kpajali min jasin fɛ’n i bolɛ nun trali laa’n. I agualiɛ su’n, n kacili titi atin bofuɛ. I sɔ’n ti’n, n wunnin min wun fɛ asɔnun’n nun ekun. Nanwlɛ, min wun yoli min sɔ w’a cɛ.

Kɛ ɔ dili afuɛ kun’n, n ma wunnin aniaan bian kun m’ɔ suan Alɛsi’n. Aniaan sɔ’n i klun ti ufue yɛ ɔ klo sran. Asa’n, ɔ klo Zoova nin jasin fɛ bolɛ’n kpa. Kɛ ń sí i’n, nn ɔ ti asɔnunfuɛ’m be ukafuɛ, yɛ ɔ ti titi atin bofuɛ w’a di afuɛ 6. Blɛ kun nun’n, Alɛsi ɔli Malawi ko boli jasin fɛ’n, afin lɔfuɛ’m be mian jasin bofuɛ’m be wun kpa. Ɔ nin ngaliɛ difuɛ nga be o lɔ’n be boli jasin fɛ’n likawlɛ. Aniaan sɔ’m be kleli i ajalɛ kpa, yɛ be wlɛli i fanngan kɛ ɔ fa Zoova i sulɛ’n sie i like kwlaa ɲrun titi.

E nin Alɛsi e jali afuɛ 2003 nun. Yɛ y’a yaci- man Ɲanmiɛn junman’n i dilɛ le. Junman sɔ’n i dilɛ nun’n sa wie’m be tɔli e su, sanngɛ Zoova yrali e su.

Afuɛ 2009 nun’n, be seli e kɛ e ko di ngaliɛ dilɛ junman’n Timɔɔ Lɛsti lɔ. Nvle sɔ’n wo Ɛndonezi i bue kun lɔ. Kɛ be seli e sɔ’n, ɔ boli e nuan yɛ e wun bliblili e. Sanngɛ srɛ kunnin e wie. I anglo nnun su’n, e juli Timɔɔ Lɛsti i klɔ dan nga be flɛ i kɛ Dili’n i su lɔ.

Kɛ e juli lɔ’n, e mɛn dilɛ wafa’n kacili. I wie yɛle kɛ e suannin wafa nga lɔfuɛ’m be yo ninnge mun’n ɔ nin be aniɛn’n i kanlɛ, ɔ nin be aliɛ’n i dilɛ. Kɛ é bó jasin fɛ’n, ɔ ju wie’n e wun sran wie mɔ yalɛ’n w’a di be’n annzɛ b’a diman suklu b’a ɔman mmua’n annzɛ sran’m be kle be yalɛ’n.  Asa ekun’n, e wunnin sran wie mɔ alɛ’n annzɛ sa kekleekle wie’m be ti’n be akunndan’n w’a sanngan annzɛ sa wie ɲannin be’n. *

E jasin fɛ bolɛ junman’n bali nvlɛ. I wie yɛle kɛ cɛn kun’n, n wunnin talua kun mɔ be flɛ i kɛ Maria’n. Ɔ le afuɛ 13. * Kɛ ń wún i’n, nn i manmin wuli ɔ nin-a cɛman. Yɛ ɔ tɛmɛn i baba wun sa. Kɛ bakan kwlaa sa’n ɔ fata kɛ be kle Maria i atin ninnge wie’m be yolɛ nun. Min wla kpɛn su kɛ cɛn kun’n, ɔ kannin wafa nga i wun yo i’n i ndɛ kleli min. Kɛ ɔ́ kán ndɛ’n nn ɔ́ sún. Sanngɛ n wunman ndɛ ng’ɔ kan’n i wlɛ. Afin blɛ sɔ’n nun’n, nn n timan be aniɛn’n i kpa. Ɔ maan n srɛli Zoova kɛ ɔ uka min naan n wlɛ i fanngan. Kpɛkun n kanngannin Biblu’n nun ndɛ mma wie’m be nun n fa wlɛli i fanngan. Kɛ n kleli i Biblu’n nun like m’ɔ dili afuɛ nɲɔn kun’n, n sieli i nzɔliɛ kɛ Maria i nzuɛn’n w’a kaci. I sin’n be yoli i batɛmun. Siɛn’n, i bɔbɔ kle sran wie’m be Biblu’n nun like. Maria le aniaan kpanngban anuannzɛ’n nun siɛn’n yɛ be klo i kpa.

Zoova yrali jasin fɛ bolɛ junman nga e dili i Timɔɔ Lɛsti lɔ’n i su kpa. Jasin bofuɛ nga be yoli be batɛmun afuɛ blu nga be sinnin lɛ’n be nun’n, be nun sunman b’a kaci atin bofuɛ annzɛ asɔnunfuɛ’m be ukafuɛ annzɛ asɔnun kpɛnngbɛn. Asa ekun’n, be nun wie’m be uka aniaan mun naan b’a kaci e fluwa mun be asa’n su lɔ aniɛn’m be nun. Kɛ e kɔ aɲia’m be bo mɔ n wun i kɛ aniaan sɔ’m be to jue yɛ be wun kpaja be’n, ɔ yo min fɛ kpa. Asa’n kɛ n wun i kɛ be mian be ɲin be su Zoova kpa’n, i sɔ’n yo min fɛ wie.

Timɔɔ Lɛsti lɔ tranlɛ’n yo ya tra Ɔstrali lɔ tranlɛ’n. Ɔ nin i sɔ ngba’n n wunnin min wun fɛ Timɔɔ Lɛsti lɔ. Ɔ ju wie’n, loto nga e fu nun’n ti kaan yɛ sran’m be mian nun. Yɛ wie liɛ’n á nían-ɔn, sran’m be sa nun jue kee nin tro mma mun. Asa ekun’n, be nga e kle be Biblu’n nun like’n be nun wie’m be sua’n ti kaan yɛ i nun lo. Kpɛkun lika nun ti nnɔtiɛ yɛ akɔ’m be wlanwlan lika’n nun. Ɔ nin i sɔ ngba’n ɔ ju wie’n, n se min wun kɛ: ‘Wa yo fɛ-o.’

Kɛ n bu i akunndan sa’n, n wun i wlɛ kɛ min si nin min nin be tuli be klun be kleli min Zoova i atin’n yɛ be suannin min bo kpa. I li min talua nun mɔ lika’n yoli kekle min su’n, yɛ be yoli i sɔ kpa’n niɔn. I sɔ’n ti’n, ń lá be ase leleele. Ndɛ ng’ɔ o Nyanndra Mun 22:6 nun’n kpɛnnin su min lika. Baba nin manmin be klun jɔ min nin Alɛsi e wun kpa. Kɛ be wun i kɛ Zoova fa e di junman’n, ɔ yo be fɛ lele kpe nun. Afuɛ 2016 nun’n, min wun’n kacili akpasua sunianfuɛ. E nin i e di junman Ɔstralazi asa’n su.

Sɛ n se amun kɛ blɛ wie nun’n, jasin fɛ’n i bolɛ w’a yoman min fɛ kun’n, amun su faman su. Afin siɛn’n n klo junman sɔ’n i dilɛ kpa. N ma wunnin i wlɛ kɛ kannzɛ lika’n ti sɛ ti sɛ’n, sɛ e tu e klun e su Ɲanmiɛn kpa’n, e klun jɔ́ kpa. Nanwlɛ ti kpa, afuɛ 18 nga e nin Alɛsi e fa dili Ɲanmiɛn i junman’n wafa nga min klun jɔli’n, min klun nin-a jɔman sɔ le. Siɛn’n, n wun ndɛ nga jue tofuɛ Davidi kan kleli Zoova’n i wlɛ kpa. Ɔ seli kɛ: “Be bɔ be talo wɔ’n maan aklunjuɛ yɛ be di-ɔ. Maan be klun jɔ titi. [...] Be bɔ be klo wɔ’n ɔ dunman nun maan be bo sro.”—Jue. 5:12.