Akungabazeki ukuthi abantu bazoqhubeka bethuthuka kwezesayensi. Kodwa bangakwazi yini ukwakha umphakathi onabantu abakhathalelana ngempela? Cha. Namuhla, izwe ligcwele ukuzicabangela nobugovu. Nokho, injongo kaNkulunkulu iwukulethela abantu okuthile okungcono.—Funda eyesi-2 Petru 3:13.

IZwi likaNkulunkulu lichaza umphakathi wesikhathi esizayo oyoba nabantu abathandanayo. Abantu bayohlala ngokulondeka futhi akekho oyobalimaza.—Funda uMika 4:3, 4.

Ekuqaleni uNkulunkulu wadala umuntu engenabo ubugovu. Kodwa ngokukhetha ukungamlaleli uNkulunkulu, umuntu wokuqala walahlekelwa ukuphelela kwakhe. Ngakho siye sazuza ubugovu kuye. Nokho, uNkulunkulu uzosebenzisa uJesu ukuze abuyisele isintu ekupheleleni.—Funda eyabaseRoma 7:21, 24, 25.

Ngokuvumelana nentando kaNkulunkulu, uJesu wafa njengesihlengo futhi wasusa imiphumela yokungalaleli komuntu wokuqala. (Roma 5:19) Ngaleyo ndlela uJesu wabangela ukuba sikwazi ukuthola ikusasa elimangalisayo lapho abantu beyokhululeka khona ebugovwini obubenza benze izinto ezingalungile.—Funda iHubo 37:9-11.