1-3. Ano an iginpapasabot han pag-alagad kan Jehova ha “hingpit nga kasingkasing”? Paghatag hin ehemplo.

TUNGOD kay diri kita perpekto, may tendensya kita nga magsayop. Pero mapasalamaton kita kay hi Jehova diri nagkikita “sumala han aton mga sala.” (Sal. 103:10) Ginpapasaylo kita niya kon mabinasulon ngan mapainubsanon kita ngan bug-os nga natoo ha halad-lukat ni Jesus. Pero sumala han ginsiring ni David kan Solomon, kinahanglan kita ‘mag-alagad kan Jehova ha hingpit nga kasingkasing’ basi karawaton niya an aton pagsingba ha kada adlaw. (1 Kron. 28:9) Paonan-o naton ito mahihimo nga diri man kita perpekto?

² Basi mabaton ito, ikompara naton an ehemplo ni Hadi Asa kan Hadi Amasia. Inin duha nga hadi han Juda pariho nagbuhat han husto ha mga mata ni Jehova, pero ginbuhat ito ni Asa ha “hingpit nga kasingkasing.” (2 Kron. 15:16, 17; 25:1, 2; Prob. 17:3) Pariho hira diri perpekto ngan nakasala. Pero ha kabug-osan, waray sumimang hi Asa ha pagbuhat han kaburut-on han Dios kay bug-os an iya debosyon ha Dios. (1 Kron. 28:9) Ha kabaliktaran, hi Amasia diri bug-os an debosyon kan Jehova. Katapos niya mapirde an mga kaaway han  Dios, gindara niya an ira mga dios-dios ngan ginsingba ito.—2 Kron. 25:11-16.

³ An pag-alagad ha Dios ha “hingpit nga kasingkasing” nagpapasabot hin pagkaada hilarom nga gugma kan Jehova ngan hingyap nga magsingba ha iya ha kadayonan. Ha Biblia, an pulong nga “kasingkasing” kasagaran na nga nagtutudlok ha sulod nga pagkatawo han usa. Nag-uupod ito han iya mga hingyap, panhunahuna, disposisyon, panggawi, abilidad, motibo, ngan tumong. Salit an usa nga nag-aalagad kan Jehova ha hingpit nga kasingkasing diri kay pakita la an iya pagsingba. Diri liwat hiya kay basta la nga nasubad ha iba ha pagsingba kan Jehova. Kumusta man kita? Bisan kon diri kita perpekto, makakag-alagad kita ha Dios ha hingpit nga kasingkasing kon bug-os an aton debosyon ha iya ngan diri pakita la an aton pagsingba.—2 Kron. 19:9.

4. Ano an aton hihisgotan?

⁴ Basi mas masabtan naton an karuyag sidngon han pag-alagad ha Dios ha hingpit nga kasingkasing, hisgotan naton an kinabuhi ni Asa ngan han pipira nga hadi han Juda nga nag-alagad ha Dios nga may bug-os nga debosyon—hira Jehosapat, Hesekia, ngan Josia. Hira nga upat nakasala, pero gin-uyonan pa gihapon hira ni Jehova. Kay ano nga gintagad han Dios ini nga kalalakin-an nga nag-alagad ha iya ha hingpit nga kasingkasing, ngan paonan-o naton hira masusubad?

5. Ano an ginbuhat ni Asa han nagin hadi hiya?

⁵ Hi Asa an ikatulo nga hadi han Juda tikang han bumulag an napulo-ka-tribo nga ginhadian ha norte han Israel. Ginbungkag niya ha iya nasasakopan an idolatroso nga pagsingba ngan ginpaiwas ha templo an mga puta nga kalalakin-an. Iya pa ngani gintanggal an iya lola nga hi Maaka ha “pagka rayna, tungud kay hiya naghimo hin mangil-ad nga ladawan.” (1 Hadi 15:11-13) Dugang pa, gin-aghat ni Asa an katawohan nga ‘pangitaon hi Jehova ngan buhaton an balaud ngan an sogo.’ Oo, gin-aghat niya an iba nga magsingba kan Jehova.—2 Kron. 14:4.

6. Ano an ginhimo ni Asa han ginsulong han mga Etiopiahanon an Juda?

⁶ Ginbendisyonan ni Jehova an Juda hin kamurayawan ha siyahan nga napulo ka tuig nga paghadi ni Asa. Pero ha urhi, ginsulong an Juda han Etiopiahanon nga hi Sera upod an iya 1,000,000 nga kasundalohan ngan 300 nga mangangabayo. (2 Kron. 14:1, 6, 9, 10) Ano an ginhimo ni Asa? Iginpakita niya an iya bug-os nga pagsarig kan Jehova. (Basaha an 2 Kronikas 14:11.) Sugad nga baton han kinasingkasing nga pag-ampo ni Asa, napirde han Juda an kasundalohan han Etiopia pinaagi han bulig han Dios. (2 Kron. 14:12, 13) Bisan kon diri matinumanon an mga hadi kan Jehova, mahimo niya hira buligan nga magdaog ha ira mga kaaway tungod han iya ngaran. (1 Hadi 20:13, 26-30) Pero hi Asa bug-os nga sinarig ha Dios, salit ginbaton ni Jehova an iya pag-ampo. Kondi ha urhi, nagin diri maaramon hi Asa. Pananglitan, nangaro hiya hin bulig ha hadi han Sirya imbes nga kan Jehova. (1 Hadi 15:16-22) Bisan pa hito, gintagad han Dios an kasingkasing ni Asa sugad nga “hingpit kan Jehova ha ngatanan niya nga mga adlaw.” Paonan-o naton masusubad an ehemplo ni Asa?—1 Hadi 15:14.

7, 8. Paonan-o mo masusubad hi Asa ha imo pag-alagad kan Jehova?

⁷ Mahimo usisahon han tagsa ha aton an iya kasingkasing kon bug-os ba an debosyon hito ha Dios. Pakianhi an imo kalugaringon, ‘Determinado ba ako nga mapalipay hi Jehova, depensahan an putli nga pagsingba, ngan panalipdan an iya katawohan kontra ha bisan ano nga nakakadaot nga impluwensya?’ Hunahunaa la an kaisog nga ginkikinahanglan ni Asa ha pag-atubang ha rayna han Juda nga hi Maaka! Bangin waray ka  kilala nga pariho kan Maaka, pero may mga kahimtang nga mahimo mo masubad an kaisog ni Asa. Pananglitan, ano man kon may-ada ka kapamilya o duok nga sangkay nga nakasala ngan diri nagbabasol, salit kinahanglan hiya paiwason ha kongregasyon? Magigin determinado ka ba nga diri na makig-upod ha iya? Ano daw la an igdidikta han imo kasingkasing?

⁸ Pariho kan Asa, maipapakita mo nga hingpit an imo kasingkasing pinaagi ha pagkaada bug-os nga pagsarig ha Dios kon nakakaeksperyensya ka hin pagkontra, nga bangin an pipira hito baga hin diri maiilob. Bangin tamayon ka ha iyo eskwelahan tungod han imo pagin Saksi ni Jehova. O bangin insultuhon ka han imo mga katrabaho kay nagli-leave ka para ha espirituwal nga mga buruhaton o tungod kay diri ka agsob mag-obertaym. Ha sugad nga kahimtang, pag-ampo ha Dios, pariho han ginhimo ni Asa. Magin maisugon ngan sarig kan Jehova pinaagi ha pagpabilin nga marig-on ngan pagbuhat ha kon ano an husto ngan maaramon. Hinumdumi nga ginparig-on ngan ginbuligan han Dios hi Asa, salit makakasarig ka nga bubuhaton liwat Niya ito ha imo.

9. Kon nagsasangyaw kita, paonan-o naton maipapakita nga hingpit an aton kasingkasing?

⁹ An mga surugoon han Dios mahunahunaon diri la ha ira kalugaringon nga kaopayan. Gin-aghat ni Asa an iba nga ‘pangitaon hi Jehova.’ Yana, ginbubuligan liwat naton an iba nga magsingba kan Jehova. Sigurado nga nalilipay gud hiya kon nakikita niya nga igin-iistorya naton hiya ha aton mga amyaw ngan ha iba, ngan ginbubuhat naton ito tungod kay hinigugma gud naton hiya ngan hingyap gud naton nga buligan an mga tawo nga magpahimulos han mga bendisyon ha waray kataposan.

10, 11. Paonan-o mo masusubad hi Jehosapat?

¹⁰ An anak ni Asa nga hi Jehosapat ‘naglakat ha dalan ni Asa nga iya amay.’ (2 Kron. 20:31, 32) Ha ano nga paagi? Pariho han iya tatay, gin-aghat ni Jehosapat an katawohan nga bilngon hi Jehova. Ginhimo niya ito pinaagi ha pag-organisar hin kampanya ha pagpanutdo gamit an “basahon han balaud ni Jehova.” (2 Kron. 17:7-10) Kinadto pa ngani hiya ha norte nga ginhadian han Israel, ha bungturon nga rehiyon han Efraim, basi “dad-on hira pagbalik ngadto kan Jehova.” (2 Kron. 19:4) Hi Jehosapat usa nga hadi nga “namiling kan Jehova ha bug-os niya nga kasingkasing.”—2 Kron. 22:9.

¹¹ Yana, mahimo liwat kita makigbahin ha daku nga kampanya han pagpanutdo nga ginhihimo ni Jehova. Tumong mo ba nga itutdo ha mga tawo an Pulong han Dios kada bulan? Nangangalimbasog ka ba nga maabot an ira kasingkasing basi mapagios hira nga mag-alagad ha Dios? Pinaagi han imo pangalimbasog ngan han bulig ni Jehova, posible nga may madumarahan ka hin pag-aram ha Biblia. Igin-aampo mo ba ito nga imo tumong? Andam ka ba nga dumarahan hin pag-aram ha Biblia an usa nga interesado bisan kon maisakripisyo an imo libre nga panahon? Ngan sugad la nga kinadto hi Jehosapat ha teritoryo han Efraim basi buligan an mga tawo nga bumalik ha putli nga pagsingba, mahimo liwat naton buligan adton mga diri aktibo. Dugang pa, ginbibisita ngan ginbubuligan han mga tigurang an mga ginpaiwas ha kongregasyon nga aada ha ira teritoryo nga bangin nagbag-o na.

12, 13. (a) Han inatubang hi Jehosapat hin peligroso nga kahimtang, ano an iya ginhimo? (b) Kay ano nga sadang naton subaron hi Jehosapat ha pagkilala nga may mga kahimtang nga waray kita mahihimo?

¹² Pariho han iya tatay nga hi Asa, gintipigan ni Jehosapat an iya debosyon ha Dios bisan pa han inatubang hiya hin peligroso nga kahimtang tungod han damu nga kaaway. (Basaha an 2 Kronikas 20:2-4.) Oo, nahadlok gud hi Jehosapat! Pero determinado hiya nga ‘pangitaon hi Jehova.’ Ha iya pag-ampo, mapainubsanon nga  ginkarawat niya nga an iya katawohan “waray . . . kusug patok hini nga daku nga panon” ngan diri hira maaram kon ano an ira bubuhaton. Sinarig hiya hin bug-os kan Jehova pinaagi ha pagsiring: “An amon mga mata aada ha imo.”—2 Kron. 20:12.

¹³ Pariho kan Jehosapat, may mga kahimtang nga bangin diri kita maaram han aton bubuhaton ngan nahahadlok pa ngani. (2 Cor. 4:8, 9) Pero tigamni nga ha pag-ampo ni Jehosapat ha publiko, iginyakan niya nga waray hiya mahihimo pati na an iya katawohan. (2 Kron. 20:5) Masusubad han ulo han pamilya hi Jehosapat kon masarig hiya kan Jehova para hin giya ngan kusog basi malamposan an ira problema. Ayaw kaawod nga mabatian han imo pamilya an sugad nga mga pangamuyo. Aabaton nira nga nasarig ka gud kan Jehova. Ginbuligan han Dios hi Jehosapat, salit sigurado nga bubuligan ka liwat niya.

14, 15. Paonan-o iginpakita ni Hesekia an iya bug-os nga pagsarig ha Dios?

¹⁴ Diri pariho kan Jehosapat, kinahanglan atohan ni Hesekia an maraot nga impluwensya han iya idolatroso nga tatay basi magin hadi nga kilala nga ‘nakupkop kan Jehova.’ “Pinanguha [ni Hesekia] an higtaas nga mga lugar, ngan pinan-gunob an mga harigi, ngan ginpulud an Asera: ngan iya ginutudutud an halas nga tumbaga nga kan Moises ginhimo,” nga hito nga panahon ginagamit ha idolatroso nga pagsingba. Bug-os gud an debosyon ni Hesekia kan Jehova kay padayon hiya nga “nagbantay han iya mga sogo, nga kan Jehova iginsogo kan Moises.”—2 Hadi 18:1-6.

¹⁵ Bisan han ginsulong an Juda han Asirya, an nangunguna nga gahum ha kalibotan hito nga panahon, ngan nameligro gud an Jerusalem, bug-os-kasingkasing nga sinarig hi Hesekia kan Jehova. Gin-insulto han hadi han Asirya nga hi Senakerib hi Jehova ngan nangalimbasog nga hadlukon hi Hesekia basi sumurender. Kondi ha pag-ampo ni Hesekia, iginpahayag niya an iya bug-os nga pagsarig ha gahum ni Jehova ha pagtalwas. (Basaha an Isaias 37:15-20.) Ginbaton han Dios an iya pag-ampo pinaagi ha pagsugo hin anghel basi pamatayon an 185,000 nga Asiryahanon.—Isa. 37:36, 37.

16, 17. Paonan-o mo masusubad hi Hesekia ha imo pag-alagad ha Dios?

¹⁶ Ha urhi, nagkasakit hi Hesekia ngan haros mamatay. Nanginyupo hiya kan Jehova nga hinumdoman an iya pagkamatinumanon ha Iya. (Basaha an 2 Hadi 20:1-3.) Hinbaroan naton ha Kasuratan nga nagkikinabuhi na kita ha panahon diin diri na kita makakalaom hin milagroso nga pagtambal han Dios o makakahangyo nga pahilawigon an aton kinabuhi. Bisan pa hito, mahimo subaron han tagsa ha aton hi Hesekia nga nagsiring ha iya pag-ampo: ‘Naglakat ako ha imo atubangan ha kamatuuran ngan ha hingpit nga kasingkasing.’ Natoo ka ba nga may kapas hi Jehova ngan karuyag gud niya nga buligan ka bisan kon magkasakit ka?—Sal. 41:3.

¹⁷ Ha pagpamalandong han ehemplo ni Hesekia, bangin may makita kita nga kinahanglan wad-on ha aton kalugaringon basi waray makaulang ha aton relasyon ha Dios o makawara han aton pokus ha pag-alagad ha iya. Diri gud naton karuyag subaron an mga tawo ha kalibotan nga gin-iidolo an mga indibiduwal pinaagi han social media. Oo, may mga Kristiano nga nalilipay paggamit hito basi makigkomunikar ha ira mga kapamilya o duok nga kasangkayan. Pero damu ha kalibotan an sobra nga nagamit han social media; karuyag nira mahibaroan an ngatanan mahitungod ha mga indibiduwal nga diri ngani nira kilala. O nauubos an ira panahon ha pagkinita hin mga retrato o pagbinasa mahitungod hin mga indibiduwal. Peligroso an sobra nga paggamit han social media. An usa nga Kristiano mahimo magin mapahitas-on kon makita niya nga  damu an nag-like han iya mga gin-post, o masina pa ngani kon waray na mag-like hito. Mahahanduraw ba naton hi apostol Pablo o hira Aquila ngan Priscila nga kada adlaw sagipo ha pagpinan-post hin mga retrato o pagpinan-usisa hin mga indibiduwal nga diri igkasi-Kristiano? Mababasa naton nga hi Pablo ‘sagipo gud ha pagsangyaw han pulong han Dios.’ Ngan gin-gamit nira Priscila ngan Aquila an ira panahon basi ‘isaysay hin maopay an pamaagi han Dios’ ha mga tawo. (Buh. 18:4, 5, 26) Mahimo naton pakianhan an aton kalugaringon, ‘Ginlilikyan ko ba nga trataron an mga tawo sugad nga idolo o gamiton an akon birilhon nga panahon ha waray pulos nga mga butang?’—Basaha an Efeso 5:15, 16.

18, 19. Ano an karuyag mo subaron kan Josia?

¹⁸ Hi Hadi Josia, nga apo ha tuhod ni Hesekia, determinado liwat nga sundon an mga balaud ni Jehova “ha bug-os niya nga kasingkasing.” (2 Kron. 34:31) Han batan-on pa hi Josia, “hiya nagtikang pangita han Dios ni David,” ngan han nag-20 anyos hiya, gintikangan niya an paglimpyo ha Juda basi wad-on an idolatriya. (Basaha an 2 Kronikas 34:1-3.) Waray gud nakapariho nga mga hadi han Juda ha determinasyon ni Josia nga buhaton an nalilipayan han Dios. Dugang pa, han naagian an posible nga orihinal nga mga kopya han Mosaiko nga Balaud ngan ginbasa ito kan Josia, nakita niya an panginahanglan nga magin mas determinado pa nga buhaton an kaburut-on han Dios. Gin-aghat niya an katawohan nga mag-alagad kan Jehova. Sugad nga resulta, “waray hira bumaya tikang ha pagsunud kan Jehova” ha bug-os nga kinabuhi ni Josia.—2 Kron. 34:27, 33.

¹⁹ Pariho kan Josia, sadang pangitaon han mga batan-on hi Jehova samtang bata pa. Bangin gintutdoan hi Josia han mabinasulon nga hi Hadi Manases mahitungod han kalooy han Dios. Mga batan-on, pakig-upod ha matinumanon nga mga edaran nga imo kapamilya o kakongregasyon ngan hibaroi kon paonan-o iginpakita ha ira ni Jehova an iya pagkamaopay. Hinumdumi liwat nga an pagbasa ha Kasuratan nakabantad han kasingkasing ni Josia ngan nagpagios ha iya nga buhaton an iya hinbaroan. An imo pagbasa ha Pulong han Dios mahimo magpagios ha imo nga buhaton an mga butang nga mas makakapalipay ha imo, magpaparig-on han imo pakigsangkay ha Dios, ngan mag-aaghat ha imo nga buligan an iba nga pangitaon an Dios. (Basaha an 2 Kronikas 34:18, 19.) An pag-aram ha Biblia makakabulig liwat ha imo nga hibaroan kon paonan-o pa mas mapapauswag an imo pag-alagad kan Jehova. Kon bubuhaton mo ito, ginsusubad mo hi Josia.

20, 21. (a) Ano an ginkaparihoan han upat nga hadi nga aton ginhisgotan? (b) Ano an aton hihisgotan ha sunod nga artikulo?

²⁰ Nakita mo ba an kapulsanan han paghisgot han ehemplo han upat nga hadi han Juda nga nag-alagad kan Jehova ha hingpit nga kasingkasing? Determinado hira nga buhaton an kaburut-on han Dios ngan ihatag an ira bug-os nga debosyon kan Jehova. Padayon nira nga ginbuhat an iya kaburut-on. Sinarig hira ha Dios han inatubang hira hin gamhanan nga mga kaaway. Labaw ha ngatanan, nag-alagad hira kan Jehova tungod kay hinigugma gud nira hiya.

²¹ Ha sunod nga artikulo, mahibabaroan naton nga inin upat nga hadi nakabuhat hin sayop. Pero han ginkita hira han Parausisa han kasingkasing, nakita niya nga hingpit an ira kasingkasing ha pag-alagad ha iya. Kita liwat diri mga perpekto. Kon uusisahon ni Jehova an aton kasingkasing, masisiring ba niya nga hingpit ito ha pag-alagad ha iya? Hihisgotan naton ito ha sunod nga artikulo.