Leksion 16

Ano an kinahanglan mo buhaton basi magin sangkay han Dios? (1, 2)

Paonan-o ka naghihimo hin dedikasyon ha Dios? (1)

San-o ka sadang magpabawtismo? (2)

Paonan-o mo makakarawat an kusog basi magpabilin nga matinumanon ha Dios? (3)

1. Basi magin sangkay han Dios, kinahanglan magkaada ka maopay nga kahibaro ha kamatuoran han Biblia (1 Timoteo 2:​3, 4), tomoo ha mga butang nga imo hinbabaroan (Hebreo 11:6), magbasol ha imo mga sala (Buhat 17:​30, 31), ngan magbag-o ha imo kurso han kinabuhi. (Buhat 3:19) Ngan an imo gugma ha Diyos sadang magpagios ha imo nga igdedikar an imo kalugaringon ha iya. Nangangahulogan ini nga ha personal, pribado nga pag-ampo imo iginsusumat ha iya nga iginhahatag mo an imo kalugaringon ha iya basi buhaton an iya kaburut-on.​—Mateo 16:24; 22:37.

2. Katapos nga ginhimo mo an imo dedikasyon ha Dios, sadang ka magpabawtismo. (Mateo 28:​19, 20) An bawtismo nagpapahibaro ha ngatanan nga igindedikar mo an imo kalugaringon kan Jehova. Salit an bawtismo para la hadton may edad na nga makakahimo na hin desisyon nga mag-alagad ha Dios. Kon an usa ka tawo ginbabawtismohan, an iya bug-os nga lawas sadang ipailarom ha tubig hin usa ka dali. a​—Markos 1:​9, 10; Buhat 8:36.

3. Katapos nga naghimo ka hin dedikasyon, lalaoman ka ni Jehova nga magkikinabuhi uyon ha imo saad. (Salmo 50:14; Eklesiastes 5:​4, 5) An Yawa mangangalimbasog ha pagpaukoy ha imo ha pag-alagad kan Jehova. (1 Pedro 5:8) Kondi magpahirani ka ha Dios ha pag-ampo. (Filipos 4:​6, 7) Pag-aram ha iya Pulong kada adlaw. (Salmo 1:​1-3) Pagpabilin nga duok ha kongregasyon. (Hebreo 13:17) Ha pagbuhat hini ngatanan, magkakaada ka kusog ha pagpabilin nga matinumanon ha Dios. Ha bug-os nga kadayonan mahihimo mo an mga butang nga ginkikinahanglan ha imo han Dios!

[Footnote]