Marcos 5:1-43
5 Inabot hira ha tabok han dagat ha rehiyon han mga taga-Gerasa.
2 Pakahaw-as gud ni Jesus ha baluto, gintapo hiya hin lalaki nga tikang ha lubnganan,* nga ginsaniban hin maraot nga espiritu.
3 Naukoy hiya ha lubnganan, ngan tubtob hito nga panahon waray pa nakakagapos ha iya hin marig-on, bisan kadena an igapos.
4 Makadamu na hiya gaposa hin kadena ha mga tiil ngan mga kamot, pero nauutod niya ito, ngan waray gud nakakapugong ha iya.
5 Adlaw ngan gab-i nga naggiginuliat hiya ha mga lubnganan ngan ha kabukiran ngan ginsasamad niya hin bato an iya kalugaringon.
6 Pero han nakita niya hi Jesus nga hirayo pa, dinalagan hiya ngan yinukbo ha iya.
7 Katapos ginuliat hiya hin makusog: “Ano an imo tuyo ha akon, Jesus, Anak han Gihitaasi nga Dios? Pagsumpa ha Dios nga diri mo ako pasasakitan.”
8 Kay ginsinidngan hiya ni Jesus: “Gawas tikang hito nga tawo, ikaw nga maraot nga espiritu.”
9 Ngan hi Jesus nagpakiana ha iya: “Ano an imo ngaran?” Binaton hiya: “Lehiyon an akon ngaran, kay damu kami.”
10 Ngan damu ka beses nga nakimalooy hiya kan Jesus nga hira nga mga espiritu diri paiwason tikang hito nga lugar.
11 Hito nga takna may daku nga panon han mga baboy nga nangangaon didto ha bukid.
12 Salit an mga espiritu nakimalooy kan Jesus: “Pakadtoa kami ha mga baboy basi makasulod kami ha ira.”
13 Ngan iya gintugotan hira. Salit ginawas an magraot nga espiritu ngan sinulod ha mga baboy, ngan an panon han mga 2,000 nga baboy nagdadlagan ngadto ha pangpang, nanlayog ha dagat ngan nagkalulumos.
14 Pero an mga nag-aataman hito nagdadlagan ngan nanumat ha syudad ngan ha kaumhan, ngan an mga tawo kinadto basi kitaon an nahitabo.
15 Salit dinaop hira kan Jesus, ngan nakita nira an tawo nga ginsaniban hin lehiyon nga mga demonyo. Nalingkod hiya nga nakabado ngan maopay na an panhunahuna, ngan nahadlok gud hira.
16 Ngan an nagpakakita hito nag-istorya ha ira han nahitabo ha mga baboy ngan ha lalaki nga ginsaniban hin mga demonyo.
17 Salit nakimalooy hira kan Jesus nga bumaya ha ira mga distrito.
18 Han tisakay na hiya ha baluto, an tawo nga ginsaniban hin demonyo nakimalooy ha iya nga paupdon hiya.
19 Pero waray tumugot hi Jesus, lugod ginsidngan hiya: “Uli ha imo mga paryente, ngan isumat ha ira an ngatanan nga ginbuhat ni Jehova para ha imo ngan an kalooy niya ha imo.”
20 Salit linakat hiya ngan iginsumat ha Decapolis* an ngatanan nga ginbuhat ni Jesus para ha iya, ngan nahipausa an mga tawo.
21 Pagkadto utro ni Jesus ha tabok nga baybayon sakay ha baluto, dinaop ha iya an damu nga tawo samtang nakada pa hiya ha ligid han dagat.
22 Inabot an usa han punoan nga opisyal han sinagoga, nga Jairo an ngaran, ngan pakakita kan Jesus, hinapa hiya ha iya tiilan
23 ngan nakimalooy ha iya hin damu ka beses, nasiring: “An akon daragita grabe an sakit. Alayon upod ha akon ngan kapti hiya basi mag-opay ngan diri mamatay.”
24 Salit inupod hi Jesus ha iya. Ngan damu nga tawo an nagsinunod kan Jesus ngan ginsusuok hiya.
25 Ngan may usa nga babaye nga 12 ka tuig na nga gindidinugoan.
26 Makuri an iya gin-antos ha damu nga paratambal ngan naubos na an ngatanan nga iya katigayonan pero waray hiya mag-opay, nagtikagrabe la lugod.
27 Han hinbatian niya an mga sumat mahitungod kan Jesus, sinuksok hiya ha mga tawo basi makahirani ha luyo ni Jesus ngan makaptan an iya pantungbaw nga panapton,
28 kay nagsiniring hiya: “Bisan makaptan ko la an iya pantungbaw nga panapton mag-oopay na ako.”
29 Inundang dayon an pagdinugui ha iya, ngan inabat niya nga nag-opay na an iya grabe nga sakit.
30 Inabat dayon ni Jesus nga may gahum nga ginawas ha iya, salit liningi hiya ha mga tawo ngan nagpakiana: “Hin-o an kinapot han akon pantungbaw nga panapton?”
31 An iya mga disipulo binaton: “Nakikita mo nga ginsusuok ka han mga tawo, kay ano nga nagpapakiana ka, ‘Hin-o an kinapot ha akon?’ ”
32 Ngan naglingi-lingi hiya basi makita kon hin-o an nagbuhat hito.
33 Tungod kay maaram an babaye han nahitabo ha iya, nahahadlok ngan nangungurog nga dinaop hiya kan Jesus, hinapa ha iya atubangan ngan iginsumat ha iya an ngatanan.
34 Hi Jesus nagsiring ha iya: “Anak, tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.”
35 Samtang nagyayakan pa hi Jesus, may mga tawo nga inabot tikang ha balay ni Jairo ngan nagsiring: “An imo anak patay na! Kay ano nga didisturbuhon mo pa an Magturutdo?”
36 Pero hinbatian ni Jesus an ira ginyakan ngan nagsiring hiya kan Jairo: “Ayaw kabaraka, tumoo ka la.”
37 Waray hiya ginpaupod labot kan Pedro ngan han magbugto nga hira Santiago ngan Juan.
38 Salit kinadto hira ha balay ni Jairo, ngan nakita nira an kalisang ngan an mga nagtatangis ngan nagngunguyngoy.
39 Pagsulod niya, nagsiring hiya ha ira: “Kay ano nga nalilisang kamo ngan nananangis? Waray mamatay an bata, nakaturog la hiya.”
40 Tungod hito, nakakatamay nga gintinawaan nira hiya. Pero katapos niya pagawson hira ngatanan, igin-upod niya an mga kag-anak han bata ngan an iya mga kaupod ngan sinulod hira ha hinihigdaan han bata.
41 Katapos, ginkaptan niya an kamot han bata ngan nagsiring: “Talitha cumi,” nga nangangahulogan: “Daragita, nasiring ako ha imo, ‘Buhát!’ ”
42 Ngan binuhát dayon an 12 anyos nga daragita ngan naglakat. Nahipausa gud hira ngan duro an ira kalipay.
43 Pero pauroutro nga gintugon hira ni Jesus nga diri gud magsumat ha bisan hin-o, ngan ginpahatagan niya hin pagkaon an daragita.
