Marcos 11:1-33
11 Han hirani na hira ha Jerusalem, ha may Betfage ngan ha Betania ha Bukid han mga Olibo, ginsugo ni Jesus an duha han iya mga disipulo
2 ngan ginsidngan hira: “Kadto kamo hito nga baryo nga iyo nakikita ha unhan, ngan pagsulod niyo makakakita kamo hin nakahigot nga nati nga asno nga waray pa masakyi hin tawo; badbari ito ngan dad-a nganhi.
3 Ngan kon may magpakiana ha iyo, ‘Kay ano nga ginbubuhat niyo ini?’ siring kamo, ‘Kinahanglanon ini han Ginoo pero ipapabalik dayon niya nganhi.’ ”
4 Salit linakat hira ngan nakita an nati nga asno nga nakahigot ha purtahan han usa nga balay hirani ha dalan, ngan ginbadbad nira an higot hito.
5 Pero an iba nga naninindog didto nagsiring ha ira: “Kay ano nga ginbabadbad niyo an higot han nati nga asno?”
6 Ira ginsidngan hira han igintugon ni Jesus, ngan tinugot hira nga dad-on ito.
7 Gindara nira kan Jesus an nati nga asno ngan ginsapinan ito han ira pantungbaw nga mga panapton, ngan sinakay hiya hito.
8 Damu liwat an naglatag ha dalan han ira pantungbaw nga mga panapton, pero an iba nangutod hin mga dahon han palma ha ligid han dalan.
9 An mga nag-uuna ngan nagsisinunod ha iya nagsininggit: “Nag-aampo kami, talwasa hiya! Bendisyonan unta hiya nga napakanhi ha ngaran ni Jehova!
10 Bendisyonan unta an tiarabot nga Ginhadian han aton amay nga hi David! Talwasa hiya, nag-aampo kami ha imo nga aada ha kahitas-an!”
11 Ngan sinulod hiya ha Jerusalem, ngadto ha templo, ngan ginkita niya an ngatanan ha palibot, pero tungod kay tikagab-i na, kinadto hiya ha Betania upod an 12 nga apostol.
12 Kinabuwasan, paggawas nira ha Betania, gin-gutom hi Jesus.
13 Ha unhan, nakakita hiya hin kahoy nga igera nga may mga dahon, ngan gindaop niya ito basi kitaon kon may bunga. Pero han hirani na hiya, waray hiya nakita nga bunga kondi mga dahon la, kay diri adto panahon ha pamunga han mga igera.
14 Salit ginsidngan niya ito: “Tikang yana waray na gud makakakaon han imo bunga.” Ngan nabatian ito han iya mga disipulo.
15 Katapos kinadto hira ha Jerusalem. Sinulod hiya ha templo ngan ginpaiwas an namamaligya ngan namamalit didto, ngan ginbalintong an mga lamesa han mga parabalyo hin kwarta ngan an mga lingkoran han mga parabaligya hin sarapati,
16 ngan gindid-an niya pag-agi ha bungsaran han templo an may dara nga bisan ano nga butang.
17 Nagtutdo hiya ngan nagsiring: “Diri ba ini an iginsurat: ‘An akon balay tatawagon nga balay nga arampoan han ngatanan nga nasud’? Pero ginhimo niyo ini nga lungib han mga kawatan.”
18 Han hinbatian ito han punoan nga mga saserdote ngan mga eskriba, namiling hira hin paagi ha pagpatay ha iya, kay nahahadlok hira ha iya tungod kay an ngatanan nga tawo nahipausa gud han iya igintututdo.
19 Han tikagab-i na, ginawas hira ha syudad.
20 Pero paglabay nira ha igera kinabuwasan han aga-aga, nakita nira nga uga na ito tikang ha mga gamot.
21 Salit han nahinumdoman ito ni Pedro, nagsiring hiya: “Rabbi, kitaa! an igera nga imo iginsumpa uga na.”
22 Hi Jesus nagsiring ha ira: “Too kamo ha Dios.
23 Ha pagkamatuod, susumatan ko kamo nga bisan hin-o nga magsiring hini nga bukid, ‘Magabot ka ngan mahilabog ngadto ha dagat,’ ngan diri nagruruhaduha kondi natoo nga mahitatabo an iya ginsisiring, matutuman gud ito.
24 Ini an hinungdan kon kay ano nga ginsusumatan ko kamo: Too kamo nga an ngatanan nga iyo igin-aampo ngan gin-aaro sigurado nga makakarawat niyo.
25 Ngan samtang nag-aampo kamo nga natindog, pasayloa an bisan hin-o nga nakasala ha iyo, basi pasayloon liwat han iyo Amay ha langit an iyo mga sala.”
26 * ——
27 Kinadto utro hira ha Jerusalem. Ngan samtang naglalakat hi Jesus ha templo, dinaop ha iya an punoan nga mga saserdote, an mga eskriba ngan an katigurangan,
28 ngan nagsiring ha iya: “Ha ano nga awtoridad ginbubuhat mo ini nga mga butang? O hin-o an naghatag ha imo hin awtoridad ha pagbuhat hini nga mga butang?”
29 Binaton hi Jesus: “May ipapakiana ako ha iyo. Batona niyo ngan babatunon ko liwat kamo kon ha ano nga awtoridad ginbubuhat ko ini nga mga butang.
30 An awtoridad ba ni Juan ha pagbawtismo, tikang ha langit o ha mga tawo? Batona ako niyo.”
31 Salit nag-iristorya hira: “Kon sumiring kita, ‘Tikang ha langit,’ masiring hiya, ‘Kay ano man nga waray kamo tumoo ha iya?’
32 O masiring ba kita, ‘Tikang ha mga tawo’?” Nahadlok hira pagsiring hini kay an mga tawo natoo nga hi Juan usa gud nga propeta.
33 Salit binaton hira kan Jesus: “Diri kami maaram.” Hi Jesus nagsiring ha ira: “Diri ko liwat isusumat ha iyo kon ha ano nga awtoridad ginbubuhat ko ini nga mga butang.”
Mga footnote
^ Kitaa an footnote ha Mat 17:21.
