Marcos 7:1-37
7 An mga Pariseo ngan an iba nga mga eskriba tikang ha Jerusalem dinaop kan Jesus.
2 Ngan han nakita nira nga an iba han iya mga disipulo nangangaon nga maghugaw an kamot, karuyag sidngon, waray manhunaw,* naghunahuna hira nga sayop an mga disipulo;
3 kay an mga Pariseo ngan an ngatanan nga Judio diri nangangaon kon diri anay manhunaw tubtob ha siko, sugad nga pagsunod ha tradisyon han mga tawo ha kadaan nga panahon.
4 Ngan kon tikang hira ha merkado, diri hira nakaon kon diri hira maglimpyo anay han ira lawas pinaagi han pagwisik hin tubig. Ngan damu pa nga tradisyon an ira nakarawat ngan ginsusunod, sugad han pagtunlob ha tubig han mga tasa, mga pitsel, ngan mga surudlan nga tumbaga.
5 Salit an mga Pariseo ngan mga eskriba nagpakiana: “Kay ano nga diri ginsusunod han imo mga disipulo an tradisyon han mga tawo ha kadaan nga panahon, ngan nangangaon hira nga maghugaw an kamot?”
6 Binaton hiya: “Husto gud an igintagna ni Isaias mahitungod ha iyo nga mga hipokrito, sugad han nahisurat: ‘Ini nga mga tawo nagpapasidungog ha akon pinaagi han ira mga im-im, pero an ira kasingkasing hirayo gud ha akon.
7 Waray pulos an ira padayon nga pagsingba ha akon, kay ira igintututdo an mga sugo han mga tawo sugad nga mga doktrina.’
8 Diri niyo ginsusunod an sugo han Dios, lugod gintutuman niyo an tradisyon han mga tawo.”
9 Dugang pa, nagsiring hiya: “Listo kamo magbalewaray han sugo han Dios basi matuman an iyo tradisyon.
10 Pananglitan, hi Moises nagsiring, ‘Pasidunggi an imo tatay ngan an imo nanay,’ ngan ‘An nagyayakan hin maraot ha iya tatay o nanay, papatayon.’
11 Pero nasiring kamo, ‘Kon may sumiring ha iya tatay o ha iya nanay: “Bisan ano nga gintatag-iya ko nga posible mo mapahimulsan corban na (nangangahulogan nga iginhalad na ha Dios sugad nga regalo),” ’
12 diri na niyo hiya ginpapahimo hin bisan ano para ha iya mga kag-anak.
13 Salit iyo ginbabalewaray an pulong han Dios tungod han iyo tradisyon nga iginpasa niyo. Ngan damu nga sugad hini an iyo ginbubuhat.”
14 Han ginpadaop utro niya an mga tawo, nagsiring hiya: “Pamati kamo ha akon, ngan sabota niyo an kahulogan hini.
15 An nakakahugaw ha tawo diri an nasulod ha iya baba, kondi an nagawas tikang hito.”
16 * ——
17 Pagbaya ni Jesus ha mga tawo, sinulod hiya ha usa nga balay, ngan an iya mga disipulo nagpakiana mahitungod han ilustrasyon.
18 Salit nagsiring hiya: “Diri ba liwat kamo nasabot pariho ha ira? Diri ba kamo maaram nga an nakakahugaw ha tawo diri an nasulod ha iya baba,
19 kay diri ito naagi ha iya kasingkasing kondi ha iya tiyan, ngan nagawas ha lawas?” Ha pagsiring hini, iginpahayag ni Jesus nga limpyo an ngatanan nga pagkaon.
20 Dugang pa, nagsiring hiya: “An nagawas ha baba han tawo amo an nakakahugaw ha iya,
21 kay tikang ha sulod, ha kasingkasing han mga tawo, nagawas an nakakasakit nga pangatadongan, imoralidad, pangawat, pagpatay,
22 pag-adulteryo,* kahakog, magraot nga buhat, panlimbong, mangil-ad nga paggawi,* aw-anon nga mata, pagpasipara, pagpahitaas, ngan pagkadiri-makatadunganon.
23 Ini ngatanan nga magraot nga buhat nagawas ngan nakakahugaw ha tawo.”
24 Tikang didto, kinadto hiya ha mga distrito han Tiro ngan Sidon. Ngan sinulod hiya ha usa nga balay kay diri niya karuyag nga may mahibaro nga inabot hiya, kondi hinbaroan la gihapon ito.
25 Usa nga babaye nga may gutiay pa nga anak nga babaye nga ginsaniban hin maraot nga espiritu an nahibaro dayon mahitungod kan Jesus salit kinadto ha iya ngan hinapa ha may tiil niya.
26 Griego ito nga babaye, tikang ha Fenicia ha Sirya, ngan naghinangyo hiya kan Jesus nga pagawson ha iya anak an demonyo.
27 Pero nagsiring hi Jesus ha iya: “Pabay-i nga mabusog anay an mga anak, kay diri angay kuhaon an ira tinapay ngan ig-itsa ito ha gudtiay nga kaayaman.”
28 Kondi binaton hiya: “Oo Ginoo, pero an gudtiay nga kaayaman ha ilarom han lamesa nakaon han nahuhulog nga mga pagkaon han mga anak.”
29 Ngan hi Jesus binaton: “Tungod hini nga imo ginsiring, sige, mahimo ka na umuli. Ginawas na an demonyo tikang ha imo anak.”
30 Salit inuli hiya ngan nakita an iya anak nga nahigda, ngan ginawas na an demonyo.
31 Pagbalik ni Jesus tikang ha mga distrito han Tiro, ha Sidon hiya umagi tipakadto ha dagat han Galilea ngan ha mga syudad han Decapolis.
32 Dinhi gindara ha iya han mga tawo an usa nga bungol ngan may diperensya ha pagyakan, ngan nakimalooy hira ha iya nga kaptan ito nga tawo.
33 Gindara hiya ni Jesus pahirayo ha kadam-an ngan iginsuksok an iya mga tudlo ha mga talinga hito nga tawo, ngan katapos lumura, iya ginkaptan an dila hito nga tawo.
34 Hinangad hi Jesus ha langit, gininhawa hin hilarom, ngan nagsiring ha iya: “Ephphatha,” nga nangangahulogan, “Maabrihan ka.”
35 Naabrihan an iya mga talinga ngan natambal an iya diperensya ha pagyakan, salit nakayakan na hiya hin maopay.
36 Ngan gintugon hira ni Jesus nga diri magsumat ha bisan hin-o, pero samtang mas ginpapabug-atan niya nga diri isumat ito, mas iginpapanumat lugod nira ito.
37 Salit nahipausa gud hira ngan nagsiring: “Urusahon gud an ngatanan nga iya ginbuhat. Gintambal pa ngani niya an mga bungol ngan mga ngula.”
Mga footnote
^ Diri ini nangangahulogan nga mahugaw an ira kamot pero tradisyon ini han mga Judio ha ritwal nga paglimpyo han kamot.
^ Kitaa an footnote ha Mat 17:21.
^ Kitaa an “Adulteryo” ha Glossary.
^ Kitaa an “Mangil-ad nga paggawi” ha Glossary.
