Marcos 12:1-44
12 Katapos, nagyakan hi Jesus ha mga tawo pinaagi hin mga ilustrasyon: “May usa nga tawo nga nagtanom hin urubasan, ngan iya ito gin-alad. Nag-ukad hiya hin purog-an han ubas ngan nagtindog hin torre. Katapos iya ito ginpaataman ha mga parauma ngan nagbiyahe ha iba nga nasud.
2 Han panahon na ha pag-ani han mga ubas, nagsugo hiya hin uripon ngadto ha mga parauma basi kuhaon an iya bahín ha urubasan.
3 Pero ira gindakop an uripon, ginkastigo, ngan ginpabaya hiya nga waray dara.
4 Ngan nagsugo hiya hin usa pa nga uripon ngadto ha ira, ngan ira ito ginbalbag ha ulo ngan gin-insulto.
5 Katapos ginpakadto niya an usa pa, pero ira ito ginpatay. Damu pa an iya ginpakadto, pero an iba ira ginkastigo ngan an iba ira ginpatay.
6 Iya ginpakadto an usa pa, an iya hinigugma nga anak. Hiya an ultimo nga iya ginpakadto ha ira kay nasiring hiya, ‘Irirespeto nira an akon anak.’
7 Pero nagsarabot an mga parauma, ‘Ini an eredero. Tana, patayon naton hiya basi magin aton an panurundon.’
8 Salit ira gindakop hiya, ginpatay, ngan gindanas ngadto ha gawas han urubasan.
9 Ano an bubuhaton han tag-iya han urubasan? Makadto hiya ngan papatayon an mga parauma, ngan ihahatag ha iba an urubasan.
10 Waray gud ba niyo mabasa ini nga kasuratan: ‘An bato nga iginsalikway han mga magtirindog, ini an nagin pinakaimportante nga pandugtong nga bato ha eskina?*
11 Tikang ini kan Jehova, ngan maopay gud ini pagkit-on.’ ”
12 Tungod kay nasantop han punoan nga mga saserdote ngan han mga eskriba nga hira an gin-uunabi ni Jesus ha iya ilustrasyon, nangalimbasog hira pag-aresto ha iya, pero nahadlok hira ha mga tawo. Salit ira ginbayaan hiya.
13 Ngan ginpakadto nira ha iya an pipira nga Pariseo ngan mga membro han partido ni Herodes basi madakop hiya ha iya mga pulong.
14 Pag-abot nira, nagsiring hira ha iya: “Magturutdo, maaram kami nga nagsusumat ka han kamatuoran ngan waray ka ginpapaurog, kay an imo ginkikita diri an gawas nga hitsura han tawo, lugod igintututdo mo an dalan han Dios uyon ha kamatuoran. Sumati kami: Uyon ba ha balaud nga magbayad hin buhis ha Cesar* o diri?
15 Magbabayad ba kami o diri?” Tungod kay naobserbaran ni Jesus an ira pagin hipokrito, nagsiring hiya: “Kay ano nga ginsasarihan niyo ako? Tagi ako hin denaryo kay kikitaon ko.”
16 Ira gintagan hiya hin usa nga denaryo. Ngan nagpakiana hiya ha ira: “Kan kanay ini ladawan ngan titulo?” Binaton hira: “Kan Cesar.”
17 Salit hi Jesus nagsiring: “Ihatag ha Cesar an mga butang han Cesar, pero ihatag ha Dios an mga butang han Dios.” Ngan nahipausa gud hira ha iya.
18 An mga Saduseo,* nga nasiring nga waray pagkabanhaw, dinaop ha iya ngan nagpakiana:
19 “Magturutdo, hi Moises nagsurat ha aton nga kon an bugto han usa nga tawo mamatay nga waray anak ha iya asawa, sadang niya pangasaw-on an asawa han iya bugto basi magkaada mga anak para ha iya.
20 May pito nga magburugto. An suhag nag-asawa, kondi namatay hiya nga waray anak.
21 Katapos ginpangasawa han ikaduha an iya asawa, kondi namatay liwat nga waray anak, ngan sugad liwat hito an nahitabo ha ikatulo.
22 Ngan hira nga pito waray magkaada anak. Paglabay han panahon, namatay liwat an babaye.
23 Ha pagkabanhaw, hin-o ha ira an iya magigin bana, kay nagin asawa hiya han pito?”
24 Hi Jesus binaton: “Diri ba tungod hini nagsasayop kamo, kay diri kamo maaram han Kasuratan ngan han gahum han Dios?
25 Kay kon banhawon hira, an kalalakin-an diri na mag-aasawa ngan an kababayin-an diri na pangangasaw-on, kondi magigin sugad na hira hin mga anghel ha langit.
26 Pero mahitungod han mga patay nga mababanhaw, waray ba niyo mabasa an iginsurat ni Moises mahitungod han tunukon nga tanom, nga didto nagsiring ha iya an Dios: ‘Ako an Dios ni Abraham ngan Dios ni Isaac ngan Dios ni Jacob’?
27 Hiya an Dios, diri han mga patay, kondi han mga buhi. Nagsasayop gud kamo.”
28 Usa han mga eskriba nga nakadto an nakabati han ira diskusyon. Tungod kay maaram hiya nga maopay gud an baton ha ira ni Jesus, nagpakiana hiya: “Ano nga sugo an pinakaimportante ha ngatanan?”
29 Binaton hi Jesus: “An siyahan, ‘Pamati, O Israel, hi Jehova an aton Dios, ngan uusa la hi Jehova.
30 Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ha bug-os mo nga hunahuna, ngan ha bug-os mo nga kusog.’
31 An ikaduha amo ini, ‘Higugmaa an imo igkasi-tawo sugad ha imo kalugaringon.’ Waray iba nga sugo nga mas importante hini.”
32 An eskriba nagsiring ha iya: “Magturutdo, uyon gud ha kamatuoran an imo ginyakan, ‘Uusa la an Dios, ngan labot ha Iya waray na iba,’
33 ngan an paghigugma ha iya ha bug-os nga kasingkasing, ha bug-os nga pagsabot, ngan ha bug-os nga kusog, ngan an paghigugma ha igkasi-tawo sugad ha kalugaringon, mas maopay gud kay ha ngatanan nga bug-os nga mga halad nga sinunog ngan mga halad nga hayop.”
34 Maaram hi Jesus nga husto gud an iya baton, salit nagsiring hiya: “Diri ka hirayo ha Ginhadian han Dios.” Pero waray na nagsari pagpakiana ha iya.
35 Kondi samtang nagpapadayon hi Jesus pagtutdo ha templo, nagsiring hiya: “Kay ano nga an mga eskriba nasiring nga an Kristo anak ni David?
36 Pinaagi han baraan nga espiritu hi David mismo nagyakan, ‘Hi Jehova nagsiring ha akon Ginoo: “Lingkod ha akon too tubtob nga ibutang ko an imo mga kaaway ha ilarom han imo mga tiil.” ’
37 Hi David mismo nagtawag ha iya nga Ginoo, pero paonan-o hiya nagin anak ni David?”
Naruyag gud pagpinamati ha iya an damu nga tawo.
38 Ngan samtang nagtututdo, nagsiring hiya: “Pag-ikmat kamo ha mga eskriba nga naruruyag paglinakat-lakat nga nakabado hin hilaba ngan naruruyag tagan hin katalahoran ha mga merkado
39 ngan naruruyag paglingkod ha prente nga mga lingkoran ha mga sinagoga ngan ha pinakamaopay nga mga pwesto ha mga panihapon.
40 Gin-aagaw nira an mga balay* han mga balo nga babaye ngan nag-aampo hin higlaba pero pakita la; mas mabug-at nga sirot an ira makakarawat.”
41 Ngan liningkod hi Jesus ha dapit diin nakikita an mga kahon han kwarta, ngan ginkinita niya an damu nga tawo nga naghuhulog hin kwarta, ngan damu nga riko nga tawo an naghuhulog hin damu nga sinselyo.
42 Katapos may inabot nga pobre nga balo nga babaye ngan naghulog hin duha nga sinselyo nga gutiay gud an kantidad.
43 Salit gintawag ni Jesus an mga disipulo ngan ginsidngan hira: “Ha pagkamatuod, susumatan ko kamo nga ini nga pobre nga balo naghulog hin mas damu kay ha ngatanan nga naghulog ha mga kahon han kwarta.
44 Kay hira ngatanan naghulog han ira sobra, kondi ini nga balo, bisan kon nanginginahanglan hiya, naghulog han ngatanan nga iya kwarta, an iya bug-os nga ginpakabuhian.”
Mga footnote
^ Kitaa an footnote ha Mat 21:42.
^ O “Emperador han Roma.”
^ Kitaa an “Saduseo” ha Glossary.
^ O “propyedad.”
